Luka 13
13
Abantu babo batapindukite bakwiza pakufwa
1Pakabalilo kalakala pakabapo abantu bamo, babo bakamubuzya u Yesu nizya ba Galileya, babo u Pilati akabaghogha, bo bakubika ivyakwiyipa kwa Chala. 2U Yesu akabamula akati, “Nkimba mukwinong'ona ukuti abantu aba mu Galileya, babo bakaghoghiwa bunubu bakaba bambibi nkani ukuchila abantu aba mu Galileya bosi abanji? 3Awe! Inkubabuzya ukuti nanti mutakupinduka nukuzileka imbibi zyinyu mwebosi mukwiza pakufwa ukuyana na mumo bakafwila. 4Nkimba buli nizya bantu 18 bala babo bakafwila mu Silowamu, bo inyumba yiyo yighelesanizye yikabadilimukila. Nkimba mukwinong'ona ukuti bakaba bambibi nkani ukuchila abantu bosi, babo bakwikala mu Yelusalemu? 5Awe! Inkubabuzya ukuti nanti mutakupinduka nukuzileka imbibi zyinyu mwebosi mukwiza pakufwa ukuyana na mumo bakafwila.”
Ichili icha ikuyu lilyo litakwela ivikomwa
6Po u Yesu akababuzya ichili akati, “Kukabako umuntu yumo yuyo akaba nikwi ilya ikuyu, lilyo likaba mumughunda wache uwa mampesya. Akabuka ukuti ayabemo ivikomwa, loli atakazyaghamo. 7Po akamubuzya umulimi yula akati, ‘Ennya, nizagha kuno amaka matatu pakulonda ivikomwa mwikuyu linili, loli ntakuzyaghamo. Chidumule! Choni chicho chendelelaye pakunangannya umuvundo?’ 8Loli umulimi yula akamula akati, ‘Wee Mwene, chileke tasi umwaka ghoka. Inkwiza pakukumba ichiliba mulubazu umwakuzyungulila nukubikamo umuvundo. 9Po nanti ikwi lyela ivikomwa umwaka ghugho ghukwiza chizapo, loli nanti litakwela ivikomwa po ungalidumulalyo.’ ”
U Yesu akumupozya umukolo uwakupetama umusana Pisiku Ilyakutuzya
10Pisiku limo Ilyakutuzya u Yesu akamanyizyanga munyumba iyakwiputilamo. 11Mulamula mukaba umukolo yumo, yuyo akaba nu muzimu umubibi, ghugho ghukamupela ukuti abine amaka 18. Akapetama umusana, umwakuti akapotwanga pakugholoka napo panandi. 12Bo u Yesu amwennya, akamwitizya nukumubuzya ukuti, “Wee mukolo, wasatuka muntamyo zyako.” 13Akabika inyobe zyache pa mukolo yula, umwalubilolubilo akagholoka nukumupalizya u Chala. 14#Ukf. 20.9-10; Ukk. 5.13-14Usongo uwa nyumba iyakwiputilamo akakalala nkani, pachifukwa chakuti u Yesu amupozya umuntu Pisiku Ilyakutuzya, po akababuzya abantu akati, “Pali amasiku sikisi ghagho tubaghiye tubombaye imbombo, po mwizaghe pa masiku ghanagha ukuti mupole, loli Pisiku Ilyakutuzya, awe.”
15U Mwene akamwamula akati, “Mwe bazimbuli mwee! Nayumo umuntu mumwinyu, yuyo akusatula ing'ombe pamo impunda pakubuka nayo ukuti ayipe amizi Pisiku Ilyakutuzya? 16Ilelo pano pali uwaluko ulwa Abulahamu, yuyo apinyiwe nu Satana amaka 18; po nkimba atangasatuliwa Pisiku Ilyakutuzya?” 17Bo u Yesu anena zinizi, abalwani bache isoni zikabalema. Loli abantu bosi bakahoboka ni vintu ivyakuswighizya nkani vivyo akabomba.
Ichili icha mbeyu iya muzimwa
(Mat. 13.31-32; Mlko. 4.30-32)
18U Yesu akalalusya akati, “Nkimba Ubumwene ubwa Chala buyanite ni choni? Ningabombela ichoni pakubufwanikizya Ubumwene ubwa Chala? 19Buyanite bulo nu muntu yuyo akusenda imbeyu iya muzimwa nukupesa mumughunda wache. Ichibyalwa chikukula nukuba likwi, umwakuti utuyuni tukwiza nukulukamo ivivumbo vyabo musamba zyache.”
