OTSAK 4
4
Peter eina John Hanga̱wui mangali Kakā
1Peter eina Johnna yaruili matuimahungda leilakha, pāngmonbing, khorumshim kashina akhavābing kala Sadduceebing rārāsai. 2Anina Jishu kathiwui eina ringkhaluiwi tui tamkachithei chiwui vang athumna malungvāthaowa. 3Chieina anili tukkhuida ngayā phāthopli narpihaowa, kaja tukkakhui atam chi kazing yinghairasai. 4Kha aniwui tui kashā mi kachungkhana shitsanghaowa, kala shitkasang mi thingphangā sha̱kha kashunghaowa.
5Akhama kathā athumwui kathānabing eina ararbing kala ain kathemabing zangda Jerusalemli kazipa. 6Kakazip chili Annas pāngmon khareila, Caiaphasla, Johnla, Alexander kala pāngmon khareiwui shimkhur saikorala zanga. 7Anili alungthungli nganing ngasaklaga ngahāna, “Khiwui pangshap eina kala khipāwui ming eina nanina hi kasākhala?”
8Chieina Manglā Katharana pemkahaiya Peterna hānga, “Yaruiwui kathānabing kala ararnaobing! 9Inina phei kateka mi akhali kaphā ot sāmi kahai, ali kathada raimihaokhala da inili hānglu jiakha, 10hi nathum saikora, kala Israelwui mi saikorana theikhuiranu kaja nathumna krushli shaothat kahaia kala kathiwui eina Varena ringlui ngasak kahaia Nazarethwui Jishu Khristawui ming chiwui pangshap eina mipā hili raimihaida nathumwui mangāli nganingli. 11#Laa 118.22. Hi nathum shim kasābingna horkahai kha achithekwui akhoka sāthui kahai lunggui china. 12Huikhami hi khangatei khipākhawuilila maleimana, okathui hupva̱li mibingwui ngachaili aming hi maningla khangatei huimishapa aming mikahai maleilakmana.”
13Hangva̱naobingna Peter eina Johnwui kaping chi theilaga kala ani lairik makatama mina kaji phaningvālaga matakhakhaowa. Chieina ani Jishuli ngasosai kaji athumna theikhui. 14Kha kakazā raimi kahai mipā chi aniwui ngalemli khanganing chi athumna theilaga athum khikha hānglui khavai maleithuwa. 15Chieina anili hanga̱shimwui eina shoksāpaira da hānglaga athum akha eina akha ngazek ngarokta hānga, 16“Ithumna anili khi kasā phameirakhala? Jerusalemli khalei mi kachiva̱na anina matakhak kahai sākahai chi theihaira, kala ithumna chi makhamayā masārarmana. 17Kha ara hili lāngda tui hi mangayao khavai, kaja Jishuwui ming singlaga mamatuilui khavai anili hāngmachinhaosa.” 18Chieina athumna anili hozangkhuilaga, Jishuwui ming singda khamatuila, tamkachitheila masāpailakmara da hāngluishita. 19Kha Peter eina Johnna athumli ngahānkai, “Varewui miktāli awui tui khanganāli nathumwui tui khanganāna mashungmeila, nathum khalatta machukyanglu. 20Kaja ithumna kathei, kashā chi makahāng masārarmara.” 21Chi kahāng eina athumna mibingli khangacheewui vang, anili kashong lāngkhavai shongfa masamphangthuda hāngmachinlaga thuingasakhaowa. Chi mi saikorana theilaga Vareli masot chikata. 22Matakkhak kahai otsak eina raimi kahai mipa chi zingkum hangmati lānghairasai.
Shitkasangbingwui Seihā Kasā
23Anili chiho kahaiwui thili ngasotnaobingwuili vāda pāngmon akhokabing eina ararnaobingna hāngkahai saikora chi vahāngchithei. 24#Sho 20.11; Laa 146.6. Tui chi shālaga, athum khokkha sāda Vareli masochikatta hānga, “Kazingram, okathui kala shamadru kala chiwui alungli khalei saikora kasā Sashap-pangshapa Proho! 25#Laa 2.1-2. Manglā Katharawui pangshap eina nawui rao, ithumwui avāva̱ Davidli awui khamor eina hithada hāngkhangasaka;
‘Khisāda Gentilebingna malungvātkhala?
Khisāda mibingna aremawui ot phaningphāphākhala?
26Okathuiwui awungabingna ngaranda,
kala khamungabing kazip ngarumda,
Proho kala awui Thaoh neomi kahaiali yangshi.’
27 #
Laa 2.1-2. Kaja nana thao neomi kahai nawui rao kathara Jishuli yuishida, Herod eina Pontius Pilatena Gentilebing eina Isrealnaobingli ngasoda keinung hili kazip kachangkhata; 28athumna kakazip hi nawui pangshap kala kaphaning eina shokkhavai ngarānping kahaina. 29Ara, Proho, athumwui khamachit hi nana yangmida, nawui raobingli malung pinglak eina nawui tui matui ngasakmilu. 30Raimi khavai napāng katingshokmilu kala nawui kathara rao Jishuwui ming kasing mangā eina matakhak kahai kala machutkakhui sapai khavai mayāmilu.” 31Seihā sāchang kahai eina athumna kakazip apam chi nganukhaowa; kala athum saikora Manglā Katharana pemhaida Varewui tui pinglak eina matui.
Shitkasangbingwui Lan Khangarum
32 #
Ots 2.44-45. Chitharan shitkasanga saikora ningla khokkha sāda leisai, kala khipānakha awui khalei lan chi awuina da maphaningla khalalei saikora yarui katongawuina da phaninga. 33Paokazatbingna pangshap leilak eina Proho Jishuwui ringkhaluiwui shākhi mi kala athum saikorawuitungli Varewui sokhami heirormi. 34Athumwui alungli khavāta mi akhala maleisāmana, kaja atam atamli shimla luila khaleibingna chi yorhailaga samkaphang pheisā saikora khuiungda, 35paokazatbingwui pāngli horsangmi, kala khavāt khalei mi kachiva̱li ngayarmi.
36Chithada sāda Cyprusli kapharā Joseph kaho Levi akha, paokazatbingna Barnabbasla kaphoka, (chiwui kakhalata “Kasatkasangwui naomayara”) ana, 37awui lui yorhailaga samkaphang lupā chi paokazatbingwui pāngli horsangmi.
Valið núna:
OTSAK 4: TANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.