मत्तायोस 3
3
यॊहन नूड़रत'उस
(मर 1:1-8; लूक 3:1-18; यॊ 1:19-28)
1अबड़ा उल्ला नू यॊहन नूड़रत'उस यूदेया जिला ही टोड़ंग नू बरचस अरा असन एन्ने तेंगा कुद्दा हेलरस: 2“जियन किर्त'आ एन्देरगेका धर्मेस आलर ही उज्जना नू राजी नन्ना ही बेड़ा हेद्दे अंड़सकी र'ई।”#मत्ता 4:17; मर 1:15 3यॊहनस आसिम हिकदस नॆख'आ पत्त नू धर्मेसी कत्था तिंगू यसायास बाचका रहचस का,
“ओर्तोस टोड़ंग नू चिच्चियारदस,
‘उर्बस गे डहरेन सपड़'आ,
आस गे डहरेन चत्र'आ।’”#यसा 40:3
4यॊहनस ऊंट ही चुट्टी ती कमचका ओन्टा कड़कड़हा किचरिन चो'आलियस। अरा तंग्है कड़मा नू चपटा ही कमरपटी हें'आलियस। अरा आसी ओन्ना-मॊख़ना बोक्खो गुट्ठी अरा टोड़ंग तीनी रहचा।#2बॆल 1:8 5येरुसलॆम नगरे ती अरा गोट्टा यूदेया जिला ही नन्ना नन्ना अड्डा ती अरा यरदन ख़ाड़ ही अड्डे-बेड्डे ती बग्गे आलर आसी गुसन कालालियर। 6असन आर आसी कत्थन मेनरकी तम्है पाप गुट्ठिन पत्त'आलियर। ख़ने यॊहनस आरिन यरदन ख़ाड़ नू नॊड़रत'आलियस।
7यॊहनस बग्गे फरिसीर#3:7 फरिसीर यहूदी समाज ता ओन यहूदी धरम खोंड़हा, नॆ मूसासी पॆसका, अरा मल लिखचका पुरखोती नॆग आबोन ख़ापुर। अरा सदुकीरिन#3:7 सदुकी यहूदी समाज ता ओन यहूदी धरम खोंड़हा हवे। नॊड़र'आ गे तंग्हा हेद्दे बरनन ईरीयस ती आरिन बाचस, “अना बिक्ख नेर्रे बेसे आलारो, पाप नन्नन बिगर अम्बका ती धर्मेसी बरना दंडे ती बोंगा गे निमन निकईम चेता बाचर का?#मत्ता 12:34; 23:33 8जियन किर्त'अना ही जॊगे नलख नना। 9नीम तम्है तम्है जिया नू एन्ने अमा सोच'आ हेलरा का ऎम अब्राहमसी बनस#3:9 धर्मेस अब्राहमस गे चिच्का गच्छरना ती यहूदी आलर सोचनर का आर धर्मेसी चुन्चका आलर हिकनर। ता हिकदम। ऎन निमन ब'अदन का धर्मेस इबड़ा पखना गुट्ठी ती अब्राहमस गे ख़द्द कम'आ ओंग्दस।#यॊ 8:33 10अक्कु सुरता नना का धर्मेसी रायबड़ी लेक्खा टोंग'ए मन्न ही पादा नू अबड़न खंडा गे उईर ख़च्चरकी र'ई। एका मन्न दौ ख़ंजपा मल ख़ंजई अबड़न खंडरकी चिच्ची नू सजतार'ओ।#मत्ता 7:19
11ऎन गा जियन किर्त'आ गे अम्म ती नॊड़रत'अदन, लिकिन एकास एंग्है ख़ॊख़ा बर'ऊ र'अदस, आस एंग्है ती कोड़हे सवंगिय र'अदस। ऎन गा आसी खरपन चॊदना जॊगे मलकन का एकदन बिट्ठी ननू जॊंख़स लेका नन्दस। आस निमन नेम्हा बॊलतस अरा चिच्च ती नॊड़त'ओस। 12आस तंग्है केतेर ती गहूँ अरा चींख़न बेग'ओस, अरा आस तंग्है खलिन बॆस लगे एर्रोस। अरा आस गोट गहूँन कुट्ठी नू उइय्योस, अरा चींख़न चिच्ची नू बस्सोस एकदा इकला हूँ मल तेभर'ओ।”
यॊहनस ती येसुसी नॊड़रना
(मर 1:9-11; लूक 3:21,22)
13आ बारी नू येसुस गलिलेया जिला ती यरदन ख़ाड़ पिंडी नू यॊहनस गुसन आस ती नॊड़रत'आ गे बरचस। 14लिकिन यॊहनस एन्ने बाचस ती छेंकचस, “एंगा गा निंग्है ती नॊड़रना ही चाड़ र'ई अरा नीन एंग्है गुसन बरचकादय।” 15ख़ने येसुस आसिन आनाकिर्ताचस, “अक्कु एन्नेम मना चि'आ, नमा गे एन्नेम धर्मेसी मने लेक्खा उर्मी नन्ना चाड़ र'ई।” ख़ने यॊहनस येसुसिन नॊड़रत'आ गे मने मंजस।
16नॊड़रस ती येसुस अम्मु ती उरखस ख़नेम, मेर्ख़ा तिसग्रा अरा धर्मेसी बॊलता पेरवाँ लेक्खा एत्तना दरा तंग्है मइय्याँ बरना ईरयस। 17अरा मेर्ख़ा ती धर्मे बबस बाचस, “ईस एंग्है चोन्हा ख़द्दस हिकदस, ऎन ईस ती बग्गे खुसमारदन।”#उत्प 22:2; भज 2:7; यसा 42:1; मत्ता 12:18; 17:5; मर 1:11; लूक 9:35
Valið núna:
मत्तायोस 3: KURUXBSI
Áherslumerki
Deildu
Afrita
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.