Luka 24
24
Ukusyuka
(Mat. 28:1-10; Mali. 16:1-8; Joh. 20:1-10)
1Nulubūnju fị̄jo pa Nndūngu abakị̄kulu balinkubūka kwịpūmba, mmaboko bākolị̄le imịkota igi bātendekị̄sye. 2Balinkwāga ilị̄bwe lisegulị̄gwe ukufụma pakifịgo kya ịpūmba, 3po papo balinkwingila mwịpūmba; lolị balinkusịta kugwagamo ummbili gwa NTWA Jesụ. 4Lelo bo sịbālāngēnịe bịkwịlūsānia balinkunyomoka abāndu babili bīmịle pabupị̄pị nabo, bafwele imyenda igi gịkulāngala ubwelụ; 5bo ulutēnde lubakomịle fị̄jo abakị̄kulu bala, balinkwịnama pāsi bo abāndu bala bịkujoba nabo bịkuti: Nōngwa jafịkị mụkunndōnda umūmị mmbafwe? 6Mụkūmbukege mụno Jesụ ābabūlị̄le bo akāli ali mụ Galịlaị, 7ukuti fịkuti Nnyamụ̄ndu apēgịgwege mmaboko ga batulanōngwa, akomelịgwege pakikohekano, po kangi pị̄sịku lya butatu asyukege. 8Po papo balinkwenda nukukūmbuka amasyu gāke, 9lelo balinkusụmụka ukufụma kwịpūmba balinkwakubabūla syosa sịsịsị kalōngo najumo bala na bāngi bōsa. 10Abakị̄kulu bababa bāli bo bā Malịja ugwa mụ Magatala, Johanị, na Malịja unna gwa Jakobụ nabakị̄kulu abāngi aba bāli pamopēne nabo; bo aba bābabūlịle abatumịgwa īnōngwa sịsịsị; 11lolị lelo amasyu gagaga abēne balinkugabona ukuja ga sūnga ịtolo, balinkusịtakugị̄tika. 12Lolị Petelị jo alinkusụmụka alinkubopa ukubūka kwịpūmba; bo ị̄nēme ịkukēta nkāti mwịpūmba, alinkugibona gyene gimyenda igi ālāmbalēlepo; po papo alinkubūka kukāja, kuno bo ịkuswịga kuli isị syabonị̄ke.
Injila ja kubūka ku Emausị
(Mali. 16:12-13)
13Pị̄sịku lilyo lilalila aba bankōngaga Jesụ babili bābūkaga kukāja kamo akanāndi aka bātigi Emausị īngamụ, aka tutigi kali amaịlo mahāno na mabili ukufụma mụ Jelụsalemụ, 14lelo bo bịkwenda balinkujoba syosa isị syabonị̄ke. 15Lelo bo bịkujoba nukwananịa, Jesụ jūjo alinkusegelela alinkulōngosanịa nabo; 16bālimmbwene lolị bakālimmwagēnịe bunụnụ. 17Jesụ ābalālūsịsye ātịle: Go masyu makị aga mụkwamụlana bo mụ kwenda? Balinkwenda nu kwima, ifyenị fyabo filinkwị̄luka kunōngwa ja busụlụmanịe. 18Lelo jumo mụli balabala, uju īngamụ jake āli jo Kilyopa ālimmwamwịle ātịle: Ugwe gwe nhēsya gwịmwene mụ Jelụsalemụ, gwe ukasịmanya isị syalịmo mmasịku amanāndi aga gakīndịle? 19Ābamwịle ātịle: Isya fịkị? Balimmbūlịle bātịle: Isya Jesụ gwa mụ Nasaletị, unsololị uju āli gwamaka mụmbōmbo na mwịsyu nkyenị mwa Kyala na nkyenị mmbāndu, 20isị abapụ̄tị bītu abakulūmba nabalagilị bābanị̄ngịle abakunndōnga ukuti agogịgwege, balinkunkōmela pakikohekano. 21Lolị uswe twasūbilaga ukuti umwene jo āli gwa kummbānga Ịsịlaelị. E, pamwanya pali syosa sịsịsị lilino lyo ịsịku lya butatu ukufụma apa syabonekị̄le. 22Isị̄ngị syo syakuti, abakị̄kulu bamo nkilūndilo kyitu batunyomwịsye, Bālabile kwịpūmba, 23lolị bakāgwagịle ummbili gwake; balinkugomoka balinkuti bope nabāndumị babasetukị̄le, bo aba bajobịle ukuti asyukịle. 24Bamo aba twali nabo pamopēne bābūkịle kwịpūmba, balinkwakusyaga bo mụmo bājobị̄le abakị̄kulu; lolị umwene jo bakālimmbwene. 25Po papo alinkubabūla alinkuti: Mwe bāndu mwe bakonyofụ umwe. Mwe basịto īndụmbụla ukwịtika syosa isị bājobịle abakụ̄ngụlụka! 26Kukabagị̄le ukuti fịkuti Kilisịtị akubilwege syosa sịsịsị napo ị̄ngilege mbukulūmba bwake? 27Po papo ukufụma pa Mose na bakụ̄ngụlụka bōsa alinkubalingānịa syosa isị sịsị̄mbị̄gwe mwa bakalata isị sịkūnjoba umwene.
