LUKAQ 19
19
Jesuq Nai Jekias
1Akhing ashi na, Jesuq ka Jeriko chela mong lam maq alea wan awarai riito. 2Kiijaq maiq phunta hiti maiqla ajong weshi asi. Apaiq mang ka Jekias. Apaiq ka chiithe jong. 3Apaiq raq Jesuq ka juwa chhiha jiila nguta, kai tsinnginto. Shatmaq, apaiq ka maiqtoqse. Kiimaq maiqphong raq tsapho raüta, apaiq raq Jesuq sham ka chhilot mak riito. 4Kriikha miishe, apaiq ka sinkhu na ju raüta, tam chong ashi kiijaq dü wato. Raüta, Jesuq ka lam maq alea wan kiiwa lii ma nguta kheho lito. 5Krai mren, Jesuq ka kra ba niishe saüho raüta, apaiq raq ra nü na liito. Raüta, Jekias ma akha bomto, “Jekias, satki tlo laq. Ümchaü ranaiq ngi ka ümjam na dü wan ra dongdii.”
6Kra tai raüta, Jekias ka pechong maq satkisaq raüta, Jesuq ka ajam niishe shea wanto. Kiimaq chojong chise maq tao wanto. 7Kiimaq tsangshiq raq kra chhi raüta, “Arwe arka Mosheq Thungtri lang mak ngarai we jam na dü wan wawanto!” ngutiishe bottrangto.
8Kiimaq, Jekias ka tarü man na chap raüta, Tatiwe ma chongto, “Shiilangwe le liilaq. Ngi raq ita iwii hupsam sitlaq kriiwa, mannai na phea lata, manshi kra miitsan miijan maiqse miishe miphea kuqha. Kiimaq ngi raq maiq weshi ra la laolii wan kang jiila, kra thaq na manblai tliip lata mitham kuqha.”
9Kiijiishe, Jesuq raq tsangshiq ma chongto, “Ümchaü ranaiq Shiikeawe raq ara jamkun ara chhii wanto she. Ara jamkhano chong tiikang ngukla, apaiq armin Abraham saüse phan sii. 10Maiq Se saükitaq kriika, akha amo amii arki maiqse thun kra ritkai nai atiichhiike kai saükito.”
Chaq Kampho Sii Maq Shiiton
(Mot 25.14-30)
11Nokwe raq apaiq bom chongke kra tai rea na, apaiq raq tsangshiq ma ara shiiton bomtsi ashi ariiri chong kuqto. Apaiq ka Jerusalem na saüho nini she riito. Kiimaq tsangshiq raq tiima ka, Shiikeawe Mungtan ka saüho nam nam she sham nguta tiimato. 12Kriikha maq, apaiq raq tsangshiq ma akha phankuqto, “Akhing ashi na, welawe ashi asi riito. Apaiq ka luhea na maiq mung ashi kiijaq, hokham jaqsham jaükai kihoto. Apaiq ka hokham ma shongjai she, maiqmii mung na hali jang wan nong chang riito. 13Apaiq raq wanhiq kaiho ma, ajaqshisetiim weroqshi ka hea raüta, chaq kampho sii ka siichhuq chhuq phea kuq thüto. Kra pheake wan lam maq, ‘Lii rong laq, ngi tamii shon na, namshiq raq armaq piikii li rong liijo,’ nguta tsangshiq ma tsii chongkuq thüto. Raüta apaiq ka wanhiq na kihoto. 14Shatmaq, tsangmungti raq apaiq ka kai ngengto. Kriikha maq, tsangshiq raq apaiq jai na, tsütsa ka, ‘Naishiq raq arwe arka, naishiq khuthaq na hokham ma tiija wan romai!’ nguta kiimwebi tat raüta bom ka tiichongkito.
15“Riita, kriiwe ka hokham miidea shong wanto. Raütiishe, apaiq ka ahiqshong na jang wan nongto. Raüta, asaüwari tlothit li she, ajaqshisetiim ka, tsangshiq raq piikii ka ümchuwa tliip wantaq, kra lümaq nguta apaiq pha na tiiheakito. 16Krai mren, apha we ka apaiq man na chapto. Raüta, ‘Aki we le, ümniiraq ngi ma chaq kampho sii ashi kuq thü laü irmaq, ngi raq ara chaq kampho siiroqshi she tliip wan kang,’ nguta atijong we ma chongto. 17Kiijiishe, ‘Riikhaqli, ahea,’ nguta apaiq raq bom ka treto. ‘Ümniika maiqshaq jaqshi se ashi dea! Riita, ümchaü min, ümniiraq jaqsham ka akhüse li jiimin, tsapkapkap maq sham wan laü, kriikha maq, ngi raq ümniika chela roqshi thaq na wela miishe mishong kang’ nguta ajaqshi se bom ka treto. 18Kiimahali, ajaqshi se wenai ngoja we kriishe chap wa raüta, ‘Aki we le, ümniiraq ngi ma chaq kampho sii ashi akuq thii haü irmaq, ngi raq chaq kampho sii biingi she tliip kang,’ nguta atijong we chongto. 19Kiijiishe, apaiq raq arwe ma, ‘Ümniika chela biingi thaq niishe wela mija haü,’ nguta chongkuqto.”
