लूकस 11
11
चेलर गे गोहरारनन सिखाब'अना
(मत्ता 6:9-13; 7:7-11)
1ओंग्होन येसुस ओन अड्डा नू गोहरार'आ लगियस। आस मुंजियस ख़ने आसी चेलर ती ओर्तोस आसिन बाचस, “अना उर्बायो, नीन एमन गोहरार'आ गे सिखाब'आ एकन्ने यॊहनस तंग्है चेलारिन सिखाबाचस।” 2येसुस आरिन बाचस, “एकाबारी नीम गोहरार'ओर आ बारी एन्ने ब'आ,
‘अना बबा, निंग्है नामे नेम्हा मनन नेकअन,
निंग्है राजी बर'अन नेकअन।
3एम्है उल्ला उल्लन्ता ओन्ना-मॊख़नन उर्मी उल्ला एमा गे चि'आ।
4अरा एकासे ऎम एम्है उर्मी अक्का-बलकारिन अम्बदम चि'अदम
अन्ने एम्है अक्का-बलकन अम्बा चि'आ,
अरा एमन पाप नन्ना ही चिबाख़ारना नू खतर'आ अमा चि'आ।’”
गोहरारना ही पत्त नू येसुसी सिखाब'अना
5तहाँ येसुस आरिन अउरिम बाचस, “निम्है ती ओर्तोस तंग्है संगेसिन अधा माख़ा क'ओस ती ब'ओस, ‘अना संगी, एंगा तीन गोटंग असमा नहड़ा चि'आ। 6एन्देरगेका ओन्टा डहरे ईकुस एंग्है संगीस एंग्है गुसन बरचकादस, अरा आस गे चि'आ गे एन्द्रा हूँ मल्ला।’ 7अरा आस भितरी ती ब'ओस, ‘अक्कुन एंगन अमा रेंघ'आ, अक्कुन बली उर्दकी र'ई, एंग्है ख़द्दर एंग्है गने ख़न्द्रालनर, ऎन चो'अरकी निंगा एन्द्रा हूँ चि'आ पोलदन।’ 8ऎन निमन ब'अदन, आस तंग्है संगीस ब'अरकी चो'ओस ती मल चि'ओस होले हूँ, आसी गोरगोरा ने'अना चड्डे आस चो'ओस ती आस गे एवंदा चाड़ र'ई अवंदा चि'ओस। 9ख़ने ऎन निमन ब'अदन, धर्मेसिन ने'आ, होले निमा चीर'ओ, बेद्दा, होले निमा ख़क्ख्र'ओ, बलिन ठोकठोकमब'आ, होले धर्मेस ती निमा तिसगर'ओ। 10ईगेका नॆ ने'अनर आर ख़क्खनर, अरा नॆ बेद्दनर आर गे ख़क्ख्र'ई, अरा नॆ ठोकठोकमब'अनर आर गे तिसगर'ई। 11निम्है नू एकास एन्ने बंगस र'अदस का तंग्दस#11:11 जोक्को ख़ेक्खा ता लिख्रका पच्चा पुथी गुट्ठी नू ‘असमा ने'अदस होले पखनन चि'ओस का?’ एन्ने जोड़रकी र'ई। इंजो ने'अदस होले अदही ऊजी नू नेर्रेन चि'ओस का? 12महले बी ने'अदस होले आस गे बिछी चि'ओस का? 13अन्ने नीम मलदौ मनरकी निंग्है ख़द्द-ख़र्रर गे दौ जिनिसन चि'आ अख़दर होले, मेर्ख़ा बंगस तंग्है गुसते ने'उर गे नेम्हा बॊलतन चि'ओस दिम।”
येसुस अरा बालजबूल
(मत्ता 12:22-30; मर 3:20-27)
14ओंग्होन येसुस ओन्टा कोन्दा नादन ओथ्रस। नाद उरखा ख़ने कोन्दा आलस कछनख्र'आ हेलरस। ख़ने आलर अकबक मंजर। 15लिकिन अबड़ा आलर ती जोक्क आलर बाचर, “ईस गा नाद गुट्ठी ही मुद्धस बॆलजेबूल ती नाद गुट्ठिन ओथ्रदस।”#मत्ता 9:34; 10:25 16नन्ना आलर आसिन बिढ़'आ गे मेर्ख़ान्ता ओन्टा चिन्हा नॆचर का आस धर्मेस ती बरचस का मला।#मत्ता 12:38; 16:1; मर 8:11
