Madius 4
4
1Is imyiapan Iesu a Nesgan Upene an namasacen mika yi oop yin a Tiapolo. 2Is eti caig tah nitai aien an nadiat is forte im nepeig is forte, is um ehtele yin. 3Is apan ehelen natimi oop yin, um ika, El et Hal o Atua aiek, namu ika aiek yi areto inhat iji eigki. 4Is tas aien, um ika, Eris aged, um ika, “Eri eti umumoh natimi vai areto ache, ja vai intas asega et ahes an nipjineucse Atua.” 5Is imyiapan yin a Tiapolo an nuarin-pece itaup, um atijai yin an nijintin neom ahlap, 6um ika ehelen, El et Hal o Atua aiek, namu aliaujaise aiek: eris aged, um ika, “Etpu tas alep ehele ilpu agelo o un aien vai euc:” “erupu aposjai euc irai ikmara ara, va an jim atgeig yi oplec neduom aiek an hat.” 7Is um ika ehelen a Iesu, Eris lep aged, um ika, “Namu jim ago nedo oop vai Ihova Atua unyum aiek.” 8Is lep imyiaridjai yin a Tiapolo an nedoon ijinies acen is ethi, um ehvaig ehelen niji elcau asega an nobohtan im niji itai upene iran; 9um ika ehelen, El et atpuse aiek um alaigaheni vai nyak, el ek par alupai euc nitai iji eigki asega ainyak. 10Is ika ehelen a Iesu, Atga unyum aiek, ak Satana, eris aged, um ika, “Namu alaigaheni vai Ihova Atua unyum aiek, um aheca o un” ache. 11Is um ude yin a Tiapolo: eris idim apan ehelen a ilpu agelo, um aheca o un.
12Is wat atahaijeg a Iesu, nikavaig, eris ati Joanes anliin neom ipjin, is apan Calili aien: 13is ude Nasared aien, um apan um amen Kaperneum, ubutpotet u injop an niblan pece Sebulon im Naftalai: 14mika eri ehneijid intas ineig is upyi aged a Aiseya naprofeta, um ika, 15“Inpece Sebulon im inpece Naftalai, ubutpotet u injop, an nahaijin Jortan itac, Calili inpece o ilpu atimi aupat; 16era mun ecetai inlah alupas ara sji eigki eris amen an naupat ara; et mun aridjai inlah imi ra eris amen an nuarin o naupat ara im inmas.”
17Is atupun a Iesu an naopan iyehki um tas, um ika, Akumu adumoij anliinmopomia aijaua: et mun ubutpotet nelcau an nohatag.
18Is atga a Iesu u injop Calili um ecet inraimu is ero, Saimona tak idan Pitrus, im Antrius etoan, erus anah an nopoig arau: erus atimi ahilek mu arau. 19Is um ika ehele rau aien, Apitac nyak aijaurau, ekpu ati caurau ainyak mika aru ahilek atimi aijaurau. 20Erus auroauro arau um ude nopoig, um apitac yin. 21Is ahes eahki aien um atga, um lep ecet inraimu is ero is eche, Jakobus inhal o Sebetaius im Joanes etoan, erus amen arau ehele Sebetaius etmarau an nelcau um uhpuri opoig ura; is ahlaig vai rau aien. 22Erus auroauro arau um ude nelcau im etmarau, um apitac yin.
23Is arahed an pece Calili asega a Iesu, um esege irai eom alaigaheni ura, um asuptecnaig intas-upene va nelcau o Atua, um iknipagki emehe asega ira atimi im nauatialidi ira ra. 24Is apaahni intas vai yin an pece Sirya asega: eris imyiapan ehelen ilpu atimi emehe asega ara is acheiachei nemehe ira ra im nohocred, im ra eris amen ira ra a ilpu agelo has, im ra is ti lelra ara, im ra eris apalse ara; is ago cehcehe ra aien. 25Eris ahes Calili, im Tikapolis, im Jerusalem, im Jutaia, im nahaijin Jortan itac natimi is ahinag, um ahced yin.
Valið núna:
Madius 4: ATY1863
Áherslumerki
Deildu
Afrita
Want to have your highlights saved across all your devices? Sign up or sign in
historic text maintained by the British and Foreign Bible Society