20“Kiijiishe, ajaqshi se weshi kra hali chap wa raüta apaiq ma chongto, ‘Aki we le, arjaq ara ümchaq kampho sii ira. Ngi raq phaqchet na thop lata apaü lata thükang. 21Ngi ka ümniima hai tiikang. Ümniika khannyan hea langlangwe. Ümniiriika ümhup ümsam riimak kriimin jaüho tlaü. Kiimaq ümniiraq chhi jangki maü wak ajam kra wiimin, tsam ka jutsiqki tlaü.’ 22Kiijiishe, atijong we raq apaiq bom ka akha treto, ‘Ümnaq arka abi, tsiihü jaqshise. Liilaq, ngi raq ümbomtsi kli she kappe ma tiija lata, ümniika mishin pha! Ümniiraq asap haü, ngi ka khannyan hea langlang we nguta. Kiimaq, ngi la riimak kra wiimin, ngi rii nguta lamhoti we nguta asap haü. Kiimaq ngi raq wak na chhi jang kimang kra wiimin, tsamjut seakaiti we nguta, asap haü. 23Ikhiijiika riikhaqli. Riita, ümniiraq i kampho ka beng na jamto thü wan maü riilaü? Kra ngu raü jiika, ngi raq aliip apha nong nong miishe ningcha ka mipai wan ha chang wa.’ ”
24“Kiijiishe apaiq raq kiijaq maiq chaptlaqti kiima, ‘Apaiq jaq wa chaq kampho sii ka nyea ronglaq. Lanta, siiroqshi rümti we jaqshise kiima kuq ronglaq,’ nguta thaüto. 25Shatmaq, tsangshiq raq treto, ‘Aki we le, apaiq jaq niika siiroqshi ri asi she!’ 26Kiijiishe, ‘Ngi chongpha, tai ronglaq,’ nguta apaiq raq tsangshiq bom ka treto. ‘Ju jaq niiwa phanshi rase asi she dongdii, kriiti thun loweatek miika, Shiikeawe raq kra thaq na apa she hali mitiitsuq kuq nong. Shatmaq, ju jaq niiwa jam min ahü, kriiti jaq wiika, Shiikeawe raq ajaq na jamlai wa chonkhi laqli se sitlaq, kriimin anyea mirho nong. 27Riita, ija, ümchaü min, i jaqtinok, ngi ka tsangshiq khuthaq na hokham ma tiija wan lungwii makti thun kriika, lap wa lanta ana tsiiq wa rongkiq. Lanta, tsangshiq ka ajaq, i makki na jiipbaiq ronglaq!’ ”
Mungmaiqse Raq Jesuq Ka Jerusalem Maq Taoto
(Mot 21.1-11; Mak 11.1-11; Joh 12.12-19)
28Jesuq raq ara tsangshiq ma chongkuq lot raütiishe, apaiq ka tsangshiq ma sinkhu niishe, Jerusalem nü na wawan, lamhong ka sat wanto. 29Apaiq ka Olip Pero Hiqlam siim na Bethphej nai Bethani hiqshong ate kra tho niishe saüho raüta sanha, apaiq raq ajaqshi se nai wenai ma bom tiichong ho sinkhu na tiikiholito. 30Tsangnai ma bom ka akha chongkuq raüta tiikito: “Namnai khaki na maiqhiq shong ashi asi. Kiijaq kironglaq. Lanta, namnai ka kiijaq saüho tlan na, kumtoq kaüshii se ashi, maiq ju min michao pha shaq kaü se kra tiiban shat michhiho han. Kra kaü se kra dü lanta, ana hewan rong laq. 31Maiq ashi ra raq namnai ma, jaram wa diirat holan nguta wai kiiphan la, Tatiwe ma ra tlo ngutli tre rong laq.”
