LUK 24
24
Turkur Kunam
(Mt 28:1-10; Mk 16:1-8; Jn 20:1-10)
1Doonu dvk aal arkomci huudar humarho sungam albo kutiam mwx-mvaql apnam mam bvvlayil nyem tulungv nyubu dookub wnum. 2Bulv wlw pwam nyubu bug hoqgv ngurgin doodwb kaapanum. 3Bulv urab haabnv kaanum, hvbmabde bulv At Sw Jisug svmangam kaapa kumanum. 4Bulv soq sam mwwdar lamab hoqho doqdunum, kwlwq-kvlaq dvb vj koonbo nyi vnyi go bulug ogumho daqnum. 5Hoo nyem tulungv vcjaqb bos sol ked daiyab pvxwl doqdu yukam hoq nyi vnyiv bulam benum, “Nulv sikbo tulug pengko ho turkur kunbo akam hoggab meegaq dvn? 6Mwv so dookma, mwv gorab nukun. Mwwgabto, mwv Galili alo doodho nulam mwv hog hvla xeq benum, 7Nyia Ko Tuupam nyic-nyiya bog nyi tulug alaqho gvqlwqtvl daapo ao tol dvvcw silongv taqtin banv mengtayin, hoo aal loum deen aalam lokta torab tayin.” 8Hoo mwwg otuqho benam mam nyem tulungv mwwpa kunum, 9hoo bulv nyubu hoqgv wkur laikul soq hog mwlwngam buu wyw leq akinam la hoo nyi mwlwngam puiyam bekinnum. 10Meeri Magdalin, Joana, Jemsig ann Meeri hoo bulug lvgab wba bo nyem asaq tulungv xuqnam tulungam soq pui sam bekinnum. 11Hvbmabde xuqnam tulungv nyem tulug pui benam mam hog jwwma-damagob mwwbnv bulam tvjw maanum. 12Hvbmabde Pitor gorab banv nyubwb xarl; mwv gubxwl pvwr banv kaanamv svma tumnan buug vj rooxongam kaapanum. Hoo hognvkam nyiknum ham mwwmo soso banv mwv nammwb wkur kunum.
Emmaus Lamtab Wnam
(Mk 16:12-13)
13Hoq aal lookin ho buu tulug vnyi gon Jerusalem hoqgv mail kvn yooma gob aado ho doonbo Emmaus nampam ngvk hvl benam nampamb wdul doonum. 14Hoo hognvkv xeq nyiknum hoq mwlwngam gool wba sunum. 15Bulv goobnv hwwmin sunum, hoo Jisu mwv atv ogumb haabnv bulug lvgab wmin gvnum. 16Bulv mwam kaapa sunum, hvbmabde bulv mwam kaacin maanum. 17Jisu bulam benum, “Nulv hog nvkamxeq gookur gookur gool wdu dvn?” Bulv nyuqmv moiya rvxa tvl biimajaqb daqnum. 18Kliopas ngvk hvl emin benam, bulug akgon mwam birwqnum, “Suiyum sor hognvkv xeq nyidul doodwn, hoqham Jerusalemho dootwl cengmajaqb nyinbo nyiv nootwq yv?” 19Mwv bulam toxnum, “Hognvkv xeq nyipa kun?” Bulv mwam birwqnum, “Najaret Jisun mengnam bvrwq gosmab. Soq nyi aksi nyiqry kaanbo nyi akwb nyitwl koijaqb bonam nyinum, hoo Pwnbo gvla nyi tulug agaho swrdorxeq agam goonum, 20hoo ngulug nyub buda tulungv la saab tulungv mwam mengm dvb gvqlwqnum, hoo bulv mwam daapo aoho dvvcw silongv taqtin kunv meng nukun. 21Hvbmabde Israel nyi tulungam nyedar dardybov mwv bo hvl ngulv mwwgw yaanum! Hoq hog mwlwngam bet lakam, soq sam nyinamv sija aal loum yuku. 22Hvbsujaqkam ngulug acam soqg nyem ata gon ngulam lomdwb benum, bulv arkomc huudar humarho nyubwb wnum, 23hvbmabde mwwg svmangam kaapa maanum. Mwv turl doodnvk hvl bulam bekinbo ao gumtw tulungam kaapa peenwk hvl bulv wkurnv bekinnum. 24Ngulug lvgab yvba bo ata gon nyubwb wbnv nyem tulug bekjaqb kaaknum, hvbmabde bulv mwam kaapa kumanum.”
25Hoo Jisu bulam benam, “Nulv hvkam bvxeqkvl paca caadwn, nyiqry benbo tulug benam hog mwlwngam mwwkub saqxeql mwwjw maanbo nyi tulu! 26Mwam yuuma daab Kristo otuqcob hentwr kaasngam hendwb nyima namyv?” 27Hoo Mojes pota xeqpwl apnam hoqgv berab banv nyiqry benbo tulug xeqnam mwlwngam, mwwg pagoqkam dvrwqbo potalo xeqpnam mam Jisu hog mwlwngam mwv bulam xwkinum.