17आस आर ही सोचनन अक्खस ती आरिन बाचस, “एका राजी तंग्है नू लड़ाई ननी होले आ राजी नठार'ई क'ई। अरा एका एड़पा ता आलर तम्है नू लड़ाई नन्नर होले आ एड़पा ता आलर खत्तरनर कानर। 18अन्नेम सैतान हूँ तंग्है नाद गुट्ठी ही बिड़दो नू लड़ाई ननी होले अदही राजी एकन्ने इज्जकी र'ओ? एन्देरगेका नीम ब'अदर का ऎन बॆलजेबूल ही सवंग ती नाद गुट्ठिन ओथ्रदन। 19अरा ऎन बॆलजेबूल ही सवंग ती नाद गुट्ठिन ओथ्रदन होले, निम्है आलर अबड़न नॆखा सवंग ती ओथ्रनर? औंगे आर निम्है नेंवई ननुर र'अनर। 20लिकिन ऎन धर्मेसी सवंग ती नाद गुट्ठिन ओथ्रदन होले ईद ईद'ई का धर्मेस आलर ही जिया नू राजी नन्ना निम्है नू अंड़स ख़च्चिया।
21ओन्टा सवंगियस तंग्है उर्मी कमहड़ गने तंग्है एड़पन ख़ापदस होले आसी खुर्जी गुट्ठी बछरकिम र'ओ। 22लिकिन आसिन ती कोड़हे सवंगियस बरदस ती आसिन ती जितदस होले आसी अबड़ा कमहड़ नू आसी असरा र'ई अबड़न बच्चदस अरा आसी खुर्जी गुट्ठिन हो'अदस कादस। 23नॆ एंग्है गने मलकी आर एंग्है बिड़दो र'अनर अरा नॆ एंग्है गने नलख मल नन्नर आर एंग्है बिड़दो नू नलख नन्नर।#मर 9:40
मलदौ बॊलता ही झपारना
(मत्ता 12:43-45)
24मलदौ बॊलता आलस ती उरखी ख़ने ख़ैका अड्डा नू ख़न्न ऎख़ा गे अड्डा बेद्दा कुद्दी। अरा मल ख़क्खी ख़ने ब'ई, ‘ऎन एसले उरखकी रहचअन आ आलस नुम किर्रोन।’ 25अरा बर'ई ती नेम्हा बॊलतासी आकुस नू मल र'अना आलस लेक्खा आ एड़पन ईगका ओथ्रका चेमचेम ने ख़क्खी। 26ख़ने आद क'ई तहाँ तंगन ती बग्गे मलदौ सात गोटंग नादन उन्द्र'ई। अरा अबड़ा अइय्या रस'ई ती मड़'ई, अरा आ आलासी दसा ख़ॊख़ा ता दसा ती बग्गे मलदौ मनी।”
मानिम रिझ
27येसुस इबड़ा कत्थन ब'अना बारिम रहचस ख़ने, गोंहड़ा ती ओन्टा मुक्का जॊरसरिया बाचा, “आसीस ख़क्खू र'ई एका अयंग निंगन कुन्द्रताचा अरा पोसा परदा।” 28लिकिन येसुस बाचस, “अदिन ती कोड़हे आसीस ख़क्खू र'अनर आर नॆ धर्मेसी कत्थन मेन्नर ती पॆस्रनर।”
यॊनासी अकबक नलख
(मत्ता 12:38-42; मर 8:12)