32Krai mren, tsangnai ka kiholi raüta liiki kiita, Jesuq raq tsangnai ma jamkho chongkuq taq, kra phan phan humkito. 33Tsangnai raq kumtoq kaü se ka diirea na, atatinok raq, “Namnai raq ara jaram wa diirat ho lan?” nguta waito.
34Kiijiishe, tsangnai raq, “Tati ma ra tlo,” nguta tsangshiq bom ka treto. 35Kiimaq, tsangnai raq kumtoq kaü kriika, Jesuq phaniishe hewanto. Kiimaq tsangshiq khea thum ka kumtoq kaü raikhü niishe phiikuq wanto. Raüta, Jesuq ka tiinga wanto. 36Apaiq ka kiijaq nga raüta wawanto. Krai mren, nokwe raq tsangshiq kheathum kriika, apaiq walam kiijaq phiikuq wan wan she wawanto.
37Krai mren, Apaiq ka Jerusalem na saüho ma ajeli she, Olip Pero Hiqlam siim na lamhong sat wan chang ba kra jiishe saüto. Kra miiphat she ka, apaiq jai phanti mungnyung mungse wawan dam tlaq kra thun raq, Jesuq raq achong lot mai ümtinkhan wa awang chang jaqsham wantaq thun kra miitu, Shiikeawe ma kechu tumke wan nai apaiq tiitsam kam wan: 38“Shiikeawe le, Tati mang na hokham we kitlaq kiima achu shiiman kuq laq! Ramungtan na khu asang mirlaq! Kiimaq Shiikeawe khushü kli mijong laq!” nguta arii ariiq she wawanto.
39Kra tai raütiishe, nokwe phong na Phorisinok wiijamti asi kriiraq, Jesuq ma, “Shrinketi we, ümjaqshisetiim ma, akhiika naq gisii rongkiq nguta atiitsaq riilaq!” nguta chongto.
40Kiijiishe, “Ngi chongpha, tai ronglaq. Tsangshiq la tsaqki raüla, ara longkaü thun ara riishe misii trangho,” nguta Jesuq raq tsangshiq bom ka treto.
Jesuq Jerusalem Miitu Hoqto
41Apaiq ka Jerusalem chela tho niishe saühoto. Kiimaq apaiq raq chela ka lii raüta, akha nguta 42hoqto: “Ümniiraq ümchaü ranaiq na, khusang maq si miitu jamlai riichang wa, kra sap haü jaq ahea riichang! Shatmaq, ümchaü ümniiraq chhilot maü she! 43Kriikha maq, ümniima akhing she misaü wan, ümniika ümjaqti raq trotam maq, tangphak she mirukbaiq, kiimaq mitangbaiq. Raüta ümniika chela mong na trotam maq mikombaiq. 44Tsangshiq raq ümniika botkhulai rai she mishot baiq wan. Kiimaq chela mong na siti, maiq angu thun kriika, tiimiqchup she mithaü baiq! Ümniiraq ara ümnaq tsai lam riihum tlaü arka, Shiikeawe ka ümnaq tiichhiike kai saüki phaüta, ümniiraq kra akhing ka sap maü dea riilaü, kriikha miishe miqphaq wan tlaü!”
Jesuq Ka Shomjam Na Wato
(Mot 21.12-17; Mak 11.15-19; Joh 2.13-22)
45Kra raütiishe, Jesuq ka Shomjam mong na wato. Raüta, apaiq raq Shomjam mong wa laopan bi thun kriishe jobaiqto. 46Apaiq raq tsangshiq ka, “Asii bomtsi na Shiikeawe raq akha waiq thüto, ‘I shomjam arka achu jaü chang jam nguta mingu.’ Shatmaq, ümchaü namshiq raq ahuk arotti tiibo chang jam miishe tiija baiq lan!” nguta tsangshiq ka ason lam maq jobaiqto.
47Jesuq raq mungmaiqse ma wranaiqshe, Shomjam maq traho bom chongkuqto. Shatmaq Ramwe jongbi nai Thungtri shrinketibi, kiimaq welabi raq apaiq ka atsea baiq chang nguta mat ka tan wan ruq li she riito. 48Shatmaq, mungmaiqse raq apaiq bom chongke traho bomtsi kriika poshi min tiikhea mak maq tai wan ruq riito. Kriikha maq, tsangshiq raq apaiq ka tsatlot mak dea riito.
Valið núna:
LUKAQ 19: TANGSBSI
Áherslumerki
Deildu
Afrita
Want to have your highlights saved across all your devices? Sign up or sign in
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.