Luka 20
20
Ilaluzyo nizya bulaghili ubwa Yesu
(Mat. 21.23-27; Mlko. 11.27-33)
1Isiku limo u Yesu akaba mu Nyumba iya Chala pakumanyizya abantu nukulumbilila Amazyu Amiza. Po abaputi abasongo na bamanyisi aba Ndaghilo poka, sona na balongozi aba Chiyuda bakiza kukwache 2nukumulalusya ukuti, “Tubuzye, nkimba bulaghili boni bubo uli nabo pakubomba zinizi? Nkimba we wenu akakupa ubulaghili bunubu?”
3U Yesu akabamula akati, “Leka imbalalusye ilalusyo lyoka bulo. Mumbuzye, 4nkimba ubulaghili bubo u Yohani akozezyanga nabo bukafuma kwa Chala, pamo ku bantu?”
5Bakanda pakudalinkana benebene ukuti, “Nkimba tunganena ichoni? Nanti tukuti bukafuma kwa Chala akwiza pakunena ukuti, ‘Choni chicho mutakamusubilagha u Yohani?’ 6Loli nanti tukuti bukafuma ku bantu, ichilundilo chosi icha bantu chikwiza pakutusumba na mabwe pakuti bosi bazimenye ukuti u Yohani akaba mulaghuzi wanaloli.” 7Po bakamula bakati, “Awe, tutamenyeko kuko bukafuma.” 8Po u Yesu akababuzya akati, “Nane ntakwiza pakubabuzya ubulaghili bubo indi nabo ubwakubombela zinizi.”
Ichili icha balimi mumughunda uwa mampesya
(Mat. 21.33-46; Mlko. 12.1-12)
9 #
5.1
Po u Yesu akabataghila abantu bala ichili ichi, “Kukabako umuntu yumo, yuyo akabyala amampesya mughunda wache. Akabazimya abalimi abanji, po umwenecho akafumapo nukwikala kulakula akabalilo akatali. 10Bo akabalilo kakwana akakuyabila amampesya, umuntu yula akamutuma uwambombo wache ku balimi bala ukuti bamupe amampesya ghache. Loli abalimi bala bakamukoma uwambombo yula nukumubwezya nyobe zyene. 11Po umwenecho uwa mughunda yula akamutuma uwambombo uyunji, loli abalimi bala bakamukoma, sona bakamusamula akabibi nukumunyosya nyobe zyene. 12Umwenecho uwa mughunda yula akamutuma sona uwambombo uwabutatu. Abalimi bala bakamuvulazya nukumusumbila kuzi kwa mughunda uwa mampesya ghula. 13Po umwenecho uwa mughunda yula akati, ‘Nkimba imbombe choni? Inkwiza pakutuma umwana wane umughaniwa, lumo bakwiza pakumuchindika.’ 14Loli bo abalimi bala bamwennya umwana yula, bakanda pakunenezannya ukuti, ‘Yunuyu mwana wache, yuyo akwiza pakupyana ichilingo icha wise. Zagha tumughoghe umwakuti ichilingo chibanje chitu!’ 15Po bakamusumbila kuzi kwa mughunda nukumughogha.”
U Yesu akalalusya akati, “Nkimba umwenecho uwa mughunda akwiza pakubomba choni nabo abalimi bala? 16Akwiza pakubaghogha abalimi bala nukubazimya umughunda ghula abalimi abanji.”
Bo abantu bivwa zinizi bakati, “Mutakanenaye bunubu.”
17 #
Mas. 118.22
U Yesu akabennya nukubalalusya ukuti, “Po nkimba Amasimbo ghanagha ghakung'anamula choni?
‘Ibwe lilyo abazengi bakalikana ukuti lite ni mbombo,
ilelo lyaba lyakulondiwa nkani ukuchila amabwe ghosi.’
18“Umuntu wesi yuyo awila pibwe ili akwiza pakusanyantuka, loli nanti ibwe ili lyawila pa muntu, likwiza pakumusya.”
Bakumulalusya u Yesu nizya kusonka umusonko
(Mat. 22.15-22; Mlko. 12.13-17)
19Abamanyisi aba Ndaghilo na baputi abasongo bakayezya pakumulema u Yesu umwalubilolubilo pakuti bakazyaghannya ukuti akanenagha ni zyabo muchili chilachila, loli bakanyilagha abantu bala. 20Po bakalonda akabalilo akiza. Bakababeka abatendezi bamo ukuti baboneke banaloli nukubatuma ukuti bamuteghe u Yesu na malaluzyo, ukuti bamubike munyobe izya mulaghili uwa Chiloma. 21Abatendezi bala bakamulalusya u Yesu bakati, “Wee Mumanyisi, tuzimenye ukuti zizyo ukunena nukumanyizya zyanaloli. Tuzimenye ukuti utakwennya akabonekele aka muntu, loli ukumanyizya ubwanaloli bubo u Chala akulonda ukuti abantu babombaye. 22Tubuzye, nkimba Indaghilo zyitu zikutwitikizya pakusonka umusonko kwa Kesale pamo awe?”
