Ubwandilo 7
7
Umwelēsyo
1Po papo UNTWA alinkummbūla Nwaka alinkuti: Ị̄ngilaga mụngalaba, ugwe na bannyụ̄mba jāko bōsa, papo jo jujugwe gwịmwene, gwe ngubwene ukuja mụ̄ndu unngolofụ mmbāndu ba lilino aba 2Mfịnyamāna fyosa ifị abāndu bịkulya, gwegepo ifịkolo fihāno na fịbili fịjege fịbili fịbili, ikinyāmbala ni kikị̄kulu; lolị ifị abāndu batịkulya fyo ufyegege fịbili ikinyāmbala nikikị̄kulu. 3Syope ni njunị sya mụmpālānga usyēge ifịkolo fịhāno na fịbili, sịjege mbubili mbubili, inyāmbala ni ngị̄kulu, kokuti uluko lwabo lwendelelege pakị̄su. 4Gasyele amasịku mahāno na mabili ịtolo, po nịkutumaga īfụla pakị̄su, jisakutịmaga amasịku amalōngo mana (40) pamụ̄si na pakilo, po nịsakukapyụtaga akāndu kōsa akābūmị aka mbelịle pakị̄su. 5Po papo Nwaka alinkusịbōmba syosa bo mụmo UNTWA alinndagilị̄le.
6Umwene Nwaka āli nifyinja bāmịa ntandatu (600) lula umwelēsyo gwịsege pakị̄su. 7Po papo Nwaka pamopēne na bānāke nu nkasị kangi na bakasị ba banāke balinkwịngila mụ ngalaba ukuti baponege ku mwēlēsyo. 8Ifịnyamāna ifị bịkulya na ifị batịkulya, injunị kangi na kāndu kōsa aka kịkwendela ulwanda, 9fịlinkwịngila nagwe Nwaka mụ ngalaba fịbili fịbili, ikinyāmbala ni kikị̄kulu, bo mụmo Kyala ālinndagilị̄le Nwaka. 10Lelo bo gakīndịlepo amasịku mahāno na mabili, umwelēsyo gulinkufịka pakị̄su.
11Nkyinja kya bāmịa ntandatu (600) ikya būmị bwa Nwaka, mmwesị gwa bubili, pị̄sịku lya kalōngo namahāno na mabili (17), po īnyị̄buko syosa isya fịsịba ifịkulūmba ifya mbusolofụ sịlinkwịguka, ni nyị̄gị sya kumwanya syope sịlinkwịguka. 12Īfụla jilinkutịma pa kị̄su amasịku amalōngo mana (40), pamụ̄si na pakilo. 13Mwịsịku lila Nwaka alinkwịngila mụ ngalaba pamopēne na banāke. Syemụ, Hamụ na Jafetị kangi nu nkasị gwa Nwaka na bakasị ba bānāke batatu. 14Balinkwịngila nafyo nifịnyamāna fyạ nndị̄su uluko nu luko, ing'ōmbe nu luko lwake nifị fịkwendela ulwanda fyope nnduko lwake ni njunị syope uluko lwake. 15Fịlinkwịngila pamopēne na Nwaka fịbilifịbili, fyosa ifya mmbili ifị fịli nu mūji; ikinyāmbala ni kikị̄kulu, ukukōnga bo mụmo Kyala ālindagị̄le Nwaka. 16Fịlinkwịngila ifịnyāmbala ni fikị̄kulu fyosa ifya mmbili bo mụmo Kyala ājobị̄le. Po papo Kyala alinkwịgalako.
17Ugwene umwelēsyo gulinkwendelela pakị̄su amasịku amalōngo mana (40) gōpe amīsi galinkwịsula: galinkujị̄nulila mmwanya īngalaba jilinkwēlēla ịtolo. 18Amīsi galinkōngelela ukwịsula galinkutēka ikị̄su kyosa, po lelo īngalaba jilinkwēlēla ịtolo pa mīsi. 19Amīsi galinkōngelapo ukwịsula pakị̄su; ni fyamba fyosa ifịtalị ifị fyalịpo pakị̄su fyalị̄bị̄le. 20Amīsi galinkukindilila ukwịsula ukufịka pa kipimo kya maboko kalōngo na mahāno; ifyamba fyosa fịlinkwịbila. 21Po papo fyosa ifya mmbili ifị fyendaga pakị̄su fịlinkufwa, injunị, ing'ōmbe, ifịnyamāna ifya nndị̄su, nūtu tukufịlịfịndika pakị̄su na bāndu. 22Akāndu kōsa akūmị aka kịkutūja kalinkufwa, tōsa utu twajaga nkị̄su ikyumụ. 23Fyosa ifyumị fịlinkupyụtịgwa ifị fyali pakị̄su; umụ̄ndu, ifịnyamāna nifị̄ngị fyosa ịtolo ifị fịkwendela ulwanda, kangi na sịnjunị sya mụ mpālānga; nifị̄ngị fyosa ịtolo fịlinkupyụtịgwa pakị̄su. Alinkusyala mwene ju Nwaka naba bālị nagwe mụngalaba. 24Po papo amīsi galinkwịsula kukwịsula ukufịka amasịku imịa jimo na masịku amalōngo mahāno (150).
Valið núna:
Ubwandilo 7: NYB96
Áherslumerki
Deildu
Afrita
Want to have your highlights saved across all your devices? Sign up or sign in
Nyakyusa Bible © Bible Society of Tanzania, 1996.