28Bulv nampam mam wnwq kunum, hoqgv Jisu mwv hvraqb aadob wd deen hwiyw jaqb nyil kaakinum, 29Hvbmabde bulv mwam ceceq jaqb bulug lvgab dootwk hvl gumnv benum, “Ngulug lvgab dooto; aalv wiyum svqtwqb nyidku hoo kanv pua yuku.” Hoqgab mwv bulug lvgab dooba taakub wknum. 30Mwv bulug lvgab tebol ho doa minggwl wtwngam naarab banv pingmwq banv lvqc cil bulam jinum. 31Bulug vnyiqkv nyiqbio kunv mwam kaacin xiqknum. Hvbmabde bulug kaaga hoqgv mwv jimy-jema gob nyiileq kunum. 32Bulv bemin sunum, “Mwv ngulam lamtaho gool wdu yikho dvrwq potag niqtuqkam xwkin wdudvk ho soq si ngulug hang uralo wm hvbjaq gudul doomanum i?”
33Bulv rwdwq-paqb gorab banv Jerusalem wkur kunum; hoqho bulv buu wyw leq akinam la bulug lvgab yvba bo nyi tulungam lvkin gob dookum doolum gvtwl, 34hoo begamv, “At Sw jvqtw jaqb gorab nukun! Simon mwam kaapa kunum!” hvl bel doodu dvb kaapanum.
35Ho lamtaho hognvkv xeq nyiknum, hoo mwv wtwngam pindub dukho bulv hogbvxeq mwam kaacin kunum hoq mwlwngam bunyiv bulam xwkin kunum.
Jisu Mwwg Buu Tulungam Kaakinam
(Mt 28:16-20; Mk 16:14-18; Jn 20:19-23; Bn 1:6-8)
36Bunyiv bulam soq sam bekin banv doodu yukam cengma lvpab Jisu mwv atv bulug pengko lo daqabanv bulam benum, “Swrsomalongv nulug lvgab dooba nvka.” 37Hvbmabde bosil lomkaq saqbanv bulv oram gosnag maab koodu gvdwn si hvl bulv mwwnum. 38Hvbmabde mwv bulam benum, “Nulv hoggab mooka-saqgob nyidwn? Hoggab nulug hang uralo soq mwum-soqum sam haam gvdwn? 39Ngoqg all alaqsam kaato, ngo, ngo sulak. Ngam idaq gvdwl kaaka to, hoggab, nulv ngam kaag dvn hvbkalam oramv alo ayaq baqmadvn.” 40Mwv sam bejo-ywwtwl, bulam mwwg all alaqkam kaakinum. 41Hvbsujaqkam bulv sija godab hvraqb mwwjw maanum; hoggab bulv hemp pol doosam mwwjw kumab mwwmo sosol doonum. Hoqgab mwv bulam toxnum, “Nulv hog dvs doog ma i?” 42Bulv mwam xwwnul apnam ngui garg jinum. 43Mwv ham nvvrwqnv bulug kaagaho dvnum.
44Mwv bulam benum, “Ngo nulug lvgab hvraqb dooba do ho, soq tulu sam lak nulam ngo bekinnum, Mojes pvvblo, nyiqry benbo tulug pota tulu lo la Mwmin nwswrlo ngoqg pagoqkam hog mwlwngam xeqpwl apnamv niqtuq lengdwb doonum.”
45Ho mwv dvrwq potangam cengm dvb bulug hangam pumb rwlwq tukul cenglaq mvknum, 46hoo bulam benum, “Hoqhvb dvrwq potalo xeqpnamv doodwn, Kristo hentwr kaasngam hentayin, hoo loum deen aalam sinam hoqgv lokta gorab tayin, 47hoo Jerusalem hoqgv jaq nyirab layil mwwg eminb mwwkurnam pagoqkam la nyic nyiangam kol xaqgub axia jinam Tugu Puiyam nyob luucw-luutwg agaho betam dvb nyitayin. 48Nulv soq mwlwg hvvkib swwtayin 49Hoo ngoqg Ab hog hvla xeq goorwl apnum, ham ngo nulug dookub kanam jitayin, hvbmabde nulv ao toloqgv atoram kaapa maad deedib nulv soq bopam so doodwb nyitayin.”
Aob Caanam
(Mk 16:19-20; Bn 1:9-11)
50Kokw so mwv bulam Betani nampam ogum xaqb wggwl mwwg alaqkam irab banv bulam lvqc cinum. 51Mwv bulam lvqc cil doodu dvb mwam bulug galoqkv ao gvdab booca gvnkun. 52Hoo bulv mwam xumnum hoo Jerusalemb hemp-hvnyir kunv wkur kunum, 53hoo bulv looxiam xumk nam uraho Pwnboam poqdul doodu kunum.
Valið núna:
LUK 24: NISS
Áherslumerki
Deildu
Afrita
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016