LUKE 24
24
Jesu thohkiitna
1Huleh hafta ni masa niin, jingkal matahin a gimtui bawlte uh tawiin, midang koite aha toh haan ah a hung va; 2Huleh suang chu haan apat liihdoha um a mu va. 3Huin a sung ah a luut va, Lalpa Jesu luang chu a muta sih uhi. 4Huleh hichi ahung hi a, hujiaha a lungbuai laiun ngai un, mi nih puan vaam tah mai silhin a kawmvah ahung diing a; 5Huleh amahuh laua lei a a bohkhup laiun amahun a kawmvah, Bang diinga misi laha mihing hawl na hi viai? 6Hi-ah a um nawn sih hi, a thou kiitta hi; Galili gam a, a um laia na kawmva a soi he un, 7Mihing Tapa chu misualte khuta matsah in a um diing a, kros ah a kilhbeh diing va, huleh ni thum ni’n a thou kiit diing, a chih, a chi va. 8Huin amahun a thusoite ahung hedohta uhi. 9Huleh haan apatin a nungchiah kiit va, hi silte zousiah sawmlekhatte leh midang zousiah kawmah a hilh ta uhi. 10Amah u’chu Mari Magdalene toh, Joanna toh, Jakob nu Mari toh, huleh a kawmva um numei dangte toh ahi va, hi silte chu sawllehte kawmah a hilh ta uhi. 11Huleh a thusoi u’chu mawh thu mai in a ngai va, ana tahsang sih uhi. 12Huin Peter chu a dingdoha, haan ah a va taia; huleh kuuna a et leh puannemte chauh um chu a mu a, sil um daante chu limdang satahin a chiahmangta hi.
Emmau lampi a Jesu kilaahna
13Huleh ngai in, huni mahin a lahva mi nih Emmau kichi khua khat, Jerusalem apata farlong sawmgup banga gamla ah a chiah va. 14Amah u’chu hi sil hung umte zousiah thu ah a houlim va. 15Huleh hichi ahung hi a, houlima a kidottuah laiun Jesu ngei in ahung naih a, amahuh toh a chiahkhawm ta a. 16Hizongleh amah a heet theih louh na diingun a mit uh suhvaih in a um a. 17Huin ama’n a kawmvah, Na chiahkawmva na kihoulimna uleh, na dahna thu uh bang ahiai? a chi a. 18Huin khatpa, a min Kleopa kichi penin a dawng a a kawmah, Tulaia sil umdante na heet louh, Jerusalem a nang chauh mikhual na hiai mah? a chi a. 19Ama’n a kawmvah, Bang silte eimaw? a chi a. Huin amahun a kawmah, Nazareth Jesu, Pathian leh mi zousiah mitmuha silbawl leh thusoia zawlnei minthangtah tungtaang thu: 20Amah chu siampu lalte leh ka houtute un sitaah a siamlouh tansah diing a a piahkhiah va, kros a, a kilhbeh uh thu. 21Hizongleh kei un chu Israelte tantu diing amah ahi chih ka kinem uh; huleh hihaw lou zong, hi silte tun kalsiah tuni ani thum ni ahita hi. 22Hulezong ka lawi lahva numei khenkhat haan a mataha va chiahte’n thumah satahin ahung koih uhi. 23Huleh a luang a muh louh phetun ahung kihkiit va, A hing kiitta, chia hung hilh angelte zong ka mu uh, a chi uh. 24Huin ka umpihte lahva khenkhat haan ah a va chiah va, numeite soi bang ngei in a va mu va; hizongleh amah a mu tuan sih uhi, a chi va. 25Huin ama’n a kawmvah, Aw mingolte leh, zawlneite thusoi zousiah tahsang diing a lungngongte; 26Khrist in hi silte thuaah a, a loupina a, a luut diing him hilou ahiai mah? a chi a. 27Huin Mosi leh zawlneite zousiah lehkhabu apanin Pathian lehkhabu pumpia amah tungtaang kigialte a kawmvah a hilhchianta hi. 28Huleh a chiahna