Matayo 7
7
Jeso unakanya atʼu atsʼilamulane
(Luka 6:37-38, 41-42)
1Jeso waamba, “Mutsʼialamule anjine, kwa hata namwi mutsʼilamulwe ni Mulungu. 2#Mar 4:24Maana, vivyo mwalamulavyo anzienu, vivyo ndivyo vyondalamulwa namwi. Na yiyo pʼishi muyihumirayo kwa anjine, ndiyo ariyo Mulungu undayihumira kwenu naye. 3Kwadze unalola chidudu chiricho dzitsoni mwa munzio, ela kʼuchona chikokopha chiricho mwako dzitsoni? 4Hebu unaidimadze kumwamba munzio, ‘Hima nikulavye chidudu,’ na kuno uwe hata una chikokopha chenye mwako dzitsoni? 5Uwe mulumakwiri uwe! Chilavye mwanzo chikokopha chiricho mwako dzitsoni, na ndipho undaidima kona chividzo hata widime kumulavya chidudu munzio naye.
6“Mutsʼigatsuphire madiya miyo mitakatifu, gatsʼidze gakamugalukira na kumuluma, hebu mutsʼiatsuphire nguluwe a kufuga lulu yenu, yiriyo ni miyo ya maana, atsʼidze akayiyaha-yaha.”
Jeso unaafunza anafunzie amuvoye Mulungu nao andahewa
(Luka 11:9-13)
7Jeso waamba, “Voyani, namwi mundahewa, tsakulani, namwi mundapata, na pigani hodi, namwi mundasundulirwa muyango. 8Maana, chila avoyaye unahewa, atsakulaye unapata, na apigaye hodi unasundulirwa muyango. 9Hebu phakale phana yeyosi phano, ariye achivoywa mukahe ni mwanawe, yiye undamupʼa dziwe? 10Hebu mwanao achikuvoya beshe, ukale we undamupʼa nyoka? 11Bee, chikala mwimwi tu hata muripho mu ai, ela munamanya kwapʼa ana enu miyo midzo, akale Abayenu ariye dzulu mulunguni kʼandaapʼa miyo midzo muno aratʼu amuvoyao? 12#Luk 6:31Bee, ahenderenitʼo anjine kahi za gosi dza viratʼu muhenzavyo nao amuhendere, mana, riro ndiro funzo ra Shariya ya Musa, na ra maneno ga agomvi a Mulungu.”
Jeso unafunza dzulu ya njira mbiri
(Luka 13:24)
13-14Jeso waamba, “Njira yendayo uzimani bee yinayuga, na uo muyango wa kuphenyera nao ni ufufu. Ndo ni achache ondayigwira. Ela njira yendayo Jahanamu, kʼayiyuga na uo muyango wa kuphenyera nao ni walamu. Ndo atʼu anji andagwira yiyo. Ela mwimwi phenyani na uo muyango ufufu kwakukala, ndio ufisao uzimani.”
Mutʼu umanyikana kwa mahendoge
(Luka 6:43-44)
15Jeso waenderera kugomba achiamba, “Dzimanyirireni na atʼu adzambao ni agomvi a Mulungu. Ao achidza, munaaona dza kwamba ni atʼu jeri, ela maroho gao ga chinyama. 16Mwimwi mundaamanya kwa mahendo gao dza viratʼu muumanyavyo muhi kwa matundage. Vi lwazu kukala, atʼu kʼaahunda zabibu kulaa kwa mihi ya miya, hebu kʼaahunda tʼini kulaa kwa mibaruti. 17Muhi udzo wa matunda ga kuriwa uvyala matunda madzo ga kuriwa, na muhi wa kʼoma, uvyala matunda mai ga kʼoma vivyo. 18Muhi udzo wa matunda madzo ga kuriwa kʼawidima kuvyala matunda mai ga kʼoma, hebu muhi wa kʼoma kʼawidima kuvyala matunda madzo ga kuriwa. 19#Mat 3:10; Luk 3:9Na chila muhi otsʼivyala matunda madzo ga kuriwa undatemwa wochwe. 20#Mat 12:33Ndo hata ahendedze, mwimwi mundaamanya kwa mahendo gao.
21“Tsʼi chila mutʼu anambaye, ‘Bwana, Bwana,’ kukala undaphenya Ufalumeni kwa Mulungu, ela yendaphenya ni mutʼu achimizaye mahenzo ga Baba ariye mulunguni tu. 22Tsʼiku ya musindikizo wa urumwengu yichifika, anji andanilalamira ambe, ‘Bwana, Bwana! Mba siswi hwasumurira udzumbe wa Mulungu kwa dzinaro, na hata huchilavya pʼepʼo na kuhenda vilinge vinji kwa dzinaro vivyo.’ 23#Zab 6:8Ela mino nindaambira lwazu-lwazu kukala, ‘Tsʼimumanya kamare mwimwi, na hata niukirani phapha! Mwimwi mosi bee mu atʼu muhendao mai.’ ”
Mujengi wa hekima na yetsʼina hekima
(Luka 6:46-49)
24Kufikira phapho Jeso achiamba, “Kwa vivyo, chila mutʼu asikiraye gaga maneno gangu na kugatuwa, unga dza mutʼu wa hekima yejenga nyumbaye dzulu ya mwamba. 25Ndo mvula yakudzanya, muvo wa madzi uchidzayipiga yiyo nyumba, vuto bomu naro richidzayipiga vivyo, ela kʼayigwire, kwakukala, yatsimbirwa hata mwambani. 26Ela chila asikiraye gaga maneno gangu na kʼagatuwa, unga dza mutʼu muzuzu yejenga nyumbaye phatʼu pha kuhoha. 27Ndo mvula phokudzanya, muvo wa madzi wakudzayipiga yiyo nyumba, vuto bomu naro richidzayipiga, na nyumba yiyo yichigwa, na yichikuluzwa ni madzi kamare!”
28 #
Mar 1:22; Luk 4:32 Jeso ariphomarigiza kugomba maneno gago, duu ra atʼu raangalazwa ni mafunzoge, 29mana, yiye kʼafunzire dza ao alimu ao a shariya, ela yiye wafunza na widimi.
Valið núna:
Matayo 7: CHIDUR
Áherslumerki
Deildu
Afrita
Want to have your highlights saved across all your devices? Sign up or sign in