LUKA 21
21
Numeinu Tholôm
(Mk.12:41-44)
1Jisuan Tempila tholôm bôma mi richonghei tholôm tlâk lâi kha a thlîr mai a. 2Numei inriangte khatkah hin dâr tangka #21:2 Grik ‘lepta’ dâr poisa a nit, khangkana 96 khan dulikah artluk. inikah a hong tlâk lâi khom kha a mu a. 3Khanchu, ani khan, “Thudik nang ke ril, hi numei inriangte hin mi dang dang nêka khan ai tlâk intam ual a nit. 4Mi danghei hin chu an inei inliap kêng an hong ipêk; khanniseh, ani hin chu a neisunte a nuk itûkna ai pêk let a nit,” a ti a.
Tempil siat rang thu â sîrna
(Mat.24:1-2; Mk.13:1-2)
5Kôilôm ṭhenkahei khan Tempil lung iṭha tak takhei neh Pathian zianga thilpêk an ilanhei enhoizia khah an isîr lâiin Jisuan an ziangah, 6“Hi nin imuhei murdi hih, lung richuan rêng rêng khatka lua inchim iloia a om no nikhua la hong tlung a ti,” a ti a.#Lk.19:43,44.
Buaina neh nuamlona
(Mat.24:3-14; Mk.13:3-13)
7Anni khan a ziangah, “Minriseitu, amakhah tikin im ai nit rang? A hong tlung rang tik riatnan risinsiana im â om rang?” itin an ridon a.
8Jisuan, “Ilêma nin om nona rangin ridîn rei. Ker ming ichingin, mi itam takkan, ‘Keimah hi Krista chu ki nit,’ ‘A zoro â tlung rang tâk,’ itin hong an ta, kha mihei khah zui no rei.#Lk.17:23; Mk.13:21. 9Khante, ridoi rihu neh risual thu nin riat tikin iṭin nin ilung inzîng no rei, amakhah chu â tlung masa ngêt rang a nit, mongna tak chu la tlung zel no nih,” a ti a.
10Khante, an ziangah, “Nam dang neh nam dang lar doi an ta, ram dang neh ram dang khom lar doi an ti.#2 Rich.15:6; Isa.19:2. 11Mun tinah ninupui inîng a ta, ṭâmpui la thlâng a ta, ripui la lêng a ti; rivâna ata thil inrît neh risinsiana rikhêl tak tak la lang a ti. 12Nikhomsela, kha thilhei khah a hong tlung maah khan nangni man an ta, an nuam nangni lo an ta, Inkhôm inah nin thu rêl rangin nangni pêng an ta, lung inah nangni khum an ti. Keima sikin rênghei, roirêltuhei makungah nangni ṭhui an ti.#Mat.10:17-21. #TS.25:24. 13Amakhah nin ta rangin Thurchi Ṭha rilna zoro ṭha nîng a ti. #Fil.1:12. 14Sâmna rang lei ingaitua bak nang no nih iti lei reh thlâm rei. #Lk.12:11,12. 15Nin ridoipuihein an sût thei no rang dôrkan vârna neh ṭong thiamna keiman nangni pêng ki ti. 16Nin nu neh pahei, nin urênghei, nin suapuihei neh nin rualhei ilua khomin nangni inman an ta; ṭhenkah vâng chu nangni that an ti.#Lk.12:52,53. 17Keima sikin mi tinin nangni la nel an ti.#Mat.10:22; Joh.15:18-25. 18Khannisela, nin samzâi khatka te lua rimang no nih. 19Nikhomsela, idet takkan iding unla; khanchu, nin ringna inzôk nin ti.#Mat.10:22; Rom.11:25; Thup.11:2.
Jisuan Jerusalem siat rang thu â sîrna
(Mat.24:15-21; Mk.13:14-19)
20“Khante, sipai lômin Jerusalem an hual nin mu tikin chu â siat rang a nâi tâk iti reh ta rei. 21Khatikin chu Judai rama omhei khah tlângramheiah lâizâm tho riseh; khopui sunga omhei khan khopui ata ro sela, tlângrama omhei kha khopui sungah lût no riseh. 22Thubu-a riziak a tlung idikna rangin kha nikhuahei kha chu, ‘Phuba lâk nikhuahei,’ nîng a ti.#Hos.9:7. 23Kha nikhuaheiah khan chu nupang nai ivonghei neh nu, naite pom lâihei chu lungkham an om rang vang na! Hi ramah hin dengthei inrît a zuang itlung rang a nit a, hi mihei chungah hin Pathian ningthikna a zuang itlung rang a nit. 24Ṭhenkah khandaia that nîng an ta, a danghei chu ram tinah suaka ṭhuiin om an ti; khante, Jentailhei zoro a tluk mâkah Jerusalem chu Jentailhei isirden om a ti.
Miriam Naipa zuang rang thu
(Mat.24:29-31; Mk.13:24-27)
25“Khante, inî heiah, ithla heiah, ârsi heiah khin risinsiana rikhêl tak tak la om a ta, tuikhanglian rifôn neh irî vung vung sikin rinêngah khom nam tin lungzîng rilônthingin om a ti. #Isa.13:10; Joel.2:31; Thup.6:12,13. 26Rivâna rithaneinahei khah innîng om a ta, rinêng pumpuia inkhôk zuang itlung rang an ngaituan, mihei chu rithlavâiin rizal neng an ti. 27Khanungchu, Miriam Naipa hi zuang ilang a ta, sinthotheina neh roinpuina rikhêl tak neh sûm lâiah zuang a ti.#Dan.7:13; Lk.9:27; Thup.1:7. 28Khante, kha thilhei khah a zuang tlungin chu iding unla, itangin en rei; nin saninringna khah a zuang inâi tâk a nit,” a ti a.
Theichâng kung ata risei rang
(Mat.24:32-35; Mk.13:28-31)
29Khante, an ziangah hi ṭongrikhek hih Jisuan â sîr a, “Theichâng kung neh thingkung dang dang khom hi en ta u. 30A hong cher rinoi nin mun chu kholum a nâi tâk iti nin riat ngai a. 31Khaangkan, nangni khomin khahei murdi zuang tlung nin mu tikin chu Pathian Ram chu a zuang itlung rang tâk a nit iti reh zel rei.
32“Thudik nangni ke ril, kha thilhei murdi khah a zuang tlung mâkah chu atûnlâi mihei hih thi riai no nih. #Lk.8:27. 33Rinêng neh rivân boi a ta, ki thu chu boi tlak no nih.#Lk.16:17.
Inrin ṭian ranga thorna
34“Ridîn rei, khanonchu, fâk ikhop rai neh zûnrui neh ringlâi vângsak ngaituanan nin ilung sip rai a ta; kha nikhua khan chânga ôk angkan nangni de thut a ti.#Mk.4:19; Lk.12:25; 1 Thes.5:6,7. 35Khangkah ngirin rinêng mun tina om mi murdi chungah khom zuang tlung a ti. 36Kha inkhôk zuang itlung rang khah ituang zoina rang ritha nin nei thei a, Miriam Naipa makungah nin iding theina rangin tiklâi khomin ridînin ṭongṭai mai rei,” a ti a.
37Jisuan sûnheiah khan Tempilah mi ân risei a, kholoiah chu a suak a, Oliv tlângah iriak rangin a fe ngai a.#Lk.19:47; Mk.11:19. 38Mi murdi khom a thusîr ringai rangin zîngah Tempilah khan an hong ngai a.
Valið núna:
LUKA 21: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More