LUKA 18
18
Numeinu neh roirêltu ṭongrikhek
1Khante, sabei indong loia an ṭongṭai mai rang a nit iti inriseina rangin hi ṭongrikhek hih Jisuan â sîr a;#Lk.11:5-7. 2“Khua khatkatah hin roirêltu khatkah, Pathian khom ṭi no, miriam khom ṭi no a om a. 3Kha khua ngirah khan numeinu khatkah a om a, ‘Ker doipui neh kin thubuai ne rêlinfel pêk roh,’ itin a ziangah a fe ṭian ṭian a. 4Zoro sôt iankah chu roirêltu khan lan bei mak a, khan, nungah chu a lungrilin, ‘Pathian neh miriam ṭi no khom inlang, 5hi numeinu hin chakal a ne sak mai a; khasikin, lei rêlinfel pêk rong, a nitnon chu hingkan hong mai a ta, nungah chu a ne la înrizêl rang kêng,’ a ti,” a ti a.
6Khante, Pumapa khan a la sîr mai a, “Roirêltu fel ino thu sîr khah reh rei. 7Khasikin, a sûn a zâna ama samtuhei ṭapna khah Pathian khan ngaitua infel pêk no nîm a? Anmani san rangin a irvuak rang mani?#Thup.6:10. 8Nangni ke ril, anmani ditsakin rêlinfel pêk zel a ti. Khannisela, Miriam Naipa hin a zuang tikin rammualah iamna zuang mûng a tîm?” a ti a.
Farisai neh Siadôltu ṭongrikhek
9Mahnia ki ṭhat riti a, mi dang imusit ngai mihei ziangah hi ṭongrikhek hih â sîr a. 10“Mi inikah Tempila ṭongṭai rangin an fe a. Khatkah chu Farisai a nit a, khatkah chu siadôltu a nit. 11Farisai khah a khâtin â ding a, a ṭongṭai a, ‘O Pathian, kei chu mi danghei angkana mi lep ngai, iamom ino, inrê mi khom ki nit no sikin lômthu ke sîr a. Hi siadôltu angkan khom ki nit no sikin lômthu ki îsîr a nit. 12Hapta tin sûn nikah bu ki ngei ngai a, kî nei murdi sômka khatkah nang ki pêk ngai a,’ a ti a.#Lk.5:33. 13Siadôltu kha chu ilah takah â ding a, rivân ilua tang ngam loiin, â ṭâng richûmin, ‘O Pathian, lung nen kham roh, mi sual ki nit,’ a ti a.
14“Nangni ke ril, a masapu ni loiin hi mi hih Pathian mita thiam ichangin a inah a fe tâk a. Tutu om iliankah tlôm an ta, om itlômkah chu inlutin om an ti,” a ti a.#Mat.18:4; 23:12; Lk.14:11; 1 Pet.5:6.
Jisuan naipangtehei ṭhat a vur
(Mat.19:13-15; Mk.10:13-16)
15An chungah a kut arngat rangin mi ṭhenkan an naitehei Jisua ziangah an hongpui a. Amakhah kôilômhein an lei mun chu an lei ngo a. 16Khannisela, Jisuan naipangtehei khah a ziangah a koi a, an ziangah, “Naipangtehei ki ziangah hong riseh, khap no rei; Pathian ram chu hingkana mihei ta kêng ai nit. 17Thudik nangni ke ril, tutu naipangten Pathian ram ai lôm angkana lôm inon chu a sungah lût tlak no nih,” a ti a.
Richongpa
(Mat.19:16-30; Mk.10:17-31)
18Juda ruaitu khatkan Jisua ziangah, “Minriseitu ṭha, kumtluang ringna ki nei theina rangin im ki tho rang?” a ti a.#Lk.10:25.
