Luka 1
1
1Gwe Mwimikigwa Tyofịlị: Abāndu bị̄ngị bị̄jūlịle ukusị̄mba isị basịbwene sịsịsị ukubōmbịgwa mmyitu. 2Basị̄mbịle isị tubūlị̄gwe nāba bāsịbwene ukufụma mụ mbwandilo, aba bāfụmụsyaga īndumị jijiji. 3Po lelo gwe mwimikịgwa, kunōngwa jakuti īnōngwa sịsịsị nsyenēsị̄sye ukufụma bo sịkwanda, nāgịle kunụnụ ukukusị̄mbila isị sịbạ̄tikị̄gwe. 4Mbōmbịle sịsịsị ukuti ubumanye ubwanalolị bwa syosa isị umanyịsị̄gwe.
Ukupāpịgwa kwa Johanị umōsị nukufụmụsịgwa
5Mmasịku ga Helotị, umalafyale gwa kị̄su kya Jụ̄ta, āliko umpụ̄tị jumo uju īngamụ jake āli jo Sakalịja ugwa nkilūndilo kya banya Abịja pakabōmbo; āli nunkasị gwa nkikolo kya Alonị, īngamụ jake āli jo Elịsabetị. 6Bo babīli bāli bagolofụ nkyenị mwa Kyala, bēndaga mụ̄ndagilo na mụngomēlesyo sya NTWA syosa, kisịta ịnona nalịmo. 7Lolị bakāli na mwana najumo papo Elịsabetị āli nngūmba, kangi bo babīli bākāngēle.
8Mwịsịku limo, lumo Sakalịja ālipakubōmba īmbōmbo jabupụ̄tị nkyenị mwa Kyala ndubạ̄tiko lwa kijabo kyake nnyụ̄mba īnyị̄kemo, bo akabalilo kāke ka mbōmbo kafikile, 9ukukōngana nulwịho mụno bābōmbelaga abapụ̄tị, ubulagusị bwalinkolịle ukufụ̄kisya pakigemo kya kwịkemēkesyapo. Po papo alinkwịngila nnyụ̄mba īnyị̄kemo ja Ntwa, 10bo ikilūndilo kya bāndu pānja kịkwịpụ̄ta pakabalilo ka kufụ̄kisya. 11Po papo alinkunsetukila ugwandumị gwa NTWA, alinkwima kulubafụ lwa kukị̄līlo lwakigemo kya kufụ̄kisyapo. 12Po papo Sakalịja alinkunyomoka bo ammbwene, ulutēnde lulinkummwaga. 13Lolị ugwandumị alinkumbula alinkuti: Ungatetemaga, Sakalịja, ulwịpụ̄to lwako lwambililị̄gwe, unkasịgo Elịsabetị ịkukupāpilaga umwana unndumyana, jo kwịsakumpaga īngamụ ja Johanị. 14Po kwịsakusekelaga nukuhoboka, kangi bị̄ngị bịsakusekela bo apāpị̄gwe; 15namanga ịsakujaga mụ̄ndu nkulūmba nkyenị mwa Kyala, atịsakunwaga ubwalwa bwa māfị̄lu nabumo, bope nubwalwa ubukali nabumo, ịsakwịsulaga Mbepo Mwịkemo, ukufụma mụ mụ̄nda mụnna. 16Abany'Ịsịlaelị bị̄ngị ịsakubapīndulilaga ku Ntwa Kyala gwabo, 17kangi ịsakuntalilaga Kilisịtị ukwịsa, mụmbepo na mmaka ga Elịja, kukusịgomolela kubānābo īndụ̄mbụla sya bị̄sabo, nukubasyụtụlila ku mahala ga bagolofụ abākị̄lo, nukubabikila ngānị ku Ntwa aba bịtendekị̄sye. 18Po papo Sakalịja alinkujoba nu gwandumị alinkuti: Syo nịsakusịmanyaga bule bule sịsịsị? Namanga une ngāngēle jope unkasị gwangu nkāngale. 19Ugwandumị ālimmwamwịle ātịle: Une jo une Gabịlyelị, ne ngwīma mbujo mụno alịmo Kyala; nndumị̄gwe kukukubūla, nukukutwalila īnōngwa īnụnụ isị. 20Ukēte, kujaga kinụ̄nụ, utịkujobaga ukwịsakufịka pị̄sịku ili sịsakwịsilaga sịsịsị, papo ukāgịtikaga amasyu gangu aga gịsakwịsilaga nkabalilo kāke. 21Abāndu balinkunngụ̄lila Sakalịja, balinkunswịga ukukābila kwake nnyụ̄mba īnyị̄kemo. 22Lelo bo asōkịle, alinkutolịgwa ukujoba nabo, balinkwenda nukusyaganịa ukuti akibwene ikisetuka nnyụ̄mba īnyị̄kemo; umwene alinkubīnga kīkiboko alinkuja kinụ̄nụ ịtolo. 23Bo akabalilo ka kukotoka kị̄sịle, alinkubūka kukāja kāke.
