San Mateo 25
25
1In‐arig pay nen Jesus i timpon idaw to ali, ja kowan to ey, “Say arig ni pesing nen Apo Shiyos shi pantoshayan to, sajay ya istoriya. Wara konoy sampolon memeshikit ja engita‐jon ni kingkira ja sha seskeshen sota dakin mengesawa, say mekidaw ira son si‐kato shi kasal. 2Sota dima so nonta ira memeshikit, ẃaray nemnem sha, isonga nansagana ira; nem sota dima, enshi. 3,4Sota ira nansagana, engita‐jon ira ni silew shen kingki jet engita‐jon ngo pay ira ni maykalka nodtan say eg ma‐shep. Nem sota eg nansagana, engita‐jon bengat ira ni kingkira. 5Idi etaktak sota daki ja eg dimaw alin shagos, jimo‐kew ira sota memeshikit jet na‐ogip ira. 6Nem idi kawa ni dabi, ẃaray kimeljaw ja kowan to ey, ‘Bangon kayo! Ma‐ali sota daki! Jo aspol!’ 7Jet emin ira sota memeshikit, bimangon ira, jet tinotongan sha sota kingkira. 8Sota ira memeshikit ta eg nansagana, kowan sha so nonta ira kait sha ey, ‘Pangi‐kan kayo ka di ni maykalka shiya kingki mi tep emanka‐shep.’ 9Nem sota ira memeshikit ta nansagana, kowan sha ey, ‘Enshi, ta baka et ey eg on‐anay iyay ja para son si‐kami no i‐aknan mikejo. Daw kayo et shima kantina jet kayo panongkal ni osalen jo ngo.’ 10Nem idi dimaw da iren en menongkal, mimotok ali sota dakin mengesawa, jet sota ira memeshikit ta nansagana, si‐karay ekidaw so nonta daki shima pankasalan to. Jet idi simekep ma ira nodta baley, naydekeb ngo mala sota sakepan. 11Idi naksheng ma iyay, sota ira memeshikit ta eg nansagana, mimotok ngo ma ira di, jet kowan sha ey, ‘Apo! Apo! Ilo‐kati jokami!’ 12Nem kowan nonta dakin mengesawa son si‐kara ey, ‘Say agpayso, enshiy biyang ko son si‐kayo.’ ” Sajay i arig ga inkowan nen Jesus jet intoloy ton kowan to ey, 13“Isonga say kowan ko son si‐kayo, mesepol la esagana kayo ni olay, ta eg jo amta sotan alin akew ja idaw ko di.”
14Wara pay i inkowan ton arig say man‐edisto sota ira too to ni eg to pay laeng ali imotok, ja kowan to ey, “Waray sakey ya baknang ja ẃaray daẃan ton nay‐araẃin ili, isonga inpa‐odop to ira di sota baga‐en to jet inpiyal to sota ira kokowa to son si‐kara. 15Sota sakey, in‐aknan to ni dimen dibo, jet sota maykadẃa, in‐aknan to ni showen dibo, jet sota maykatdo, in‐aknan to ngo ni sandibo, ta say in‐akan to son si‐kara, sota mebedin na kabaalan shen ibiyaki, asan ka‐edaw shi daẃan to. 16Jet sota in‐aknan to ni dimen dibo, dimaw wa shagos ja to inbiyaki, jet nandobli sotan na pilak. 17Sota showen diboy ineẃat to, to inbiyaki ngo jet nandobli sotan na pilak. 18Nem sota sandiboy ineẃat to, to in‐emot ja inbeka sotan na pilak ni apo to. 19Idi edabas day ebayag ga timpo, sota apo ira nonta baga‐en, mimotok ali jet to tinonton sota pilak ja inpiyal to so nonta ira baga‐en to. 20Jet sota in‐awatan to so ni dimen dibo, dimaw ali ja inta‐jon to sota dimen dibo ja inbiyaki‐an to, jet kowan to so nonta apo to ey, ‘Apo, sota dimen dibo ja in‐awat mo son si‐kak, nak inbiyaki jet nandobli.’ 21Jet sota apo to, kowan to ey, ‘Siya, mapteng i dingkam; mebedin ken mepiyal la baga‐en ko. Kaka mepiyal la mengimanshal ni otik ka banag, isonga niman, ebadeg i ipiyal ko son si‐kam ma imanshal mo. Kala, mayda‐kam ka ja meki‐imdeng son si‐kak shi baley ko.’ 22Jet sota showen dibo i ineẃat to, dimaw ngo ali, jet kowan to son apo to ey, ‘Apo, sota in‐awat mo son si‐kak ja showen dibo, nak inbiyaki jet nandobli.’ 23Jet kowan nonta apo to ey, ‘Siya, mapteng i dingkam; mebedin ken mepiyal la baga‐en ko. Kaka mepiyal la mengimanshal ni otik ka banag, isonga niman, ebadeg i ipiyal ko son si‐kam ja imanshal mo. Kala, mayda‐kam ka ja meki‐imdeng son si‐kak shi baley ko.’ 24Sota sandibo ngoy ineẃat to, dimaw ngo ali jet kowan to son apo to ey, ‘Apo, amtak ey si‐kam ket palado ken too, ta angken sota aliẃen molam, moka pan‐epita, jet angken sota in‐obda‐an ni eshom, moka pay kepan‐al‐a. 25Isonga etakotak jet nak inbeka ja in‐emot sota pilak ka inpiyal mo son si‐kak. Iyay, jet alam ta kokowam.’ 26Nem sota apo to, sinongbatan to ja kowan to ey, ‘Si‐kam, enshiy am‐amtam, esarot ka! Amtam met gayam ey naka pan‐epita i angken aliẃen molak, tan naka pan‐al‐a i in‐obda‐an ni eshom. 27Jet apay nga eg mo inbangko itan na pilak, say niman alin inmotok ko, ẃaray eẃaten kon patang to? 28Alejo ita pilak ka inpiyal ko son si‐kato, jet i‐kan jo so nonta toon kawad‐an ni dimen dibo! 29Ta sota ira ẃa‐ẃa‐sha‐anan, may‐aknan pay, say eshakel la pasiya i si‐kato. Nem sota ootik anan, angken sota oltimon ẃara son si‐kato, ma‐da pay. 30Jet sotan na baga‐en ja enshiy silbi to, iteknal jo shima embolinget, jet shiman, mannengnengis i totoo, tan panngedetnget shay sangi sha ni digat sha!’ ” Sajay i arig ga inkowan nen Jesus.