23Loli u Yesu akennya ubuzimbuli bwabo nukubabuzya ukuti, 24“Mundanjizye isalabazya yoka. Nkimba icheni ni tabwa vivyo vili apa vya wenu?”
Bakamula bakati, “Vya Kesale.”
25Po u Yesu akati, “Ivya Kesale mumupe u Kesale; ivya Chala mumupe u Chala.”
26Po abantu bakapotwa pakumutegha pa zizyo akanena pachilundilo icha bantu. Po bakaba bulo myee pakuti ilyamulo lyache likabamala amahala.
Bakumulalusya u Yesu nizya kuzyuka kubufwe
(Mat. 22.23-33; Mlko. 12.18-27)
27 #
Imbo. 23.8
Po aba Sadukayi bamo babo bakatinji abantu bate bakazyuke kubufwe, bakiza kwa Yesu nukuti, 28#Ukk. 25.5“Wee Mumanyisi, u Mozesi akatusimbila ululaghilo ulwakuti, ‘Nanti umwanavuli afwa nukumuleka umuchi ukusita ukupapa nawe abana, uwamwabo uwa mwanavuli yula amupyane umufwilwe yula umwakuti apape nawe abana, babo bakwiza pakubasenda ngati bo bana aba muyazi yula.’ 29Kukabako abawamwabo seveni. Usongo akasenda nukufwa umusita bana. 30Po uwabubili akapyana umufwilwe yula, 31sona nu wabutatu. Bosi seveni bala bakabomba bunubu. Bosi bakafwa abasita bana. 32Pabumalilo, umukolo wepe akafwa. 33Pisiku ilyakuzyuka kubufwe, nkimba umukolo yula akwiza pakuba muchi uwa wenu pakuti bosi seveni bala bakamusendapo?”
34U Yesu akabamula akati, “Abanavuli na bakolo aba masiku agha bakusendana, 35loli abanavuli na bakolo babo babaghiye pakuzyuka kubufwe nukwikala mumasiku ghagho ghakwiza batakwiza pakusendana. 36Bakwiza pakuyana bulo na bantumi aba kumwanya, umwakuti batakwiza pakufwa nalumo. Abene bana aba Chala pachifukwa chakuti bazyuka kubufwe. 37#Ukf. 3.6Loli nizya kuzyuka kwa bantu kubufwe, u Mozesi akasimikizya pabuzilo bubo bukunena nizya ukwaka kwa mpanya. Akamwitizya u Mwene ukuti, ‘U Chala uwa Abulahamu, nu Chala uwa Yisaki, sona nu Chala uwa Yakobo.’ 38Kokuti we Chala uwa bantu abumi, ate uwa bantu abafwe.”
39Abamanyisi bamo aba Ndaghilo bakanena bakati, “Wee Mumanyisi, wamula akiza.” 40Pakuti nayumo umuntu akajimbagha umoyo pakumulalusya sona.
Nizya Kilisitu u Mwana uwa Devedi
(Mat. 22.41-46; Mlko. 12.35-37)
41Po u Yesu akabalalusya akati, “Nkimba choni chicho amwe mukuti u Kilisitu we waluko ulwa Devedi? 42#Mas. 110.1Pakuti umwenecho u Devedi mwibuku ilya Masalimo akati,
‘U Mwene akamubuzya u Mwene wane akati:
Ikala kunyobe yane indilo
43mupaka imbabike abalwani bako
kusi kunyayo zyako.’
44“U Devedi umwenecho akamwitizya ukuti, Mwene, po u Kilisitu angaba buli-buli uwaluko ulwa Devedi?”
U Yesu akubasoka abantu nizya bamanyisi aba Ndaghilo
(Mat. 23.1-36; Mlko. 12.38-40)
45Bo abantu bosi bakumuteghelezya, u Yesu akababuzya abamanyili bache akati, 46“Mubanje maso na bamanyisi aba Ndaghilo, babo bighanite pakwendakwenda bo bavwalite inkazo zyabo intali nukuti abantu babalamukaye nu muchizi muminalo. Bakwighana pakwikala pa vitengo ivyapamwanya munyumba izyakwiputilamo nukwikala pabuzilo ubuchindamu palusekelo. 47Bakubazimbula abakolo abafwilwe nukubafyula ivintu vyabo vyosi nukwiputa inyiputo intali ukuti abantu babennye. Abantu aba bakwiza pakufundiwa nkani!”
Valið núna:
Luka 20: LMBNT2016
Áherslumerki
Deildu
Afrita
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Lærðu meira um Ulufingo Ulupya