diing khua uh tung diing ahita va; amah chu gamlataha chiahsuaah tum bangin a um a. 29Hizongleh amahun a hou va, Ka kawmvah um mai ta’n; nitaahlam ahita a, huleh ni zong tum diing ahita hi, a chi va, Huin a kawmva um diingin a luut ta hi. 30Huleh hichi ahung hi a, amahuh toh ankuang a a touin tanghou a la a, vang a pia a, huleh a balkeeh a, a kawmvah a pia a. 31Huin a mit uh ahung vaahta a, amah a heta uh; huin amah chu a mitmuh vapat a mangta hi. 32Huin amahun, Lampi a ahung houpiha, Pathian lehkhabu thute ahung hilhchian laiin i lungtang i sungah a kuang hial hilou ahiai mah? a kichi va. 33Huleh hulaitah mahin a thou va, Jerusalem khua ah a kinungleh va, sawmlekhat umkhawmte leh a kawmva umte chu a mu uh. 34Amahun, Lalpa chu a thou kiittahzet ahi, Simon kawmah zong a kilaahta, ana chi va. 35Huin amahun zong lampi a sil hung umte leh tanghou a balkeeh a amah a heetdohdante uh a hilh uhi.
Sawllehte kawma Jesu kilaahna
36Huleh hichi-a a soi laiun, Jesu ngei chu a lahvah ahung dinga, a kawmvah, Na tungvah hamuanna um heh, a chi a. 37Hizongleh amahuh chu a chija mahmah va, huleh a lau va; siha mu hiin a kingaihtuah uh. 38Huin ama’n a kawmvah, Bang diinga mangbang na hi viai? huleh bang jiaha na lungtang va ginlahna hung um ahiai? 39Ka khutte leh ka keengpeehte en un, kei mahmah hilou ka hiai mah? hung khoih unla, en un; ajiahchu ke’n neia na hung muh bangun siha in sa leh guh a nei sih hi, a chi a. 40Huleh hichi-a a soi zohin a khutte leh a kengpeehte amahuh a lah hi. 41Huleh a kipaah luat jiah va agintaat louh uleh limdang a sah laiun ama’n a kawmvah, Hi-ah neeh diing bangaha na nei viai? a chi a. 42Huin amahun a kawmah nga kikanggaw khat leh khuaizu khal khat a pia va. 43Ama’n huchu a la a, a ma- vah a neta hi. 44Huleh ama’n a kawmvah, Mosi daan leh zawlneite lehkhabu leh psalm bu-a ka tungtaang kigial zousiah ahung taangtun diingdan nang u’toh ka umkhawm laia na kawmva ka thusoite chu hihaw ahi, a chi a. 45Huin Pathian lehkhabuthu a heet theihna diingun a lungtang uh a hihpil ta hi.
Tanchinpha soi diing a vaihaahna
46Huleh ama’n a kawmvah, Hichibanga gelh ahi, Khrist in gim a thuaah diing a, ni thum ni a misi laha kipan a thohkiit diing him ahi; 47Huleh kisiihna leh sual ngaihdamna chu amah minin Jerusalem apatin nam chin lahah soi ahi diing; 48Nanguh hi silte heetpihtute na hi uh. 49Huleh ngai un, ka Pa silchiam na tungvah ka hung sawl diing hi; hizongleh tunglama kipana silbawltheihna a thop na hih masiah uh Jerusalem khopi ah um kinke'n un, a chi a.
Jesu vaan a kalna
50Huleh amahuh chu Bethani tanphain a puidoh a, huin a baan a jah a, amahuh a vangpiah a; 51Huleh hichi ahung hi a, a vangpiah lai tahin amahuh a paisan ta a, vaan ah puitouhin a um ta hi. 52Huin amahun amah abia va, kipaah mahmahin Jerusalem ah a kih kiitta uhi. 53Huleh Pathian biahinn ah Pathian phat leh paahtawiin a um zingzingta uhi, Amen.
Valið núna:
LUKE 24: SIMTBSI
Áherslumerki
Deildu
Afrita
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.