GENESIS 4
4
Akpa Ekpuk Ufɔk Cain ye Abel
1EKEM Adam ɔfiɔk Eve ŋwan esie; ndien enye oyomo, onyuŋ aman Cain, ndien ɔdɔhɔ ete, Mmenyene eyen eren emi otode Jehovah. 2Enye onyuŋ aman Abel eyen-eka esie ŋko-ŋko. Ndien Abel edi ekpemerɔŋ, edi Cain edi ofuŋ-isɔŋ.
Cain ye Abel
3Ekem ke utit isua, Cain ada mbuŋwum-iŋwaŋ edisɔk Jehovah ke uwa. 4Abel onyuŋ ada akpa nditɔ ŋkpri ufene esiemɔ ye ikpɔŋ mmɔ ɔnɔ. 5Ndien Jehovah ese Abel ke iso, ye uwa esie: edi isehe Cain, ye uwa esie. Ndien Cain ofut esit eti eti, iso onyuŋ ɔkpuhɔre enye. 6Ndien Jehovah ɔdɔhɔ Cain ete, Ke didie ke afo ofut esit? Ke didie ke iso onyuŋ ɔkpuhɔre fi? 7Afo akpanam eti ŋkpɔ, nte (iso) ikpeneŋekede fi? Edi munamke eti ŋkpɔ, idiɔk ŋkpɔ ke ana ke enyin usuŋ. Enye eyenyuŋ osuk idem ɔnɔ fi, ndien afo eyekan enye.
8Ndien Cain ɔdɔhɔ ikɔ ye Abel, eyen-eka esie: edikem, ke mmɔ edude ke iŋwaŋ, Cain adaha ke enyɔŋ anam ikɔ ye Abel eyen-eka esie, onyuŋ owot enye. 9Ndien Jehovah ɔdɔhɔ Cain ete, Enye Abel eyen-uka? Ndien enye ɔdɔhɔ ete, Mfiɔkke: ndi ami ndi andikpeme eyen-eka mi? 10Ndien Enye ete, Afo akanam nso? uyo iyip eyen-uka ke isɔŋ ke eseseme ɔnɔ mi. 11Ke emi idiɔk oto ke isɔŋ emi akatatde inua esie ɔbɔ fi iyip eyen-uka ke ubɔk, etiene fi. 12Ke ini afo ofuŋde isɔŋ, enye idinɔŋɔ aba fi odudu esie; afo eyedi nyoŋ ye andiyo ke isɔŋ. 13Ndien Cain ɔdɔhɔ Jehovah ete, Ufen mi okpon akan mi ndibiom. 14Sese afo ke ebin mi ke idut emi efep mfin emi; nyenyuŋ ndibe fi ke iso; nnyuŋ ndi nyoŋ ye andiyo ke isɔŋ; ndien ama ekem, kpukpru owo eke ekutde mi eyewot mi. 15Ndien Jehovah ɔdɔhɔ enye ete, Mmɔdo, owo ekededi ama owot Cain, eyesio usiene enɔ enye utim ikatiaba. Ndien Jehovah onim Cain idiɔŋɔ, mbak owo ekededi eke edikutde enye ediwot enye. 16Ndien Cain ɔwɔrɔ ɔkpɔŋ iso Jehovah, aka okoduŋ ke isɔŋ Nod, ke edem Eden emi utin asiahade.
17Ndien Cain ɔfiɔk ŋwan esie; enye onyuŋ oyomo, ndien aman Enoch: ndien enye ɔbɔp obio, onyuŋ ada enyiŋ Enoch eyen esie osio obio oro. 18Ndien Irad amana ɔnɔ Enoch: ndien Irad obon Mehujael: Mehujael onyuŋ obon Methusael: Methusael onyuŋ obon Lamech.
19Ekem Lamech ɔdɔ iban iba: enyiŋ kiet ekere Adah, enyiŋ eken onyuŋ ekere Zillah. 20Ndien Adah aman Jabal: enye ekedi ete mmɔ eke eduŋde ke tent, ye eke mbon ufene. 21Enyiŋ eyen-eka esie ŋko ekere Jubal: enye edi ete kpukpru mmɔ eke ebrede harp ye ndido. 22Zillah onyuŋ aman Tubal-Cain ŋko, andidom kpukpru ŋkpɔ okpoho ye ukwak: ndien eyen-eka Tubal-Cain aŋwan edi Naamah.
23Ndien Lamech ɔdɔhɔ iban esie, ete, Adah ye Zillah! mbufo ekop uyo mi; iban Lamech ekpaŋ utɔŋ ke ikɔ mi: koro mma ŋwot owo mbaŋa unan mi, kpa akparawa mbaŋa mfiomo mi: 24ke eyesio usiene enɔ Cain utim ikatiaba, enyuŋ esio enɔ Lamech ikaata ye efureba.
25Ekem Adam ɔtɔŋɔ ntak ɔfiɔk ŋwan esiemɔ; ndien enye aman eyen-eren onyuŋ osio enye enyiŋ Seth, ete: Koro Abasi ama ɔnɔ mi eyen eŋwen ke ibuot Abel, koro Cain owotde enye. 26Ndien eyen-eren onyuŋ amana ɔnɔ Seth ŋko; ndien enye osio enye enyiŋ Enos. Ke ini oro etɔŋɔ ndikot Jehovah ke enyiŋ Esie.
Valið núna:
GENESIS 4: ENA
Áherslumerki
Deildu
Afrita
Want to have your highlights saved across all your devices? Sign up or sign in
Efik Old Bible With Sectional Headings © Bible Society of Nigeria, 2013, 2019.