MATTHAI 19
19
Kikhul thu a dotna
1Huleh hichi ahung hi a, Jesu’n hi thute a soi zohin, Galili gam apatin a pawt a, Jordan gaal Judia gam lamah a chiah a; 2Huleh mipi nasatah in a jui va, ama’n huah amahuh ana sudam hi. 3Pharisaite zong a kawmah a hung va, amah ze-etin a kawmah, Bang jiah pouhin mi’n a ji a khul a siang ei? a chi va. 4Huin ama’n a dawng a, a kawmvah, A chiil apat a amahuh siamtu in numei leh pasal in ana siam hi. 5Huleh, hijiahin pasal in a nu leh a pa a nuse diing a, a ji a tu diing; huleh a nih un sapumkhat ahung hita diing uh, a chi hi, chih na sim sih u'maw? 6Huchi'n amahuh chu nih ahi nawnta sih va, sapumkhat ahita uhi. Hujiahin Pathian in a gawmsa chu mihing in khen sih heh, a chi a. 7Amahun a kawmah, Ahihleh bang diinga Mosi in kikhulna lehkha piah a khul diing ahi, chia thu a piah ahiai? a chi va. 8Ama’n a kawmvah, Mosi in na lungtang uh khauh jiaha na jite uh khul ahung phalsah ahi; hizongleh a chiil apatin huchibang ahi sih hi. 9Huleh ke'n ka hung hilh ahi, Koipouh mi dang toh kingaih jiah hiloua, ji khul a, a dang nei chu aangkawm ahi; huleh khulsa nei photmah zong aangkawm ahi, a chi a. 10A nungjuite’n a kawmah, pasal a ji toh kal thu huchi ahihleh, kiteen a hoih lou ahi, a chi va. 11Hizongleh ama’n a kawmvah, Hi thu kisoi mi zousiah in a pom thei sih uh, a kawmva piahte lou ngalin. 12Michilgeh khenkhat a nu uh gil sung apat huchibanga piang mawng a um va; huleh michilgeh khenkhat, mihing geh thuh zong a um a; huleh michilgeh, vaan lalgam jiaha michilgeha kisiamtawmte zong a um hi. Koipouh a pomthei in pom uheh, a chi hi.
Jesu’n naupangte a vangpiah
13Hulaiin a tungva a khut nga a, a haamteisah diingin a kawmah naupang neute ahung pui va; huleh nungjuite'n ana tai va. 14Hizongleh Jesu’n, Naupangte chu ka kawma a hung diing uh phalsah unla, khap sih un; vaan lalgam, chu huchibang mite a ahi ngal a, a chi a. 15Huleh a tungvah a khut a nga a, hu apatin a chiahta hi.
Mihausa tangval khat in kumtuang hinna a hawl
16Huleh ngai in, mi khat a hung a a kawmah, Houtupa hoih, kumtuang hinna ka neih theihna diingin bang silpha ahiai ka bawl diing? a chi a. 17Ama’n a kawmah, Bang diinga mi hoih hung chi na hiai? Pathian chih louh mi hoih dang a um sih hi; bangteng hitaleh hinna a na luut nuam leh thupiahte zawm in, a chi a. 18Ama’n a kawmah, A khoi haw e? a chi a. Jesu’n a dawng a, Tual na thah louh diing ahi, Na aangkawm louh diing ahi, Na guuh louh diing ahi, Heetpihtu tahlou in na pang diing ahi sih. 19Na nu leh na pa zah in: huleh, Nangmah na kilungsiat bangin na innveengte na lungsiat diing ahi, a chi a. 20Tangvalpa'n chu a kawmah, Hite zousiah chu ka neu apat ka jui zingta hi; bang ka sam na lai ei? a chi a. 21Jesu’n a kawmah, Hoihkim keei ning na chih leh, chiah inla, na neih zuah inla, migentheite kawmah pia in, huchi'n vaan ah gou na nei diing; huleh hung inla hung jui in, a chi a. 22Hizongleh tangvalpa’n chu hu thu a jah tahin lungkham tahin a chiah mangta hi; sum tampi nei ahih jiahin.
Hauhsat a nohphahdan
23Huin Jesu’n a nungjuite kawmah, Chihtahzetin ka hung hilh ahi, mi hausa diingin vaan lalgam luut a hahsa hi. 24Huleh ka hung hilh kiit ahi, Mi hausa Pathian gam a, a luut sangin sangawngsaau phin bilvang a, a luut paisuaah a baihlamzaw hi, a chi a. 25A nungjuite’n hu a jah un limdang a sa mahmah va, Huchi ahihleh koi hutdamin a um zou diai? a chi va. 26Hizongleh Jesu’n amahuh a en a, a kawmvah, Huchu mihing diingin bawl gual ahi sih a; hizongleh Pathian diingin chu bangkim ahi thei hi, a chi hi.
Pathian gam a sawllehte mun diing
27Huin Peter in a kawmah, Ngai in, kei un bangkim nusia in ka hung juita va; bang ka mu diing viai leh? chi'n a dong a. 28Huin Jesu’n a kawmvah, Chihtahzetin ka hung hilh ahi, Siamthahna ah, mihing Tapa a loupina touphah a, a tou chiangin nanguh kei hung juite chu Israel nam sawmlenihte vaihawm in laltouphah sawmlenih ah na tou saam diing uhi. 29Huleh michin ka min jiaha, innte aha, unaute aha, sanggamnute aha, pa aha, nu aha, ji aha, tate aha, gamte aha nusia in chu a lehza a mu diing va, kumtuang hinna a tang diing uh. 30Hizongleh mi tampi masapen a umte nunungpen in a um diing va; huleh nunungpen a umte masapen ahi diing uhi.
Valið núna:
MATTHAI 19: SIMTBSI
Áherslumerki
Deildu
Afrita
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.