Noo Mian 4
4
CAB. IV.
1Eisht va Yeesey er ny leedeil liorish spyrryd Yee gys yn aasagh, dy ve’r ny violagh liorish y drogh spyrryd.
2As tra ve er drostey da‐eed laa as da‐eed uy, ve ny lurg shen accryssagh.
3As haink y Miolyder huggey, gra, My she Mac Yee oo, cur sarey da ny claghyn shoh, dy ve jeant nyn arran.
4Agh dreggyr eshyn, gra; Te scruit, Cha nee er arran ny lomarcan nee dooinney beaghey, agh liorish cre‐erbee ta cheet magh ass beeal Yee.
5Eisht hug y drogh spyrryd lesh e gys yn ard‐valley casherick, as hoie e e, er eer‐vullagh y chiamble,
6As doort e rish, My she Mac Yee oo, tilg oo hene sheese: son te scruit, Ver e currym da e ainlyn my dty chione, as ayns nyn lauyn nee ad oo y ymmyrkey, er aggle ec earish erbee, dy bwoail oo dty chass noi clagh.
7Doort Yeesey rish, Te scruit reesht, Cha jean oo yn Chiarn dty Yee y violagh.
8Reeshtagh hug y drogh spyrryd lesh e seose, er slieau feer ard, as yeeagh e da ooilley reeriaghtyn y teihl as y ghloyr oc:
9As doort e rish, shoh ooilley verryms dhyt, my huittys oo sheese, as my ver oo ooashley dou.
10Eisht doort Yeesey rish, Gow ass my eanish, Noid‐anmey: Son te scruit, Ver oo ooashley da’n Chiarn dty Yee, as eshyn ny lomarcan nee oo y hirveish.
11Eishtagh daag y drogh spyrryd e, as cur‐my‐ner haink ainlyn as ren ad e y hirveish.
12¶ Nish tra cheayl Yeesey, dy row ad er ghoal Ean, jimmee e roish gys Galilee.
13As daag e Nazareth, as haink e dy vaghey ayns Capernaum, ta rish oirr ny marrey, ayns ardjyn Zabulon as Nephthalim.
14Dy voddagh ve cooilleenit ny va loarit liorish Esaias yn phadeyr, gra,
15Talloo Zabulon as talloo Nephthalim, er slyst ny marrey, cheu elley dy Yordan, Galilee jeh ny Ashoonyn:
16Ta’n pobble, va nyn soie ayns dorraghys, er vakin Soilshey moar: as dauesyn va nyn soie ayns cheer as scadoo’n vaish, ta soilshey er nirree seose.
17¶ Veih’n tra shen, ren Yeesey toshiaght dy phreacheil, as dy ghra, Gow‐jee arrys, son ta reeriaght Yee er‐gerrey.
18¶ As honnick Yeesey, myr ve shooyl liorish keayn Galilee, daa vraar, Simon va enmyssit Peddyr as Andreays e vraar, cur magh lieen ’sy cheayn (son va’d nyn Eeastairyn,)
19As doort e roo, Eiyr‐jee orryms, as neems shiu nyn#4.19 tayrnee shiu deney gys Jee. Eeastairyn dy gheney.
20As chelleeragh daag ad nyn lieenteenyn as deiyr ad er.
21As tra ve er gholl veih shen, honnick e daa vraar elley, Jamys mac Zebedee as Ean e vraar, ayns long marish Zebedee nyn ayr, karraghey ny lieenteenyn oc: as deie e orroo.
22As daag ad chelleeragh y long as nyn ayr, as deiyr ad er.
23¶ As hie Yeesey my‐geart ooilley Galilee, gynsaghey ayns ny Kialteenyn oc, as preacheil Sushtal y Reeriaght, as leihys dy chooilley hingys as dy chooilley ghoghan, mastey’n pobble.
24As hie yn ennym echey magh trooid ooilley Syria, as hug ad lieu huggey, ooilley adsyn va fo aslaintyn, adsyn va fo caghlaaghyn dy ghoghanyn as dy gheiaghyn, adsyn va drogh spyrrydyn ayndoo, yn vooinjer va eddrym ayns nyn geeal rish caghlaa ny haist, as adsyn va’n chingys‐craa orroo, as ren e ad y leihys.
25As deiyr er chaglym moar dy leih, veih Galilee, as Decapolis, as Jerusalem, as Judea, as veih cheu elley dy Yordan.
Valið núna:
Noo Mian 4: NMian
Áherslumerki
Deildu
Afrita
Want to have your highlights saved across all your devices? Sign up or sign in
historic text maintained in digital form by the British and Foreign Bible Society (Sheshaght y Vible)