29एकाबारी गोंहड़ा अउर ख़ॊंड़र'आ लगिया, ख़ने येसुस ब'आ हेलरस, “ई बेड़ा ता आलर मलदौ हिकनर। आर चिन्हा बेद्दनर, लिकिन धर्मेसी कत्था तिंगू यॊनासी उज्जना नू मंजका अकबक नलखन अम्बरकी आर गे नन्ना एन्देर चिन्हा हूँ मल चितार'ओ।#मत्ता 16:4; मर 8:12 30यॊनास गे एन्देर मंजा आद निनवे नगरे ता आलर गे चिन्हा मंजा। यॊनस तीन उल्ला कोहाँ इंजो ही कूल नू रहचस, फिन आस बहरी बरचस। अन्नेम मनवा ख़द्दन ऎन हूँ ई बेड़ा ता आलर गे चिन्हा मनोन।#यॊना 3:4 31दखिन देस ता रानी ख़ॆख़ेल ही ओन्टा कोंड़ा ती सालोमॊनसी लूर ही कत्थन मेना गे बरचा। अरा ऎरा, इसन सालोमॊनस ती हूँ कोहाँ ओर्तस र'अदस। औंगे रायबड़ी उल्ला नू आद ई बेड़ा ता आलर गने चो'ओ ती ईरिन दुस'ओ।#1बॆल 10:1-10; 2इति 9:1-12 32निनवे नगरे ता आलर यॊनासी कत्थन मेंजर ती जियन किर्ताचर। अरा ऎरा, इसन यॊनास ती हूँ कोहाँ ओर्तस र'अदस। औंगे रायबड़ी उल्ला नू निनवे ता आलर ई बेड़ा ता आलर गने चो'ओर ती आरिन दोस'ओर।#यॊना 3:5
बिल्ली ही जोक्खा ख़ीरी
(मत्ता 5:15; 6:22,23)
33नॆ हूँ बिल्लिन लघा ब'अरकी ओदहा नू महले ढक्की ती मल कुल्लनर, लिकिन पक्खा नू उइय्नर का भितरी कुर'उर गे बिल्ली ऎथ्र'ओ।#मत्ता 5:15; मर 4:21; लूक 8:16 34निम्है ख़न्न निम्है मॆद ही बिल्ली हिके। निम्है ख़न्न फरी र'ई होले निम्है सौंसे मॆद हूँ बिल्ली र'ओ। लिकिन निम्है ख़न्न फरी मलकी होले निम्है मॆद ऊख़ा र'ओ। 35औंगे चिहुंक र'अके एका बिल्ली निम्है जिया नू र'ई ऊख़ा अम्बो मना काला। 36निम्है गोट्टा मॆद बिल्ली मनो होले एकन्ने का एकअम अंग हूँ ऊख़ा मल र'ओ, आद गोट्टा बिल्ली मनो। एकासे का बिल्ली तंग्है बिलचना ती निमन लौकारना मन्त'ई चि'ई।”
फरिसीर दरा नॆग सिखाब'उर गे ओहरे
(मत्ता 23:1-36; मर 12:38-40; लूक 20:45-47)
37येसुस कछनख्र'आ लगियस ख़ने, ओर्त फरिसीस आसिन मीख़ियस एंग्है गने मंडी ओना गुचा। ख़ने येसुस भितरी कोरचस ती मंडी ओना गे उक्कियस। 38मंडी ओन्ना ती मुन्द येसुस ख़ेक्खन#11:38 आर ही चाल ही लेक्खा फरिसीर मंडी ओन्ना ही मुन्द तम्है ख़ेक्खन नॊंढ़रनर, एन्देरगेका आर एकअम सोतबोड़'आ आलॊन महले आलन एवंसड़का होले सुध मना ओंगोर। मल नॊंढ़रस, इदन फरिसीस ईरियस ती अकबक मंजस। 39उर्बस आसिन बाचस, “नीम फरिसीर मौनी दरा छिपा गुट्ठिन बहरी बहरी मंजदर, लिकिन निम्है भितरी चिबाख़ारना अरा मलदौ ती निन्दकी र'ई। 40अना नीम लूर मलका आलारो, धर्मेस नम्है मॆद ही बहरी ता कत्थन समड़'अदस अरा मॆद ही भितरी ता कत्थन हूँ समड़'अदस। 41औंगे नीम कीड़र गे चि'अदर होले, निमा गे उर्मिद सफा र'ओ।