24Lelo bo pagonịlepo Elịsabetị alinkwenda nukwịnoga umwana alinkulīnda mụ nnyụ̄mba imyesị mịhāno alinkuti: 25Lilino kūnyụma kuli syosa UNTWA angētị̄le nkisa, āsōsị̄sye īsonị kubāndu.
Ukufụmụsịgwa ukupāpịgwa kwa Jesụ
26Mmwesị gwa ntandatu ugwandumị Gabịlyelị ātumị̄gwe na Kyala ku kāja ka Galịlaị aka īngamụ jake jo Nasaletị, 27ātumị̄gwe kunndīndwana uju īngamụ āli jo Malịja. 28Ugwandumị alinkwịsa kumyake alinkuti: Ugonịle gwe ukabile ilị̄pyana, Untwa ali nanụngwe! 29Umwene alinkutēnguka fị̄jo mụ̄nda alinkwịlūsanịa alinkuti: Uluponịo ulu ko kuti fịkị? 30Po papo ugwandumị alinkummbūla alinkuti: Ungatetemaga Malịja, buno ulyagịle ilị̄pyana kwa Kyala. 31Kēta, kwịnogaga umwana, kwịsakumpapaga umwana unndumyana jo kwịsakumpaga īngamụ ja Jesụ. 32Ịsakujaga nkulūmba ịsakujobịgwaga ukuja Mwana gwa ju Nkīnde; Untwa Kyala ịsakumpaga ikikota kya butwa kya Ndabitị ugwịse, 33Ịsakulagilaga nnyụ̄mba ja Jakobụ bwịla ịtolo; ikitāngālala kyake kitịsakumalikāngamo. 34Malịja alinkujoba nugwandumị alinkuti: Syo sị̄pelege bulebule sịsịsị ne ngaja na nnyāmbala? 35Ugwandumị ālimmwamwịle ātịle: Mbepo Mwịkemo ịsakukwịsilaga, na maka ga ju Nkīndegịsakukukụpikilaga; bo buno buno lelo umwana uju ịsakupāpịgwaga ịsakujobịgwaga ukuja mwịkemo, Mwana gwa Kyala. 36Kēta ugwamyinụ Elịsabetị mbukāngale bwake jope ịnogịle umwana unndumyana; lilino umwene umwesị ugu gwa ntandatu uju bạ̄tigi nngūmba. 37Namanga Kyala sịkajako isị sịntolịle. 38Malịja ālyamwịle ātịle: Une ndi mmbōmbị gwa Ntwa asị̄sege bo mụno ujobị̄le. Po papo ugwandumị alinkusōkapo alinkubūka.
Malịja ịkubūka kukunkēta Elịsabetị
39Mmasịku gala Malịja alinkusụmụka alinkukūja ukubūka nkị̄su kya fyamba, nkāja ka banya Jụ̄ta. 40Alinkwịngila nnyụ̄mba ja Sakalịja alinkumponịa Elịsabetị. 41Lelo bo Elịsabetị apilị̄ke uluponịo lwa Malịja, umwana alinkukị̄na nndwanda lwake; po papo Elịsabetị alinkwịsula Mbepo Mwịkemo, 42alinkukōlela ilịsyu ilịkulūmba alinkuti: Uli nsajịgwa ugwe mbakị̄kulu bōsa kangi sajịgwa ni mbejụ iji jili nndwanda lwako! 43Syo syendịle bulebule ukuti īngulūmba sịsịsị sị̄nyāgege une, ukuti unna gwa NTWA gwangu ị̄sege kukūngēta une? 44Ukēte, bo mbilị̄ke ukūmbonịa umwana nndwanda lwangu alinkukị̄na nulusekelo. 45Nsangalufụ fị̄jo uju ikwịtika ukuti īndumị iji akutumị̄le ugwe UNTWA jịsakwịpelaga ja nalolị!
Ulwimbo lwa Malịja lwa Lutụ̄fyo
46Malịja alinkujoba alinkuti:
Īndụmbụla jangu jịkuntụ̄fya UNTWA.
47Umōjo gwangu gụkusekela
kunōngwa ja Kyala Umpokị gwangu,
48Namanga āngūmbwịke, une,
ne mmbōmbị gwake ne ngaja mụ̄ndu mwene.
Ukwanda lilino abāndu bōsa
bịkunjobaga ukuja nsangalufụ,
49kunōngwa ja mbōmbo īngulūmba
isị Kyala Umwenemaka gōsa āmbōmbị̄le une.
Īngamu jake nyịkemo.
50Mụngulilo syosa ịkunāngisya ikisa kyake
kuli aba bịkummwimika.