31Kowan to pay ey, “Sota timpon idaw mowan ali nonta kowan ni para padto ey Anak ni Too, ondaw ali ja inges tos Apo Shiyos. Emin sota anghil, may‐odop ali son si‐kato, jet isaad toy pantoshay to ja enshiy to kay‐ingesan. 32Sotan alin timpo, emin na totood ka‐ili‐ili, mesa‐nop ired sango‐an to, jet pandinasin to ira, ja inges toy kepesing nonta emanbantay ni kalniro, ja toka idasin ira sota kanshing so nonta ira kalniro to. 33Jet say pesing nonta kowan ni para padto ey Anak ni Too, isingpet ton ipiig sota kalniro to shima petek ni kanawan to, nem sota kanshing, ibiyang ton idasin shima petek ni kanigid to. 34Jet sota ari, ikowan to so nonta ira insingpet ton ẃara nodta petek ni kanawan to ey, ‘Kalejo, si‐kayon kinaasi‐an nen Amak! Si‐kayoy mayda‐kam ja mekiteẃid shima pantoshayan nen Apo Shiyos; naysagana ngo eshan para son si‐kayo nonta eg pay laeng epalsowa iya dobong. 35Kaasi‐an tokejo, ta nonta naka man‐ekang, pinekan jowak, tan nonta na‐keẃak ni shanom, inpan‐inom jowak; nonta dimawak shi ili jo ja enshiy amtak ja pan‐iyanan ko, sinintil jowak; 36jet nonta enshiy barok, binesho‐an jowak; nonta nansakitak, jowak binisita, asan nonta naybaloshak, jowak inon‐an.’ 37Jet sotan iren ineẃat ni ari, onsongbat ira ja kowan sha son si‐kato ey, ‘Apo, enshi met i amta min mi dingka so ira niya kowan mo ey pinekan mika nonta na‐agang ka, ono inpan‐inom mika nonta na‐kew ka ni shanom. 38Enshi met i amta min misoka sinintilan, ono misoka binesho‐an. 39Enshi met i amta min misoka binisita‐an ni insakit mo ono inkabedod mo.’ 40Jet onsongbat sota ari ja kowan to ey, ‘Podno iya ikowan ko son si‐kayo. Sajay den inkowan ko, dingkayo so ira nonta kabeba‐an na kait ko, jet maybidang ey si‐kak i dingka‐an jo so nontan.’ 41Jet ikowan nonta ari ngo so nonta ira inbiyang ton ẃared petek ni kanigid to ey, ‘Ki‐nan kayod ja kad‐an ko! Meshosa kayo shima apoy ya shalang to ni olay ingkatod ingka! Sajay i naysagana para so nen Satanas, pati sota ira betkag ton anghil. 42Sajay i pesing ko ta eg jowak kinaasi‐an. Nonta naka man‐ekang eg jowak pinekan, nonta na‐keẃak ni shanom eg jowak inpan‐inom, 43nonta dimawak shi ili jo, ja enshiy amtak ja nak pan‐iyanan eg jowak sinintil, nonta enshiy barok eg jowak binesho‐an, nonta naka mansekit tan nonta naybaloshak, eg jowak binisita.’ 44Jet onsongbat ngo ira ja kowan sha ey, ‘Apo, enshi met i amta min mi so in‐owayan son si‐kam ni inka‐akang mo, ono inka‐kew mo ni shanom, ono sota kowan mo ey enshiy amtam ma pan‐iyanan mo, ono enshiy barom, ono insakit mo, ono inkabedod mo!’ 45Jet songbatan to ngo ira ja kowan to ey, ‘Agpayso iya ikowan ko son si‐kayo. Sota eg jo so insintil so ira niya kabeba‐an na kait ko, maybidang ey si‐kak i eg jo sinintil.’ 46Jet sajay ira, meshosa ira shima shosa‐an ingkatod ingka. Nem sota ira ineẃat to, may‐aknan ira ni biyag ja enshiy to engintegan.” Kowan nen Jesus.
Valið núna:
San Mateo 25: DMP
Áherslumerki
Deildu
Afrita
Want to have your highlights saved across all your devices? Sign up or sign in
© 1978, Wycliffe Bible Translators, Inc. All rights reserved.