LUKE 21
21
Meithainu thohlawm khiah
1Huleh a daahdoh a, mi hausate’n sumkholna-a sum a khiah lai uh a mu a. 2Huleh ama’n meithainu zawngtah khat in paisa san nih a khiah lai zong a mu a. 3Huin ama’n, Chihtahzetin ka hung hilh ahi, amahuh zousiah sangin hi meithai zawngnuin a khetam zaw hi. 4Bang jiahin i chih leh hite zousiah in a neih tuang uh Pathian thohlawmah a khia va; hizongleh ama’n chu a hinna diing a a neihsun teng a khe veh hi, a chi a.
Jesu’n Jerusalem siat diing leh huntawp diing thu a soilawhna
5Huleh koite ahain Pathian biahinn thu, suang hoihtahte leh silpiahte-a jep hoih a hihdan a soi uleh ama’n, 6Hi na sil muhte uh ahihleh, suhchim louha suang khat tunga khat kichiang mawngmawng a um louh nite ahung tung diing hi, a chi a. 7Amahun, Houtupa, hi silte bangchih chia’n ahung um diai? huleh hi silte ahung tun diing chiangin heetsahna bang ahung um diai? chi'n a dong va. 8Huin ama’n, Heema na um louhna diingun pilvaang un; ajiahchu Khrist ka hi, huleh a hun tung diing ahita, chi'n mi tampite ka minin ahung diing uh; hujiahin amahuh jui sih un. 9Amahvang kidou thu leh buai thute na jah chiangun lau sih un; ajiahchu hi silte hung tung masa diing mawng ahi; hizongleh a tawpna chu a tungpah nai sih diing hi, a chia. 10Huzohin ama’n a kawmvah, Nam tuamin nam tuam, huleh gam tuamin gam tuam a dou diing; 11Mun tuam tuamah jil nasatahin a liing diing a, kialte hung tungin, hiite ahung leeng diing; huleh vaan apatin sil lauhuaite leh chiamchihna loupite ahung um diing hi. 12Hizongleh hi silte zousiah a tunma in nanguh ahung man diing va, kikhopna inn leh suangkul ahte hung puiin ahung bawlgenthei diing va, ka min jalin kumpipate leh vaihawmtute ma-ah ahung pui diing uh. 13Huleh hichu nanguh diingin heetsahna ahi diing. 14Hujiahin bangchi dawn diing chih ngaihtuah masa lou diingin na lungtang vah kisukip un; 15Ajiahchu na meelma zousiahun ahung dou va, ahung soisel theih louh diinguh kam leh pilna ka hung pe diing hi. 16Huleh na nulepate uh, na unaute uh, na behte uleh na lawmteun zong ahung mansah diing va; na lahva khenkhat chu ahung sulum diing uh. 17Huleh ka min jiahin mi zousiah huat in na um diing uh. 18Hizongleh na lu va samzang khat zong a mangthai sih diing hi. 19Na kuhkalna vah na hinna uh na humbit diing uhi. 20Huleh sepaihte’n Jerusalem a umkhum uh na muh chiangun a manthaina diing a naita chih he un. 21Hu hun chiangin Judia gam a umte taang ah taimang u’heh; a sunga umte zong pawtdoh u’heh; huleh gam a umte zong a sungah luut sih u’heh. 22Ajiahchu thu kigial zousiah a taangtun na diing a hu nite chu phubalah ni ahi diing. 23Hizongleh hu ni chiangin gaaite leh naungeeh nawiteep neite a tunguh a gih hi! ajiahchu gam sungah hahsatna nasatah leh hi mite tungah lungthahna tung diing ahi. 24Huleh amahuh chu namsaau hia min a si diing va, nam chin kawmah suaaha puiin a um diing uh; huleh Jentelte hun a buchin masiah Jerusalem chu Jentelte totdeenin a um diing hi. 25Huleh ni leh, ha leh aahsite bangah chiamchihna a um diing a; leitung ah nam chin hahsatna leh mangbatna a um diing; tui khang lian kinawhin a mau vengvung diing. 26Mite chu launa jiah leh khovel a sil hung tung diingte ngaihtuahna jiahin a sibup diing uh; ajiahchu vaan silbawltheihnate kisuliing diing ahi. 27Hutah chiangin amahun mihing Tapa chu silbawltheihna leh loupina nasatah toh meipi laha hung a mu diing uh. 28Huleh hi silte ahung tun pat chiangin entou unla, daahdoh un; ajiahchu na tatna uh a naita hi, a chi a.
Lalpa hung kiitna diing a kiveen zing a poimohdan
29Huin ama’n a kawmvah, tehkhinthu khat a soi a; Theipi kung leh sing kung zousiah en un; 30A nah ahung sel tah chiangin nipi ahung naita chih na mu va na kiheet uhi. 31Huchimahbangin hi silte hung tun na muhchian un Pathian gam ahung naita chih he un. 32Chihtahzetin ka hung hilh ahi, Sil zousiah a taangtun veh masiah tulai khang thahte a mang sih diing uh. 33Vaan leh lei a bei diing a, hizongleh ka thu a bei sih diing hi. 34Pilvaang un; huchilou inchu neeh vah taahluat leh, zukham leh, damsung khosah ngaihtuahna in na lungtang uh a dim talokha diing a, huchi'n hu ni na heet louh kalun ahung tung guih kha diing hi. 35Ajiahchu thaang kipel banga leitung pumpia umte zousiah tunga tung chiat diing ahi. 36Hujiahin hi sil hung tung diing zousiahte peel taah leh, mihing Tapa ma-a diing taah diing a guat na hih theihna diingun bangchih laipouhin haamtei unla, ngaihsah zing un, a chi a. 37Huleh ama’n suun laiin Pathian biahinn ah thu a hilh a; jan chiangin a pawtdoha, Olive taang kichi ah ava giah veu hi. 38Huleh mipite zousiah chu jingkalin a kawmah biahinn ah a thu ngaikhe diingin ahung uhi.
Valið núna:
LUKE 21: SIMTBSI
Áherslumerki
Deildu
Afrita
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.