Genesis 13
13
Nansian so Nila di Abram tan Lot
1Manlapud Egipto linmay Abram ed bandad abalaten na Canaan a kaiba to si Sarai ya asawa to tan amin a kayaryan to; akilad sikato si Lot. 2Mayamyaman lay Abram, ta amayamay la ray karniro, kanding, baka, pilak tan balituk to. 3Tinmaynan lamet diman tan nanalis-alis so nankampoan to ya anggad akasabid Betel. Insan asabi to may pasen a nanleetan na Betel tan Ai a nanayaman to nen saman 4tan nanggawaan toy altar. Diman to inggalang so Katawan.
5Si Lot a kaiba nen Abram et wala met iray karniro to, kanding tan saray baka to; wala met so dilin pamilya to tan saray dilin aripen to. 6Kulang so pampastolan no manolup iran dua, ta dakerakel iray ayayep da. 7Lapud saya mabetbet so siblangan da ray pumapastol nen Abram tan saray pumapastol nen Lot. (Diad saman a panaon, manaayam nid man iray Cananeo tan saray Perezeo.)
8Inkuanen Abram ed kinen Lot, “Sankanayon ita, tan ag nepeg a mansebeg iray totook tan saray totoom. 9Say maung, mansiyan ita la. Pilim so labalabay mon dalin. Lakad sakey a pasen; onla ak balet ed sananey.”
10Ninengneng sirin nen Lot so kaliber-liber tan abantag ton say patar na Jordan ya anggad Zoar et dakel so danum to, a singa Tanamanan na Katawan#13:10 TANAMANAN NA KATAWAN: Totokuyen toy Tanamanan ed Eden. o singa dalin na Egipto. (Diad saman a panaon, ag ni dineral na Katawan so siudad na Sodoma tan say siudad na Gomorra.) 11Kanyan pinili nen Lot a betang to so intiron Patar na Jordan, insan amaarap diman ed bokig. Onyay impansian dan dua. 12Tinmilak si Abram ed Canaan, balet nanayam si Lot ed saray siudad diad patar ya asingger ed Sodoma. 13Maoges iray totood man; mapalaloy kasalanan dad Katawan.
Inmalis ed Hebron si Abram
14Kasiput nen Lot, inkuan na Katawan ed kinen Abram, “Manlapud tan ed kawalaan mo, nengneng mon maung so kaliber-liber mo; 15amin a dalin a nabantag mo, iter kod sika tan diad saray kabyangay boleg mo, tan kayaryan mo ra ya anggad angga. 16Diad karakel na iter kod sikan kabyangay boleg mo, no bilangen mo ra singa ka mambibilang na dabuk. 17Natan sirin, liber mo yan dalin, ta iter kod sikan amin.” 18Inyalis nen Abram so tulda to ed abay na saray masanton kiew ed Mamre diad Hebron tan nanayam diman. Nanggawad man met na altar a para Katawan.
Valið núna:
Genesis 13: MBBPAN83
Áherslumerki
Deildu
Afrita
Want to have your highlights saved across all your devices? Sign up or sign in
Maung a Balita Biblia © Philippine Bible Society, 1983