LUK 17
17
Nyic Nyia
(Mt 18:6-7,21-22; Mk 9:42)
1Jisu mwwg buu tulungam benum, “Nyi tulungam nyic nyia nyig wgbo tulungv nyiky dvb doodwn hvbmabde bulam hvb nyimdvb jiya bo nyi akgab hvkam bvxeq hentwr jaqkv! 2Soq nyi si soq anyo tulug ak yaiya gon nyic nyia nyimdvb jimmam lingsam mwwg lwwpo ho wlw lo dembaq tvl sa-svlo urab hurlwq hindwn. 3Nulv atv atam hvvmin suto! Noqg borv nyic nyia nyid nyiloqkam mwam yolu ruqto, hoqgv mwv mwwkur baloqkam mwam kol xaqb axia jitku. 4Aal lookinam mwv noqg ceebiob kvn gob nyic nyia nyibaloqkam, hoqgv lwx-ceram mwv noqg dookub haal ngo mwwkur dukun hvl bebaloqkam no mwam kol xaqb axia jidkub nyidwn.
Mwwjwnam
5Hvvky tulungv At Swn benum, “Ngulug mwwjwngam koi yaadwb mvtwb.” 6At Sw birwqnum, “Ywwm aaxy hwdgokam nulug mwwjwngv koi baloqkam nulv soq malbari svvn sam, no atv busuq gvdwl buuxa to hvbnyiloqkam hoqhv nulug gaml jikub tatayin.
Nyerag Nyidynam
7“Nulug pengko ho hiyv akgon hvl benbo doomanyiloqkam sviya rvkybo nyera akam mwv rongo hoqgv haada kalam, no hvl bed nvi yv, vnwqb haagdvl noqg dvnam mam dvla? 8Hvbmabde mwv mwam hvl ya betayin, vjlo hingkib kootwl ngoqg dvs-twwsam mwx-mvaql ngam kaaya yaal dooiya to, hoq kokwngam no noqg dvs-twwsam dvt-twwto. 9Mwwg gamlam tagam gab mwv nyerangam paqyalinco paqd nvi yv? 10Soq luukin si nulug lvgab doodwn hwdlo nulv hog mwlwngv nyibam yukam nulam hoqhvb betwk hvl bekinnum, ‘Ngulv hog hvvtw-pvbw maanbo nyerangv, ngulv ngulug bonam nyitkun.’”
Jisu Tviyiq Nyinbo Nyi Wyw go Mwpnum
11Kokw so Jerusalem daiyab wikam Jisu Samariya gvla Galilig lvpa jaqb wnum. 12Hoqho mwv nampam pamg golo haanum, ho tviyiq nyinbo nyi wyw taqtgo mwam wrwqnum, bulv doqtu tvl, 13Sogoqnum, “Jisu Bir ata! Ngulam anya mwwpa tvb!” 14Jisu bulam kaapa tvl benum, “Wgdvl nyub tulungam nulam kvvdy kota.” Lamtaho wdul doodu dvkho bulug vcv alkunum. 15Bulug akwn mwam aldvb mwp kunam mam kaapa tvl wkur kunum, Pwnboam vcjaqb paqnum. 16Mwv atv Jisug lvpia lwkw kedho maajo tvl mwam paqnum, hoq nyi akv samariya nyiv. 17Jisu benum, “Nyi wyw taqtam mwp tukun, kiya gon hoglo yu? 18Hoggab yu soq nyoodo nyi akin ciqnyi si Pwnboam paqtab wkurnum?” 19Jisu mwam benum, “Gorab gvdkul wnku; noqg mwwjwngv nam al dukub mwp pakun.”
Pwnbog Lvpw-Haty Haadynam
(Mt 24:23-28,37-41)
20Parisi ata go Pwnbog lvpw-hativ hwdlo haatayin hvl Jisun toxnum, Mwwg birwqnamv, “Pwnbog lvpw-hativ kaapa dvb haaram sulak! 21Hiyvkam beram, kaato, siilak!’ ho vlak! Hvbmabde Pwnbog lvpw-hativ nulug pengko lo doodwn.”
22Kokw so mwv buu tulungam benum, “Aal golo nulv Nyia Ko Tuupwg aal loog gon kaapa dvb mwwby tayin, hvbmabde nulv sam kaapa nyoram. 23Hoo kaato, vlak doodwn!’ ho ‘Kaato, siilak doodwn!’ Hoqhvb beikam ham kaatab bulug lvgab wmabv. 24Taiyamv doonyi-pool taqc gon hoqgv bioqlin yukam doonyi poolwg taqc gon kalam hutongv jardaq dvn, Nyia Ko Tuupv kam, mwwg aalam hoq hvbkalam nyitayin. 25Hvbmabde otuqcob mwv hentwr henl soq hotam soqg nyi tulungv haqxia yinpv. 26Noag swwca de mood ho nyinam hvbkalam nyi Ko Tuupwg aalv kam hoqhvb nyitayin. 27Nyi mwlwngv dudul twwdul hoo nyem nyega noodu nyanum hwdlo Noa hulu urab haaknum hoo bulam diidwr issiv toa kunv bulam twrknum. 28Soq si Lotwg swwca de moodho nyinam hvbkalam nyitayin. Nyiicw-nyiitv dvmin-twwminl, rvmin-puqminl, vly liiminl hoo namlo poodu nyanum. 29Hvbmabde Sodom hoqgv Lot lengd aal lookin twqda ho doa tologv wmv la gubiaqbo nyodongv hol kunv mwlwngam twryum kunum. 30Hoq hvbkalam Nyia Ko Tuupwg aalam kaapa yukam nyitayin.
31“Hoq aalam hiyvkam mwwg nam lvvglo doon bov mwwg dvrab pam naatab mwwg nam urab haanyiram, hoqgv hoq hvbkalam hiyvkam rongolo yvnbov nammwb wkur lakram. 32Lotwg nywxwngam mwwpato. 33Hiyvkam atwg swwgam ywwt ywwdwb mwwd nyiloqkam mwv sam nyim tayin, hvbmabde hiyvkam atwg swwgam niimbov ham ywwt ywwtayin. 34Ngo nulam bedwn hoq aiyam nyi vnyi go kark akin hoq lvkin gob yubk boam, akwn naal wgtayin, akwn apaqtayin. 35Nyem vnyi go lvkin gob dux xudul yvyi nyiloqkam akwn naal wgtvl akwn apaqtayin. 36Nyi vnyi go lvkin gob rongo ho yvi nyiloqkam akwn naal wgtvl akwn apaqtayin. 37Buu tulungv mwam toxnum, “Hoglo yu At Sw?” Jisu birwqnum, “Hogloq ho svmangv doodwn hoqho poaqkv pumkum tayin.”
Valið núna:
LUK 17: NISS
Áherslumerki
Deildu
Afrita
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016