42ओहरे निमा फरिसी आलारो, नीम गा फुदेना अरा जीरा अरा उर्मी अड़ख़ा-चॆख़ेल ही दसमान्स चि'अदर, लिकिन नेंवई आबोन ताड़दर चि'अदर अरा धर्मेसिन चोन्हा मल नन्दर। इबड़न नन्ना र'ई अरा अबड़न हूँ अमा अम्बा।#लौव्य 27:30 43ओहरे निमा फरिसी आलारो, नीम गोड़हा एड़पा गुट्ठी नू मुध मचिया गुट्ठी नू ओक्कनन अरा बजार गुट्ठी नू मोंजरा ख़क्खनन बेद्ददर। 44ओहरे निमा फरिसी आलारो, नीम गा नूख़्रका मसड़ा गड्डी लेक्खा र'अदर, अदही भितरी ता कित्तका पुचका र'ई अदिन आलर बलनर ती अदही मइय्याँ ऎकनर कुद्दनर।”
45ख़ने नॆग सिखाब'उर ती ओर्तोस येसुसिन बाचस, “अना गुरु, एन्ने ब'अदय ती नीन एमन हूँ हींड़दय।” 46येसुस बाचस, “ओहरे निमा नॆग सिखाब'उरो, नीम आलर पॆस्र'आ पोलना टांठ पॆसकन कमदर ती पॆसदर, लिकिन नीम अबड़न पॆस्र'आ गे चिहुट हूँ मल नन्दर। 47ओहरे निम्है मइय्याँ। नीम धर्मेसी कत्था तिंगुरिन मईन नना गे आर गे मसड़ा कमदर नॆकन निम्है पूरखर पिटका रहचर, लिकिन आर ही सिखाब'अनन मल पॆस्रदर। 48इत्रु नीम निम्है पूरखर ही नलख नू भागी मन्दर ती इदही गोवाह चि'अदर। आर गा धर्मेसी कत्था तिंगुरिन पिटियर अरा नीम आरिन मल पॆस्र'अरकी आर ही मसड़न कमदर। 49औंगे धर्मेसी लूर बाचा, ‘ऎन नीम यहूदीर गुसन धर्मेसी कत्था तिंगुरिन, अरा तइरकारिन तइय्योन, लिकिन नीम अबड़र ती जोक्कोरिन पिटोर अरा जोक्कोरिन खिलपत ननोर।’ 50-51औंगे ख़ॆख़ेल ही गढ़्रका ती ऎ बग्गे धर्मेसी कत्था तिंगुर ही ख़ॆंस बाहतारकी र'ई, हाबेलसी ख़ॆंस ती जकरियासी ख़ॆंस गूटी गोड़हा अरा नेम्हा अड्डा ही मझी नू बाहतारकी र'ई। इबड़ा जम्मर ही लेखा ई परियन्ता आलर ती होर'ओ। ऎन निमन मानिम ब'अदन इबड़ा जम्मर ही लेखा ई परियन्ता आलर ती होर'ओ।#उत्प 4:8; 2इति 24:20,21 52ओहरे नीम नॆग सिखाब'उर गे, नीम लूर ही कुंचिन होच्चका र'अदर। लिकिन नीम हूँ मल कोरदर अरा कुर'उरिन हूँ कोर'आ मल चि'अदर।”
53येसुस इबड़ा कत्था गुट्ठिन आनियस ती उरखस ख़ने, नॆग सिखाब'उर अरा फरिसीर बग्गे कत्था ही पत्त नू कत्था बरता नन्ना ती बयसन नना हेलरर, 54का आर आसिन दोस'आ गे अरा तंग्है बई तिम आसिन धर'आ गे ताक ऎरा जोह'आलियर।
Valið núna:
लूकस 11: KURUXBSI
Áherslumerki
Deildu
Afrita
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.