Genesis 6
6
CAB. VI
1As haink eh gy-kione, myr ghow deiney toshiaght dy vishaghey er eaghtyr y thallooin, as dy row inneenyn ruggit daue. 2Dy vaik mec Yee inneenyn gheiney dy row ad aalin; as ghow ad mraane jeu, lurg nyn yeearree. 3As dooyrt y Chiarn, Cha jean my spyrryd dy kinjagh streeu rish dooinney, fakin nagh vel eh hene myrgeddin agh foalley: foast bee e eash shey-feed bleïn. 4Va foawir ’sy theihll, ayns ny laghyn shen; as myrgeddin lurg shen, tra ghow mec Yee mraane jeh inneenyn gheiney, as dy dymmyrk ad cloan daue, haink yn sleih cheddin dy ve deiney niartal, va ’sy chenn earish, ard-hranlaasee.
5As honnick Jee dy row mee-chraueeaght dooinney trome er y thalloo, as dy row dy chooilley yeearree jeh smooinaghtyn e chree soit er olk dy kinjagh. 6As ghow yn Chiarn arrys dy row eh er chroo dooinney er y thalloo, as v’eh seaghnit ayns e chree. 7As dooyrt y Chiarn stroie-ym dooinney, ta mee er chroo veih eaghtyr y thallooin: chammah dooinney as baagh, as y cretoor snauee, as eeanlee yn aer: son ta arrys orrym dy vel mee er chroo ad. 8Agh hooar Noah foayr ayns shilley yn Chiarn.
9Ad shoh sheelogheyn Noah, va Noah ny ghooinney cairagh as ynrick ayns e heelogheyn: as ren Noah e vea y leeideil myr ayns fenish Yee. 10As hooar Noah three mec, Shem, Ham as Japheth. 11Va’n seihll myrgeddin mee-chrauee kiongoyrt rish Jee; as va’n thalloo lhieent lesh tranlaase. 12As yeeagh Jee er y seihll, as cur-my-ner, v’eh slane peccoil: son va ooilley sheelnaue er n’gholl er-shaghryn veih Jee er y thalloo. 13As dooyrt Jee rish Noah, Te roym dy choyrt jerrey er ooilley sheelnaue; son ta’n seihll kyndagh roo lhieent lesh tranlaase: as cur-my-ner stroie-ym ad marish y thalloo.
14Trog dhyt arg jeh fuygh Gopher: roomyn nee oo y yannoo ayns yn arg, as slaa eh cheu-sthie as cheu-mooie lesh pick. 15As jeh’n chummey shoh nee oo y yannoo eh: bee lhiurid yn arg three cheead cubit, e lheead jeih cubityn as da-eed, as yn yrjid echey jeih cubityn as feed. 16Uinniag nee oo y yannoo ayns yn arg, as ayns cubit ver oo mullagh er: as dorrys yn arg nee oo soiaghey ’sy lhiattee echey; ayns three roomyn er yrjid, nee oo y yannoo eh. 17As cur-my-ner, ver-yms lhiam son shickyrys thooilley dy ushtaghyn er y thalloo dy stroie dy chooilley eill, ayn ta’n ennal y vea, fo’n aer: as yiow dy chooilley nhee t’er y thalloo baase. 18Agh rhyt’s nee’m my chonaant shickyr y yannoo, as hig oo stiagh ayns yn arg: uss as dty vec, as dty ven, as mraane dty vec mayrt. 19As jeh dagh nhee bio jeh dy chooilley eill, jees jeh dagh sorch ver oo lhiat stiagh ’syn arg, dy reayll ad bio mayrt: bee ad fyrrynagh as bwoirrynagh. 20Jeh ny eeanlee lurg nyn ghooghys, as jeh’n maase lurg nyn ghooghys, jeh dagh nhee ta snaue er y thalloo lurg e ghooghys: hig jees jeh dagh horch hood’s dy reayll ad bio. 21As gow uss hood jeh dy chooilley horch dy veaghey ta dy ve eeit; as nee oo y haglym hood eh, as bee eh son beaghey dhyt’s as dauesyn. 22Myr shoh ren Noah: cordail rish ooilley ny va Jee er harey da, myr shen ren eh.
Valið núna:
Genesis 6: BIB1819
Áherslumerki
Deildu
Afrita
Want to have your highlights saved across all your devices? Sign up or sign in
© British and Foreign Bible Society 1819, 2019