28Lelo bo basegelị̄le kukāja aka bālabilangako, Jesụ alinkufwana ịkukīsanịa; 29lolị balinkumfịmbilisya balinkuti: Usyale nanụswe papapa, ilị̄suba lịkuja pakujōnga bwịlịle. Po papo alinkwịngila nnyụ̄mba alinkutūgala nabo. 30Lelo bo ịkulya nabo ifị̄ndu, alinkwega ikisyesye alinkukisaja, alinkumenyanịa alinkubapa. 31Po papo amāso gābo galinkwịguka balinkummanya; umwene alinkwenda nukubelanịka bo bịkukēta. 32Balinkubūlana balinkuti: Bule gukāfwene mōto gụkwaka mụndụmbụla syitu bo ịkujoba nanụswe mụnjila nukutulīngānịa īnōngwa sya Kyala isị sịli mwa bakalata? 33Po papo balinkusụmụka akabalilo kalakala balinkugomoka ukubūka mụ Jelụsalemụ; balinkubāga kalōngo najumo bala babūngēne, pamopēne naba bali nabo, 34aba bajobịle bātịle: UNTWA asyukịle nalolị, abonị̄ke na kumāso kwa Sịmonị! 35Po lelo balinkupānga isị syabonị̄ke mụnjila na mụno balimmanyịle bo ịkumenyania ikisyesye.
Jesụ ịkubasetukila abafụ̄ndịgwa bāke
(Mat. 28:16-20; Mali. 16:14-18; Joh. 20:19-23; Batu. 1:6-8)
36Lelo bo babīli bala bo balipakupānga sịsịsị, nakalīnga ịtolo balinkunyomoka UNTWA jūjo īmịle pakāti pamyabo ịkujoba nabo ịkuti: Ulutengano lujege na nụmwe. 37Lolị abēne balinkunyomoka, lulinkubāga ulutēnde, abēne bịnogonaga ukuti bammbwene unsyuka. 38Po papo umwene alinkujoba nabo alinkuti: Mụkutēnguka fịkị mụ̄nda, nōngwa jafịkị sịkubị̄sila isya kwịlāmwa mụndụmbụla syinụ? 39Amụ̄ngēte mmaboko na mmalūndi, mụsyagēnịe ukuti jo une nalolị; mbalamāsya mụkēte, namanga unsyuka akaja nummbili, akaja nịfịfụpa bo ifị mụkufịbona ifị ndinafyo une. 40Ājobịle sịsịsị nukubanāngisya amaboko gāke ninjajo syake. 41Pope sịkabakolịle, namanga ulusekelo lwabatolịle, balinkuswịga, umwene alinkubalālūsya alinkuti: Bule muli nafyo fịmo ifyakulya papapa? 42Balinkwenda nukunnị̄nga ikimēnya kyanswi īmbị̄je, 43kyo alinkwega alinkulya bo bịkukēta.
44Lelo po alinkubabūla alinkuti: Isị syo sịsyo isị nābabūlịle bo ngāli ndi nanụmwe; syosa isị sịsị̄mbị̄gwe isị sịkūnjoba une mụngomēlesyo sya Mose, mbusị̄mbe bwa bakụ̄ngụlụka na musabulị sya bany'Ịsịlaelị sībagị̄le ukuboneka nalolị. 45Lelo alinkwenda nukubị̄gula imịtu gyabo ukuti basyaganịe īnōngwa sya ịbāngilị, 46alinkubabūla alinkuti: Isị syo isị sịsị̄mbị̄gwe ukuti: Fịkuti Kilisịtị akubilwege kangi fịkuti asyukege ukufụma mmbafwe pị̄sịku lya butatu, 47ukuti ulupīnduko nubuswe bwa mbị̄bị fịfụmụkisịgwege mụngamụ jake kufịkolo fyosa ukwandila mụ Jelụsalemụ mụno. 48Umwe mụli basịsịmikisị ba nōngwa sịsịsị. 49Po lelo une nịsakubatumilaga ifị Tāta āfị̄ngịle ukubatumila. Lolị umwe fịkuti mụgụ̄lilege mụ nkāja akakulūmba mpaka papo amaka amafụma kumwanya gisakubị̄silaga.
Jesụ ịkwegịgwa ukubūka kumwanya
(Mali. 16:19-20; Batu. 1:9-11)
50Lelo po papo alinkusōka nabo nkāja akakulūmba alinkubūka nabo mụ Betanịja mo alinkwakwịnula amaboko gāke alinkubasaja. 51Lelo bo ali pakubasaja alinkwenda nukubaleka alinkwegịgwa ukubūka kumwanya. 52Abēne balinkwịpụ̄ta kumyake, balinkugomoka ukubūka mụ Jelụsalemụ nulusekelo ulwịngị fị̄jo, 53balinkuja mụ mụnyụ̄mba īnyị̄kemo bwịla, balinkuntụ̄fya Kyala.
Valið núna:
Luka 24: NYB96
Áherslumerki
Deildu
Afrita
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.