LUKAQ 23
23
Jesuq Ka Pilat Rung Na Tiichapto
(Mot 27.1-2,11-14; Mak 15.1-5; Joh 18.28-38)
1Krai mren, Rung welabi thun ka tsangshiq ngongthun kra lot raütiishe, tri raü ka shatje miishe, wiikongtam tiido rang riito. Raüta, Jesuq ka Pilat rung niishe sheahoto. 2Raüta, tsangshiq raq apaiq ma kha ka akha nyanto, “Arwe ariiraq, naishiq nok mungmaiqse thun kriika, mungshuk lam phan na sheaho wa, naishiq raq apaiq ara lap wan kai. Apaiq raq Roman Hokham we ma phunta kewan ra mak nguta mungmaiqse ka tiishontlo chhi tiikai. Kiimaq, apaiq ka naishiq Jehudinok mung thaq na Khristo nguta tiichongtlo. Kriika hokham we nguta tiingo riito.”
3Kiijiishe, Pilat raq, “Riita ümniika Jehudinok hokham we dea sha?” nguta Jesuq ma waito.
Kiijiishe, “Ümniiraq ngutlaü kata,” nguta Jesuq raq apaiq bom ka treto.
4Kiijiishe, Pilat raq ramwe jongbi nai mungmaiqse thungtlaq kiima, “Ngi raq arwe dü na apaiq tsaili chang kha ahü, jam min chhi mang,” nguta chongkuqto.
5Shatmaq, tsangshiq raq kra thaq na achaq awaq miishe, “Apaiq raq trahokuqtlaq kra lümaq, Judia wang tlotli na mungshuk tatso wa she tiinyai chaqto. Apaiq raq ara traho bomchong kewan arka, Gelili wang maq phaho raüta, ümchaü sanha, ajiishe saühoto,” nguta khoti kha nyan bomtsi kriika tiitsin wan wan she riito.
Jesuq Ka Herod Rung Na Tiichapto
6Pilat raq ara tai raüta, “Riita arwe arka Gelili hiqti sha?” nguta waito. 7Apaiq raq Jesuq ka Herod sengi hiqshong wa nguta sap raütiishe, Jesuq ka Herod rung niishe tiishea wanto. Kra bala Herod ka Jerusalem na aki chato. 8Herod raq Jesuq tsaki tsütsa kra tai wan li miika, rahiq ka luhea she riito. Kiimaq, apaiq ka Jesuq rai riihum hajaq nguta kongkhuji miiphü she tiimashat dongdii riito. Apaiq riika, Jesuq raq awang chang jaqsham mitiichhi kuq sham nguta kheto. Kriikha maq, apaiq ka Jesuq chhi raüta kai khoqriiq khiq riito. 9Krai mren she, Herod raq Jesuq ma bom ka pahea waisoto. Shatmaq, Jesuq raq apaiq bom ka poshi min tre mak riito. 10Ramwe jongbi nai Thungtri shrinketibi raq, Herod man na chap raüta, Jesuq ma achaq awaq kha pahea nyanto.
11Herod raq apaiq phenlanok rai adam maq, Jesuq ka pinthum haihii siqto. Kiimaq, tsangshiq tarü raq thophi riiqphi saisito. Raütiishe, apaiq raq tsangshiq ma, apaiq dü na bannin kheathum ajong hokhambi raq samchang ashi kriishe tiisam kuq ronglaq nguta thaüto. Kra lot jai she, Herod raq Jesuq ka Pilat rung niishe hali tiisheaho nongto. 12Kra ranaiq liipan niili, Herod nai Pilat ka silu miishe jakito. Kongkhu ji niika, tsangnai liipan na, wesang ralii ikhli sito.
Jesuq Tsea Baiq Kha Tanto
(Mot 27.15-26; Mak 15.6-15; Joh 18.39—19.16)
13Kiijiishe, Pilat raq ramwe jongbi, welabi nai mungmaiqse thun ka adam na heato. 14Raütiishe, apaiq raq tsangshiq ma akhiishe chongto, “Namshiq raq arwe ara ngi phana shea wan lan. Kiimaq apaiq raq nokwe tiishon tlo nguta kha nyan tlan. Ümchaü ngi raq, apaiq kha ka namshiq man na pho kang she. Shatmaq, namshiq raq apaiq dü na kha ümchuwa nyan tlan, kriika, ngi raq chhi mang, ahü. Apaiq ka maiqsang, shutmak. 15Kiimaq, Herod riimin apaiq shut lam kha ka hum mak dea. Kriikha maq, Herod raq apaiq ka nashiq phana hali tiishea wan nongto. Arwe raq apaiq miisaq thumli chang ka, jamlai phan mat atsa min tang mak dea. 16Kriikha maq, ngi raq ümchaü apaiq ka, chunpo- nyam chongwai maq ninta tiitsat latli she, midii baiq ha.” 17Tiichhii Wan Poitek, Pilat raq tsangshiq ma phaqtek mong wa maiq ashi ka tiidong kuq ruq riitlo.