51Agolwịsye ikiboko kyake kya maka
abapalagẹ̄nị̄e abamatīngo
pamopēne naisị bikulōnda ukubōmba syosa.
52Abasụlwịsye abanyafyale ba maka
pafịkota fyabo fya butwa,
abị̄nwịle abāpāsi.
53Abānjala abịsukị̄sye īmboto
abakabị abakagịle kisịta kubapa nafịmo.
54Akị̄bwa ulufị̄ngo ulu,
āfị̄ngịle na banyēnya bītu,
kangi antūlịle ummbōmbị gwake Ịsịlaelị.
55Akūmbwịke ukunnāngisya ikisa Abụlahamụ
nabankikolo kyake bōsa bwịla na bwịla.
56Malịja alinkutūgala na Elịsabetị imyesị mịtatu napo alinkugomoka ukubūka kukāja kāke.
Ukupāpịgwa kwa Johanị umōsị
57Akabalilo kalinkwịsa akākupāpila umwana Elịsabetị, alinkupapa umwana unndumyana. 58Abapalamanị bāke na bakamụ balinkupilika ukuti UNTWA ammbōmbị̄le ikisa ikikulūmba Elịsabetị, po papo bōsa balinkusekela nagwe. 59Pị̄sịku lya lwele balinkwịsa kukummbūta kukyenị umwana; bālōndaga ukumpa īngamụ ja gwịse, ija Sakalịja, 60lolị unna ākānịle ātịle: Jomma jijijo; ịkujaga jo Johanị. 61Balinkummbụ̄la balinkuti: Akajako najumo ugwa nkikolo kyako uju ịkujobịgwa jijiji. 62Po papo balinkuntịnila ugwịse ukunndālūsya īngamụ iji ālị̄ganịle ukumpa umwana. 63Sakalịja ēnda nukusūma akā kusịmbapo, āsị̄mba ạ̄ti: Īngamụ jake jo Johanị. Bōsa bāswịgịle fị̄jo. 64Nkabalilo kalakala unndōmo gwake gulinkwịguka ululimị lwake lulinkwabuka alinkujoba kangi, alinkuntụ̄fya Kyala. 65Abapalamanị bōsa lulinkubāga ulutēnde, īnongwa sịsịsị sịlinkukwila mōsa nkị̄su kya fyamba fya mụ Jụtaị. 66Umụ̄ndu gwesa uju āsịpilị̄ke alinkusị̄nogona alinkulālūsya alinkuti: Umwana jujuju kali ịkujaga bo bulebule? Namanga syali pabwelụ ukuti amaka ga NTWA gāli pamyake.
Ubusololị bwa Sakalịja
67Po papo Sakalịja, ugwịse, alinkwịsula Mbepo Mwịkemo, alinkukụ̄ngụlụka alinkuti:
68Atufịgwege UNTWA, Kyala gwa Ịsịlaelị!
Abatūlịle abāndu bāke, abābwịle.
69Atwimikị̄le Umpokị ugwa maka,
ugwa nkikolo kya mmbōmbị gwake Ndabitị,
70Ịjolo āfị̄ngịle ulufị̄ngo mbakụ̄ngụlụka bāke
abị̄kemo,
71ukuti ịsakutupoka ku balugu bītu,
na kumaka ga bōsa aba batubēngịle.
72Ātịle ịsakubanāngisyaga ikisa abanyēnya bītu
nukukūmbuka ulufị̄ngo lwake ulwịkemo,
73ululapo ulu ālapịle
kwa Tāta gwitu Abụlahamụ;
74āfị̄ngịle ukutupoka kubalugu bītu
nukutwịtikisya ukummbōmbela kisịta kutị̄la,
75ko kuti twịse tujege bị̄kemo
kangi bagolofụ nkyenị mmyake
mbūmị bwitu bōsa.
76Ugwe, gwe mwanāngu kwịsakujobịgwaga
ukuja gwe nkụngụlụka gwa Kyala Unkīnde,
kwịsakulongolaga nkyenị mụ UNTWA
kukuntendekekesya injila jake,
77kukubabūla abāndu bāke ukuti
bịsakupokịgwaga bo baswegị̄gwe īmbị̄bị syabo.
78Kyala gwitu ali nikisa
kangi mōlōlo.
Ịsakutupelelaga ulubūnju ulwelụ,
lwa bupokị ukuti lutubalilege,
79nukubabalila ukufụma kumwanya
bōsa aba bali mụngị̄sị ja bufwe,
ukugatalukisya mụnjila ja lutēngāno
amalūndi gītu.
80Umwene umwanịke alinkwenda nukukula alinkukaka mụmbepo, alinkuja mụ mmatēngele ukwịsakufika pị̄sịku lya kwịbonesya kwake kwa Ịsịlaelị.
Valið núna:
Luka 1: NYB96
Áherslumerki
Deildu
Afrita
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.