LUK 23
23
Pilat Agaho Jisun Boanum
(Mt 27:1-2,11-14; Mk 15:1-5; Jn 18:28-38)
1Kokw so nyi acamv gorab layil Jisun Pilat agaho boanum. 2Hoo bulv mwam yolu berabnum, “Ngulug nyi tulungam nyixiaq wxiaq gvl bulam Kaisarnvn nyooga jima bvk hvl biturbo, hoo atv atam Kristo ngvk hvl bisbo soq nyi aksam ngulv nootu pakun.”
3Hoo Pilat mwam toxnum, “No Juhudi hvdwg lvpw atv jaq yv?”
Hoo Jisu mwam birwqnum, “No sulak sam bedwn.”
4Kokw so Pilat nyub buda akam la nyi tulungam benum, “Soq nyi aksam yolu bedwb ngo hog pagoq goqgkam kaapa ma.”
5Hvbmabde bulv hvraqb ceceq yaiyab biduqnum, “Soq nyi aksi Galili hoqgv nyirab banv Juhudi gvda tvqpwngam nyilayil soq xaqgub tomswr banv, nyi mwlwngam hwrda kvlagob mwv biur-wr banv yolu swcin gob nyig wgdo.”
Herodg Agaho Jisun Boanum
6Pilat sam tatwl, mwv toxnum soq nyi aksi Galili nyiv yv. 7Hoo kokw so Pilat Jisun Herodg gvda aloqgv haai bala nyik hvl cengtkul, mwv Jisun Herodg dookub kanam kunum. Hoq apoho Herod kam Jerusalemho doonum. 8Hwdlo Herod Jisun kaapa tvl vcjaqb hangv hempnum; hoggab mwv Jisug puiyam otuq hoqgv tapanum, hoo mwv Jisug swrdorxeqb nyinamlo ak kaaky tvnam gob kvvnwnum. 9Hoqgab Herod Jisun vijaqg toxnum, hvbmabde Jisu mwam gamkin gokam goorwq maanum. 10Nyub buda akv la pvvb tomswrbo nyi tulungv daqrab banv ceceq jaqb Jisug ogumb haabnv Jisun yolu benum. 11Herod kam mwwg sipai tulug lvgab lvkin gob Jisun bej-beparl nyijab-nyiyap nyinum; hoo bulv mwam lvpw atwg vj koonam rumg mwam koomtvl, Pilatg dookub kanam nomkur kunum, 12Hoq aal jaq hoqgv Herod la Pilat bunyiv ajin mins kunum, hvbmabde hoq otuqho bunyiv ceebio baqminsul doonum.
Jisun Mengdkub Bibwq Kunam
(Mt 27:15-26; Mk 15:6-15; Jn 18:39—19:16)
13Kokw so Pilat nyub buda tulungam, hoo gora ab tulungam la nyi tulungam lvkin gob goqkum banv, 14hoo bulam benum, “Nyi tulungam nyixiaq-wxiaql nyig wgdvn hvl benam nyi aksam ngoqg dookub boapa. Sija ngo nulug agaho mwam tox mvkanamv, mwam nulug yolu bekwb ngo mwwg aoho hog yolu swcin ak jijaqkam doonam meepa ma. 15Herod kam mwwg yolu swcin doonam mam meepa kuma gab mwv ngulug dookub mwam lokta kanam nomkur jipa ku. Mengda puqda yoodub soq nyi aksi hog nyic nyia ak jijaqkam nyima. 16Hoqgab ngo soq nyi sam laqm-baqm tvl apaq jitayin.” 17(Nyedarko durum dvk moodam, vnyw nywxiam, pvtwqho lwqnam nyi tulug pengko hoqgv akgon Pilat tolin jidwb nyinum.) 18Hvbmabde nyi tulungv lvkin gob sogoq goql benum, “Mwam mengto! ngul gab Barabasnvn tolin tuku!” 19Bopam uraho yolu swcin dul nyi meng gam gab Barabasnvn pvtwqho lwql apnum. 20Pilat Jisun topaq dvb mwwnv, nyi tulungam lokta benum, 21hvbmabde bulv sogoq goqdu twql benum, “Mwam daapotol mengto! daapotol mengto!” 22Pilat bulam luum dvb benum, “Ho nyiloqkam mwv hognvk nyic nyiangam nyipan? Mwam mengd puqdwb ngo hog yolu swcin ak jijaqkam kaapa nyoma, hoqgab ngo mwam laqm-baqm tvl apaq jitayin.”
23Hvbmabde bulv Jisun daapotol dvvcw silongv taqtin gvdwl mengtwk hvl bulv sogoql kiir banv benum, ho kokw so bulug sogoql goqnamv mviya kunum. 24Hoqgab Pilat Jisun mengta hvl bulug bekwb kobwql gamlin jiknum. 25Yolu swcin dul nyi meng gam gab pvtwq lwql apnam nyi akam topaq tvbwk hvl gumnyiabo bekwb mwv hoq nyi akam topaq jiknum, hvbmabde mwv Jisun bulug mwwlwqkob bulug alaqb gvqlwq kunum.
Jisun Mengknum
(Mt 27:32-44; Mk 15:21-32; Jn 19:17-27)
26Bulv Jisun bool wgnum. Bulv wdul doodu dvk ho, Simon nvk hvl benam Siren nyi nampam hoqgv bopamb hoodul doonbo akam bulv kaapanum. Bulv mwam nootu banv Jisug daapongam mwwg aohv tvbaq tvl Jisug kokw-kokwb jool wmin gvmnum.