18Kiijiishe, mungmaiqse ümchuwa thung tlaq kra raq, kiqshi maq, “Apaiq ka tsatbaiq tlo ronglaq! Barabas ka naishiq ma tiidong kuq laq!” nguta gitrangto. 19(Barabas ka kra chela na mungshuk mat tiidong kha na nai maiq tsea kha na, phaqtek na ashaq thü riito.)
20Pilat raq Jesuq ka khalotke wanro riito. Kra kha maq, apaiq raq mungphong thung tlaq kriima, jangshi ri hali rüm raüta, bom ka tiima tiima rong liina nguta hali chongkuq nongto. 21Shatmaq, tsangshiq raq apaiq bom ka tiipatsaq hali, “Apaiq ka pumsongkham na tübaiq ronglaq! Tübaiq ronglaq!” nguta gitrang wan nongto.
22Kiijiishe, Pilat raq, “Riita apaiq raq jamlai mat atsa wa tangta? Ngi raq apaiq dü na, apaiq miisaq tiithumli chang khü akha jam min chhi mang, ahü! Ngi raq apaiq ka chunpo-nyam chongwai maq ninta tiitsat latli mitiidong baiq ha?” nguta tiithongtsam she hali tsangshiq ma chongkuq nongto.
23Shatmaq, tsangshiq ka tsangdang kra khoki nam nam miishe, tiihong raüta Jesuq ka tübaiq ra dongdii nguta gitrang wanto. Kriikha miishe, tsangshiq bom niishe dea kha ka tiisupto. 24Krai mren she, tsangshiq raq jaütaq kra phan phan she, Pilat raq Jesuq ka tsea baiq wan kha she tanto. 25Raüta, mungmaiqse raq shiichut wantaq kra phanphan she, mungshuk kha nai maiqtsea kha na phaqtek na ashaq wanwe kriishe tsangshiq ma tiidong kuqto. Raüta, tsangshiq raq thapthi wantlaq kra phanphan she, apaiq raq Jesuq ka pumsongkham na tübaiq kai miitu, tsangshiq jaq na kiinong kuq baiqto.
Jesuq Ka Pumsongkham Na Tübaiqto
(Mot 27.32-44; Mak 15.21-32; Joh 19.17-27)
26Krai mren she, Roman phenlanok raq, Jesuq ka Pilat jam maq atü baiq kai miishe sheahoto. Tsangshiq ka lam na akairai lam maq, Sairini mungti maiq weshi ka Jerusalem chela na awarai kiiwa riihumto. Apaiq mang ka Simon. Tsangshiq raq Simon ka laphoto. Raüta, Jesuq pumsongkham ka Simon ma ningkun miishe, tiipi raüta, apaiq ka Jesuq jai na tiikhumto.
27Maiqkong pahea raq, Jesuq jai ka phanhoto. Tsangshiq phong niika, jechakre min wiijam asi riito. Tsangshiq ka apaiq miitu, maaho manyi, agi asii watrang la hoqsii trangto. 28Jesuq raq tsangshiq pha nü na tro lii raüta, tsangshiq ma chongto, “Jerusalem nyungre le! Namshiq ka ngi miitu, naq hoq rongkiq. Shatmaq, namshiq maiqmii miitu nai namsetiim miitu hoq ronglaq. 29Ara jamkhano chongtiikang ngukla, liirong laq, tsangshiq raq, ‘Ai, ara akhing ara saühü sehü nyungre ma khoti kopan jonghea!’ nguta tiishudaq akhing misaü wan. 30Kra akhing na, maiqse angu raq, ‘Naishiq ara pat baiq wan tlo laq!’ nguta pum kaü krai mirbom. Kiimaq kin kaü kra nangnga, ‘Naishiq ara paü liilii!’ nguta mingu. 31Riita, ümchaü pesang chong ma santla, atinkhan tiichamchao tlaq jiika, peshin chong miishe ka ümtinkhan she wa tiichamchao wan jiiq riila?” nguta Jesuq raq tsangshiq ma tsii chongkuqto.
32Maiqwe nai anai, tsangnai wiita matwe naisii riito. Kriimin, Jesuq rai lakshi na tübaiq wan miitu sheahoto. 33Tsangshiq ka “Khurii” ngutlaq hiq ba kiiniishe saüki raüta, kiijaq Jesuq ka tübaiqto. Kiimaq matwe nai kiimin, Jesuq ma jaqtsi nü na ashi, kiimaq jaq pha nü na ashi tübaiqto. 34Kiijiishe, Jesuq raq, “I We le, tsangshiq ngarai ka adii riikuq laq! Tsangshiq raq jamlai wa klo tlaq kra sapmak,” nguta nguto.
Tsangshiq raq langlii raüta, apaiq khea ka tsangshiq liipan na riipheato. 35Nokwe thun ka kra thun kra liisea chapkito. Kiimaq Jehudinok welabi raq, “Apaiq raq nanok ka chhii kuqto. Ümchaü min, apaiq ka Shiikeawe raq ashong Khristo dea jiika, apaiq khum ka mitiichhii liina!” nguta apaiq ka shummii siqto.