Ichili icha chilungo
(Mat. 13.33)
20U Yesu akalalusya sona akati, “Nkimba ningabombezya ichili choni pakubufwanikizya Ubumwene ubwa Chala? 21Buyanite bulo nu mukolo yuyo akusenda ichilungo nukongannya ni ndobo zibili izya busu mupaka ichinyenya chosi chikatutumuka.”
Nizya mulyango umufinye
(Mat. 7.13-14, 21-23)
22Bo u Yesu akubuka mu Yelusalemu muzila akamanyizyanga abantu mutwaya utukulu na mutwaya tosi. 23Umuntu yumo akamulalusya akati, “Wee Mwene, nkimba bantu abanandi bulo babo bakwiza pakupokiwa?”
U Yesu akabamula akati, 24“Yezya nkani pakwinjila pamulyango umufinye. Pakuti abantu abinji bakwiza pakuyezya nkani pakwinjilapo, loli bakwiza pakupotwa. 25Umwenecho uwa nyumba akwiza pakunyamuka nukwighalila umulyango. Po amwe mwe muli kuzi mukwiza pakukong'osya pamulyango nukuti, ‘Wee Mwene, twighulileko.’ Loli u Mwene akwiza pakwamula ukuti, ‘Awe, intamenyeko kuko mwafuma.’ 26Po mukwiza pakwamula ukuti, ‘Tukalyanga nukung'wela poka nawe. Ukamanyizyanga mutwaya twitu utukulu.’ 27#Mas. 6.8Loli akwiza pakunena sona ukuti, ‘Intamenyeko kuko mwafuma. Epako, mwe bantu ababibi amwe.’ 28#Mat. 22.13, 25.30; Mat. 8.11-12Mukwiza pakulila nukusyeketula amino bo mukumwennya u Abulahamu, nu Yisaki, nu Yakobo, sona na balaghuzi bosi mu Bumwene ubwa Chala, bo amwe mukusumbiwa kuzi. 29Abantu aba kubufumilo naba kubwinjililo ubwizuba, sona naba kumitu na kuntende bakwiza pakwikala pasi palusekelo mu Bumwene ubwa Chala. 30#Mat. 19.30, 20.16; Mlko. 10.31Po bosi babo babumalilo bakwiza pakuba bakwanda, sona bosi babo bakwanda bakwiza pakuba babumalilo.”
Ulughano ulwa Yesu pa Yelusalemu
(Mat. 23.37-38)
31Pakabalilo kalakala aba Falisayi bamo bakiza kwa Yesu nukumubuzya ukuti, “Wepeko kuno nukubuka kumo, pachifukwa chakuti u Helodi akulonda pakukughogha.” 32U Yesu akabamula akati, “Kamubuzye ukambwe yula ukuti inkwefya imizimu imibibi nukupozya ababine ilelo ni ndabi bulo, sona pisiku ilyabutatu inkwiza pakumalizya imbombo yane.” 33Loli imbaghiye pakubuka pa bulendo bwane ilelo, indabi ni siku ilinji pakuti chitabaghiye ukuti umulaghuzi afwile kubuzilo uyunji, loli mwene mu Yelusalemu.
34“Wee Yelusalemu, wee Yelusalemu! Ukughogha abalaghuzi nukubatiza na mabwe intumi zizyo u Chala akutumiye! Akabalilo akinji nalondagha pakubabungannya abana bako ukuyana na mumo inkuku yikufukatilila utwana twache muvipapande, loli utakanyitikizya. 35#Mas. 118.26; Yel. 22.5Ennya ilelo Inyumba yinyu iya Chala yikwiza pakuba chisami. Inkubabuzya ukuti ukwandila pakabalilo aka, mute mukanyennyepo nalumolumo mupaka munene ukuti, ‘U Chala amusaye yuyo akwiza mwitabwa ilya Mwene.’ ”
Valið núna:
Luka 13: LMBNT2016
Áherslumerki
Deildu
Afrita
Want to have your highlights saved across all your devices? Sign up or sign in
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Lærðu meira um Ulufingo Ulupya