Malika 15
15
Jesụ ịkutwalịgwa nkyenị mwa Pịlāti
(Mat. 27:1-2,11-14; Luk. 23:1-5; Joh. 18:28-38)
1Nakalīnga ịtolo bo bukị̄le bolubūnju, po papo abapụ̄tị abakulūmba balinkujobana namafụmụ, nabamanyakalata, nulukomāno lōsa, balinkumpịnya Jesụ, balinkummwega balinkwakummbīka mmaboko ga Pịlāti. 2Po papo Pịlāti alinkunndālūsya alinkuti: Gwe malafyale gwa Bajụ̄ta ugwe? Umwene Jesụ alinkwamụla alinkuti: Bo lilyo kujoba. 3Po papo abapụ̄tị abakulūmba balinkummohela sị nyịngị ịtolo. 4Po papo Pịlāti alinkundālūsya kangi alinkuti: Utịkwamụla nasịmo? Kēta nyịngị ịsị bịkukōhela. 5Umwene Jesụ alinkusịta nukwamụla nalịmo. Po papo Pịlāti alinkwenda nukuswịga.
Jesụ alōngīgwe ukuti afwege
(Mat. 27:15-26; Luk. 23:13-25; Joh. 18:39—19:16)
6Bwịla pakyaka ali nulwịho ulwa kubābulila jumo ugwa nnyololo, uju linga bansūmịle. 7Lelo alịpo jumo uju āli jo Balaba īngamụ, jo āpịnyị̄gwe lumo nabalūndulanịakị̄su, aba bābōmbịle isya bugogị nkulūndukana kwabo. 8Po papo ikilūndilo kilinkufyuka kumyake, kilinkunsūma Pịlāti ukuti ababōmbelege bo apa ị̄sịbị̄le bwịla. 9Umwene Pịlāti alinkubāmbilila alinkuti: Mụkulōnda ukuti mbābulilege Umalafyale gwa Bajụ̄ta? 10Namanga āsyagēnịe ukuti abapụ̄tị abakulūmba bālintwele kumyake kunōngwa ja kabịnị. 11Abēne abapụ̄tị abakulūmba balinkubasōnga abāndu ukuti bansūmege pịlāti, ukuti abābulilege Balaba. 12Umwene Pịlāti alinkwamụla kangi, alinkujoba nabo alinkuti: Lelo ndubulege nagwe uju mụkuti jo malafyale gwa Bajụ̄ta? 13Balinkujwega kangi balinkuti: Nkomele pakikohekano. 14Umwene Pịlāti alinkubalālūsya alinkuti: Fịkị, abōmbịle mbị̄bị ngị? Po abēne balinkukīndilila ukujwega balinkuti: Nkomele pakikohekano. 15Lolị papo Pịlāti ālōndaga ukukikyela ikilūndilo, alinkubābulila ju Balaba. Umwene Jesụ bo akomị̄gwe nifịkotị, Pịlāti alinkubapa ukuti akomelịgwege pakikohekano. 16Po papo abasịkali balinkubūka nagwe ndupaso ulu lwali nyụ̄mba ja bulindililakị̄su, balinkukibunganịa ikilūndilo kyosa kya basịkali. 17Balinkumfwīka unselekesye umfụbīfụ ubutị̄tu, balinkuluka īngiga ja mīfwa, balinkumfwika pantu; balinkwenda nukummponịa balinkuti: 18Tukukuponị̄a gwe malafyale gwa Bajụ̄ta. 19Balinkunkoma nulutete pantu, balinkunswela namata, balinkufụgama pāsi nukumbụngụlụkila. 20Lelo bo bamwangalịle po papo balikumfụ̄la unselekesye umfụbīfụ ubutị̄tu gula, balinkumfwika imyenda gyake. Balinkusōka nagwe pānja, ukuti bakankomelege pakikohekano.
