MATTHAI 11
11
1Huleh hichi ahung hi a, Jesu’n a nungjui sawmlenihte thu a piah zohin, hu apatin khuate a thuhilh diing leh thusoi diingin a chiahta hi. 2Huin John in suangkul sung apat Khrist natohte ana jah in, amah nungjuite nih a sawl a, 3A kawmah, A hung diingpa na hiai mah, ahihlouhleh a dang khat ngaah diing ka hi viai mah? a va chisah a. 4Jesu’n a dawng a, a kawmvah, Chiah unla, na jah uleh na muh uh John va hilh un; 5Mittawte mit ahung vaahta a, keengbaite a chiah theita va, phaahte ahung siangthouta va, bilngongte’n khua a ja theita va, misite kaihthoh in a umta va, huleh migentheite’n tanchinpha soi a dongta uhi. 6Huleh koipouh keimah a lunghihlouhna mu lou chu a hampha hi, a chi a. 7Huin amahuh a chiah tahun, Jesu’n mipi kawmah John thu a soi panta a, Bang en diing a gamdai a chiahdoh na hi viai? sialluang huih muut liing maw? 8Ahihlouhleh, bang en diing a chiahdoh na hi viai? Puannem silh mi khat maw? ngai in puannem silhte chu kumpite inn ah ahi a um uh 9Ahihlouhleh bang en diing a chiahdoh na hi viai? zawlnei en diingin maw? ahi, ka hung hilh ahi, zawlnei sanga zong loupizaw ahi. 10Ajiahchu, "Ngai in, ka thangkou na ma ah ka sawl a, ama’n na ma ah na lampi a bawl diing hi, chia a thu kigial chu amah ahi". 11Chihtahzetin ka hung hilh ahi, Numei sunga piang lahah Baptistu John sanga lianzaw a piang nai sih; ahihvangin vaan lalgam a mi neupen zong amah sangin a lianzaw hi. 12Huleh Baptistu John um apat tutanin vaan lalgam in pawngbawlna a thuaah zing ahi, huleh pawngbawlte’n haat thuin a la veu uhi 13Ajiahchu zawlneite zousiah leh daan thu in John hung um tanphain ana soilawhta ahi. 14Huleh nangun na pom nuam uleh, hichu Elijah hung diingpa khu ahi. 15Koipouh jahna diing a bil nei in ja heh. 16Hizongleh tulai khang thahte hi bangtoh ka tehkaah diai? hichu naupang dawlmun a tou a, a lawmte kou a, 17Theile hung muutsah unga lah, laam lou u’china, huleh kap unga lah, na hung dahpih sih uh, chite bang ahi uh. 18Ajiahchu John a hung a, ne in a dawn sih a, Dawi nei ahi, a chi va. 19Mihing Tapa a hung a, a ne in a dawn a, En un, an haipa, uain haipa, siahdongte leh misualte lawmpa, a chi uh, hizongleh pilna chu a natohte’n a siamtan hi, a chi hi.
Ginglou khopite tunggihna
20Huleh a kisiih louh jiahun, a sil loupi bawltamna pen khuate chu a taita a: 21Korazin, na tung gih e! Bethsaida, na tung gih e! ajiahchu nanguh a sil loupi kibawlte Tura leh Sidon khua a kibawl hileh, saiippuan silh a vut khuh in a kisiihta diing uhi. 22Hizongleh ka hung hilh ahi, Vaihawm ni chiangin nanguh thuaah diing sangin Tura leh Sidon kho thuaah diing a dan a um zaw diing. 23Huleh nang Kepernaum, vaan tana tawisanga um chu, misi kho tana paihkhiah in ahi na um diing; ajiahchu nangmah a sil loupi kibawlte Sodom khua a kibawl hileh, tuni tanin a um nalai diing hi. 24Hizongleh ka hung hilh ahi, Vaihawm ni chiangin nang thuaah diing sangin Sodom kho thuaah diing chu a dan a um zaw diing hi," a chi hi. 25Huchihlaiin Jesu’n a dawng a, Aw, Pa, vaan leh lei Lalpa, nang mipil leh misiamte kawmah hi thute na iim a, naupangte kawma na phuan jiahin ka hung phat ahi. 26Ahi, Pa, huchibang chu nang ngaihin a hoih ahi.
Jesu mi kouhna
27Ka pa’n sil zousiah ka kawmah ahung pekheta hi; huleh, Pa lou in koima’n Tapa chu a he sih uh; huleh Tapa leh, Tapa’n a kawma a phuan nuamnate chihlouh in koima'n Pa a he sih hi. 28Nanguh tonggim leh puaahgih pote zousiah ka kawmah hung un, keima’n khawldamna ka hung pe diing hi. 29Ka ngawngkol pua unla, ka kawmah zil un, ajiahchu jainemtah leh lungtang a kingaingiamtah ka hi; huchi’n na hagau diingun khawldamna na mu diing uhi. 30Ajiahchu ka ngawngkol a nuam a, ka puaah zong a zang hi, a chi hi.
Valið núna:
MATTHAI 11: SIMTBSI
Áherslumerki
Deildu
Afrita
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.