27Hoo nyi pvtw go mwwg kokwb wmin gvnum, hoq pengko ho mwwg gab bulug hangam cedin cedin banv xabl nyem ata-gorab wmin gvnum. 28Jisu nywkur banv bulam benum, “Jerusalemwg nyem tulu! Nulv ngoqgab xamab, hvbmabde at gab la nulug ko tulu gab nulv xabto. 29Hoggab aal loog hoq hvb bid moodv haatayin, ‘Twrngum bo nyem tulungv la ko bwwka maanbo nyem tulungv la nywywngam gwwi twwka mvmabo nyem tulungv xinam jaqkv!’ 30Ho nyi tulungv puutungam berab nyatayin, ‘Ngulug aoso yaqjabto!’ hoo yorn tulungam betayin, ‘Ngulam yulub tvb.’ 31Hoggab bulv soq tulu sam svvnv leelaq yikho nyip nyiloqkam, hwdlo svvn tulungv sengyi kukam nulv hoggv nyikin do?”
32Bulv yolu doonbo nyi vnyi gokam Jisug lvgab mengtaq taab bool wgnum. 33Hoo bulv Dungklo alo ngvk hvl benam nyookam wc kunum, bulv hoqho Jisun daapo aoho dvvcw silongv taqtinum; yolu doonbo guunyi nyi vnyiamkam akwn mwwg lvqbwq daiyaho hoo akwn laqc daiyag daapo aoho mengnum. 34Jisu benum, “Abv, bulam axia jito! Hognvkam bulv nyidu dvn ham bulv cengma.” Tak kaanya banv, bulv mwwg vjam bulug pengko ho hormin sunum. 35Hoqho nyi tulungv daqtwl rodul doonum. Juhudi nyi tulungam nyig wgbo nyi tulungv mwam bej-bepar banv benum: “Mwv nyi asaqkam ywwt ywwnum; mwv Pwnbog xuqnam Kristo jaqnyiloqkam mwam atam atv ywwt ywwm suto!” 36Sipai tulu ngvkam mwam bej-bepar banv benum. Bulv mwwg dookub haabnv opo cumdwq boam jinv benum, 37“No Juhudi nyi tulug lvpw atv jaq nyiloqkam atv atam ywwt ywws toloq kam!” 38Soq sam mwwg daapo aoho xeqtwl tengtaql apnum, “Soq aksi Juhudi tulug Lvpw Atv.”
39Daapo aoho taqtin apnam guunyi nyi akwn hv mwam tobul benum, “No Kristo maai yv? At no atamkam ywwt ywwsto hoo ngulamkam ywwt ywwtbv!”
40Hvbmabde akwnv mwam yolu ruqnv benum, “No Pwnboam bos maad nvi yv? Ngul mwlwngv sig gombu ukinho doodwn. 41Hoo ngulam nyiloqkam jvqtwngam nyijpa, hoggab ngulv hognvkam nyimur-wmur tukun hoqg niqtuqkam ngulv noodu yaas dukun, hvbmabde mwv nyiloqkam hog gokam nyigo wgo jima.” 42Hoo mwv Jisun benum, “Jisu, no noqg lvpwb haaikukam, ngamkam mwwpa tabka!”
43Jisu mwam benum, “Ngo nam jvqtw jaqb bedwn, no ngoqg lvgab soolo daq ao gvda tolo dooba tayin.”
Jisug Sinam
(Mt 27:45-56; Mk 15:33-41; Jn 19:28-30)
44Doonyiv taab svqtwqb nyid agar hoqgv doonyiv kaak maab gvda gvt mwlwngv rwqram mood naagub kan pul doonum, 45hoqgv Jerusalem xumk nam hoqg vj tornam rummv tvqnyi gob swrc nukun. 46Kokw so Jisu vc alwb sogoql benum, “Abv! noqg alaqho ngoqg yalam jig yukun!” Mwv sam gaml bepekul swwrw bingnum.
47Sipai saab akv Jisu hog bvxeq nyil siknum ham kaatwl Pwnboam paqnv benum, “Jisu jvqtw jaqb nyidybo nyi goj kunyi!”
48Hognvkv nyidu dvn bwdwq mwwl kaatab haanbo nyi tulungv Jisug sinam mam kaapel bulv atwg hangam cedin cedin sul nammwb wkur kunum. 49Hvbmabde Galili hoqgv mwwg kokw-kokwb wmin gvnbo nyem tulungam betaql mwam kaacin bo nyi tulungv aado hoqgv doqtul soq nyinam mwlw sam kaal daqnum.
Jisun Svma Liinam
(Mt 27:57-61; Mk 15:42-47; Jn 19:38-42)
50Josap pvk hvl eminam Juhudi nyi ak Arimatiya nampam hoqgv hoqho yvnum. Mwv albo nyi bvla xinam paqnam nyib nyinum, 51mwv bulug pvvb mvl hoo bon nyinam mam loomin gvmanum; hoo mwv Pwnbog lvpw hvvd moodam kaayal doonum. 52Mwv Pilat dookub haabnv Jisug svmangam konum. 53Kokw so mwv svmangam joopoq banv topum vj golo tumtwl nywywngam liika maanam wlw lwwn golo dukoql apnam nyubu ung golo liiknum. 54Soq si swwrab aalwb nyinum, hoo Doonu aalv haasv twqb nyiknum.
55Galili gvda hoqgv Jisug kokw-kokwb wmin gvnbo nyem acamv Josap lvgab wmin gvbanv Jisug svmangam hogloq ho liiknum ham kaanum, 56Kokw so bulv nammwb wkur kunum mwwg gvvho piaqn dvb kuty sungam alboam mwx-mvaql apnum.
Pvvb gaml jikjaqb bulv Doonu aalho doonunum.
Valið núna:
LUK 23: NYISBSI
Áherslumerki
Deildu
Afrita
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.