Jesụ ịkukomelịgwa pakikohekano
(Mat. 27:32-44; Luk. 23:26-43; Joh. 19:17-27)
21Balinkunkola umwendanjila jumo uju afụmịle kunngūnda, Sịmonị ugwa mụ Kịlene ugwịse gwa Alịkịsanda na Lụfụ ukuti ampīmbilege ikikohekano kyake. 22Balinkwakufịka nagwe pabujo ubu bạ̄tigi Golịgata. (Ko kuti palupaja) 23Balinkunnị̄nga ubwalwa bwa māfị̄lu ubu bwalyongene na mịla; lolị alinkukāna ukunwa. 24Po papo balinkunkōmela pakikohekano balinkujabana imyenda gyake, balinkubīka ubulagusị ukuti uju ịkwegaga giliku. 25Kāli kabalilo ka butatu apa bankomelaga pakikohekano. 26Bwalịpo ubusị̄mbe bwa nōngwa jake pamwanya, ubu bwasị̄mbị̄gwe bwatịle: UMALAFYALE GWA BAJỤ̄TA. 27Palikimo nagwe balinkugikomela iminyāmbụta mịbili, limo kukị̄lị̄lo ilīngi kukị̄mama. [ 28Ko kwịsa sịsịle isị kalata ājobaga ukuti: Balimmōngēnịe nabị̄langomēlesyo.] 29Naba bākīndaga papo balinkunhēlula balinkusụkānịa imịtu gyabo balinkuti: Oho! Gwe mpāngulanyūmba ja NTWA nukujēnga kumasịku matatu. 30Ị̄poke gwịmwene lelo, ịka pakikohekano: 31Bunobuno bope abapụ̄tị abakulūmba pamopēne na bamanyakalata balinkōmolelanịla balinkuti: Abāngi ābapokaga lolị umwene akabagila ukwịpoka. 32Kilisịtị umalafyale gwa Ịsịlaelị, asụlụkege lelo ukufụma pakikohekano, ukuti tukētege twendege nukwịtika. Bope nabala bakomelịgwe lumo nagwe balinkuntuka.
Ukufwa kwa Jesụ
(Mat. 27:45-56; Luk. 23:44-49; Joh. 19:28-30)
33Lelo pamụ̄sị pakabalilo ka ntandutu īngị̄sị jilinkugwa pakị̄su kyosa, ukufịka pakabalilo ka buhāno na buna. 34Pakabalilo ka buhāno na buna, Jesụ alinkukụ̄ta ilịsyu ilịkulūmba, alinkuti: Eloi, Eloi Lama sabakatanị, ko kuti: Gwe Kyala gwangu, gwe Kyala gwangu, undekīle fịkị? 35Bamo aba balyimịle pāpo bo bapilị̄ke balinkuti: Kēta ịkummbilikila Elịja. 36Po papo jumo alinkubopa alinkujubika īsịponjị mwa āsịkị, alinkufyika kulutete alinkunnwesya, alinkuti: Nndeke tukēte linga Elịja ịkwịsa kukunsụlụsya. 37Umwene Jesụ alinkukụ̄ta ilịsyu ilịkulūmba alinkusịlīlika. 38Po papo ilịbālika lya nnyụ̄mba ja NTWA lilinkutāfụkana pakāti, ukufụma kumwanya ukwakufịka pāsi. 39Umwene unndōngosị gwa basịkali uju ālyimịle nukunịngana nagwe, bo ammbwene mụno asịlilikilaga, alinkuti: Nalolị umụ̄ndu uju ali Mwana gwa Kyala.
40Bālipo pāpo bope abakị̄kulu aba bākētaga pabutalịpo; nkịlūndilo kyabo ālimo Malịja gwa mụ Magatala, na Malịja unnabo ba Jakobụ unnāndi na Jose, alịpo na Salome, 41aba bankōngaga nukummbōmbela bo ali mụ Galịlaị; nabāngi ba bị̄ngị ịtolo aba bafyukịle nagwe mụ Jelụsalemụ.
Ukusyilịgwa kwa Jesụ
(Mat. 27:57-61; Luk. 23:50-56; Joh. 19:38-42)
42Lelo bo bwịlịle namajolo, namanga lyali ịsịku lya kwịtendekesya, ko kuti ilya kulēmbukila pa sabāti, 43po papo alinkwịsa Josefụ ugwa mụ Alimateja, umụ̄ndu gwa ndukomāno umwimikịgwa, uju jope ābugụ̄lilaga ubutwa bwa Kyala, alinkukịba alinkubūka alinkwakwịngila kwa Pịlāti, alinkugusūma ummbili gwa Jesụ. 44Umwene Pịlāti alinkuswịga bo ịkuti afwịle lị̄tāsị; bo ammbilikị̄le unndōngosị gwa basịkali, alinkunndālūsya linga afwịle lị̄tāsị. 45Lelo bo asyagēnịe ukufụma kunndōngosị gwa basịkali, po papo alinkumpa Josefụ umfị̄mba. 46Alinkwakūla umwenda umwelụ, lelo bo ansụlwịsye, alinkuniembetēlela mmwenda gula, alinkumbīka mwịpūmba ili lyasongolị̄gwe ndwalabwe, alinkubụngụlụkisyapo ilị̄bwe pakifịgo kya ịpūmba. 47Abene ba Malịja ugwa mụ Magatala na Malịja unna gwa Jose, balinkupabona apa abikīgwe.
Valið núna:
Malika 15: NYB96
Áherslumerki
Deildu
Afrita
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.