36Phenlanok riimin, apaiq ka haihiito. Tsangshiq ka apaiq tho na ki raüta, thiinin phan spiqtai kra apaiq ma kuqto. 37Raüta, “Ümniika Jehudinok hokham we jiika, ümkhum ka ümniiriili tiichhii liina!” nguta slailiisiqto.
38Apaiq khupo thaq niika ara bomtsi ara waiq thüto: “Arhata Jehudinok Hokhamwe.”
39Matwe nai kiijaq tiipaq raq raq kiiwa, weshi raq: “Ümniika Khristo riimak sha? Ümkhum krai nainai khum armin chhii kuq dam liina!” nguta slailiito.
40Shatmaq, kiiwa weshi raq, “Ümniika Shiikeawe ma hai maü sha? Ümniiraq ho phaq tlaü kiimin apaiq raq ho phaq tlaq kiikhiisii ho phaq tlaü. 41Nanai raq ho tiikai arka, riikhaqli ho tiikai. Nanai chamchao tiikai arka, nanai raq jamlai kha wa tang kai, kra mat hotiikai. Shatmaq, apaiq riika, jam min shutphit mak dea,” nguta arewe ka sonto. 42Kra bom jai she, apaiq raq, “Jesuq le, ümtiikiiwa ümniika Hokham ma ja laüta saüki tlaü, kiitiikaq ngi ari ümtsan na tiitsang laq!” nguta Jesuq ma chongto.
43Kiijiishe, Jesuq raq, “Ngi raq chongtiikang arka tengteng. Ümchaü ranaiq li, ümniika ngi rai Ramungtan na misaü haü,” nguta apaiq bom ka treto.
Jesuq Langpit
(Mot 27.45-56; Mak 15.33-41; Joh 19.28-30)
44Ranaiq nari roqshi ri anai na rashe kii ka abang she riikito. Kiimaq kra mung tlotli na raji nari tsam na saüli ranyaq kito. 45Kiimaq Shomjam mong na asii khok rai chang kheathum kaü jonghea achan kriika among ba maq mannai ma tiikholiiq tiichai kito. 46Kiimaq, Jesuq raq tiihong raüta, “I We lei, i wenyi ka ümjaq khon na kiinong kuq tiikang!” nguta gito. Apaiq raq ara ngu raütiishe, alang ka tiipitto.
47Phentuwe raq arthun ara chhito. Kiimaq apaiq raq, “Ngohea dea, apaiq arka kechu maiqse dea,” nguta Shiikeawe ka tiitsamto.
48Kiijaq mungmaiqse kra mra jonghea pin wantaq kra liikai aki raiwi thun raq, kra hongtha rai wantaq thun ka wiita chhito. Raüta, tsangshiq ka tsanbi tsi ma maaho manyi wa trang liishe maiqmii jam na jang wanto. 49Maiq pahea, Jesuq rai mang riisap shattibi thun nai apaiq jaiphanti bi jechakre, Gelili wang wa aki dam thun kriika, phanshi alu linlin na chap raüta, kra mra pinjin wantaq thun kra liishat maq kheto.
Jesuq Malap
(Mot 27.57-61; Mak 15.42-47; Joh 19.38-42)
50-51Kiijaq Judia wang wa Arimithia chela na siti maiqwe ashi amang min Joseph nguta asi. Apaiq ka maiqshaq, kiimaq shiilang weshi riito. Apaiq ka Shiikeawe Mungtan saüho kra kheti we ashi riito. Apaiq ka Jehudinok Rung wa wela ashi li riikiimin, tsangshiq raq mat kha tankhan wantaq kiijaq apaiq ka pong dam mak dea. 52Apaiq ka Pilat phana waraüta Jesuq ma ka jaü wato. 53Kra raütiishe, apaiq raq Jesuq ma ka pumsongkham wa tiisat lamto. Raüta, raihi-nairai kheathum maq jobto. Raütiishe, longsha makho, anye tingsang ashi asi kiijaq lap thüto. 54Kra ka hukutbat ranaiq. Kiimaq kra akhing ka Asii Niitiitsak ranaiq phaho she riito.
55Jechakre, Gelili hiq miiphü Jesuq jai phan kongshi akidamti thun kiimin, Joseph rai kidam raüta, kra makho ka lii thüto. Kiimaq, Jesuq ma ka makho mong na jamkho saiqsamtaq kriimin samhea tiitsang liithüto. 56Raütiishe, tsangshiq ka jam niishe jang wanto. Kiimaq maiq ma na nyat kai miitu, süse tapan nai homseng win ka tiije rit thüto.
Thungri na chongtlaq kra phanphan, Asii Niitiitsak ranaiq ka apii haito.
Valið núna:
LUKAQ 23: TANGSBSI
Áherslumerki
Deildu
Afrita
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.