19Jisuan a ziangah, “Ithôm iṭha ni ne iti? Pathian banah chu tute â ṭha omak e, 20Thupêkhei khateh ni riat im ki ta, inrê no roh, mi that no roh, iruh no roh, milakin mi nô no roh, ni nu neh ni pa ngîk roh, itihei hih,” a ti a. #Fes.20:12-16; Dn nik.5:16-20; Rom.13:9; Jak.2:11.
21Ani khan, “Kha thupêkhei murdi khah chu ki naipangte ata kî zôm tâk ngai a nit,” a ti a.
22Khante, Jisuan amakhah a riatin chu a ziangah, “Lam khatkah ni lar sam; nî nei murdi zuar inla, a sum khah inrianghei sem pêk roh; khanchu, rivânah richon nei ni ti. Khanungchu, hong inla, ne zui roh,” a ti pêk a. 23Kha thu khah ani khan a riatin chu arngai a siat ok a, miriam richong tak a nit sikin.
24Khante, Jisuan arngai a siat ok iti a mun chu, “Richonghei ta rangin Pathian Rama lût ân tak rang vang na! 25Pathian rama miriam richong ilût nêkan iṭhim ikuara saringsei ilût ol ual a ti,” a ti a.
26A thu sîr lei ringaituhei khan, “Khangkan a nit inteh, tûm inzôk inih thei ranga?” itin an ridon a.
27Jisuan a sâm a, “Miriam ranga thei ino hih Pathian rangah chu ithei a nit,” a ti a.#Riph.18:14; Job.42:2; Jer.32:17; Lk.1:37.
28Khanungchu, Petera khan, “En ta, kin in neh loi imarakin nang kin zui a,” a ti a.
29Jisuan “Thudik nangni ke ril, tutu Pathian Ram sika in manih, nupui manih, urênghei manih, nu neh pa manih, naihei manih imarak kangân chu atûna ring lâi ngêiah hin 30a nêka tam ual mu ngêt an ta, zoro la hong ranga kumkho ringna khom mûng an ti,” a ti a.
Jisuan a thi rang thu â sîr voi thumna
(Mat.20:17-19; Mk.10:32-34)
31Khante, Kôilôm Sômleiinikahei khah Jisuan a ranin a ṭhui a, an ziangah, “Ringai ta u, Jerusalemah ei ife rang a nit; amakhan, Miriam Naipa chungchâng thu zânthlahei lei irziak khah tlung rikip a ti. 32Jentailhei kutah lan an ta; anni khan êro an ta, mualinphoi takkan musit an ta, ichil an ti. 33Itông an ta, that an ti; nikhomseh, sûn thumka nungah thoinôk a ti,” a ti a.
34Khannisela, Kôilômhei khan kha thu khah arngai tlia reh mak a; kha thu omziahei khah an ta rangin chu thu rithup a nit sikin Jisua thu sîr khah an iriat thei ino a nit.
Jeriko kho kôlah mitdel ân dam
(Mat.20:29-34; Mk.10:46-52)
35Khante, Jisua kha Jeriko khua a hong tlung rangin chu mitdel khatkah hi lam kôlah a lei iṭhung a, kut a lei do a. 36Mipui rihu a riatin chu, “Im ai nit tâk?” iti ardon a.
37“Nazaret Jisua a hong ithleng a nit,” an ti pêk a.
38Khan zel â khêk a, “Jisua, Davida Naipa, lung nen kham roh,” a ti a. 39Mipui matianga fehei khan an ngo a, idâirek rangin an ti khomin matona nêka ring ualin â khêk a, “Davida Naipa, lung nen kham roh,” a ti a.
40Khante, Jisua khah a ngîr a, a zianga hong iṭhui rangin â ril a. A kôlah an hong ṭhuiin chu a ziangah, 41“Im nang sin pêk inlang nî nuam?” itin ardon a.
Ani khan, “Puma, imuh thei ki nuam,” a ti a. 42Khanchu, Jisuan, “A nitin chu mu thei ta roh, ni iamna hi nî dampui a nit,” a ti a.#Mat.9:22; Mk.5:34; 10:52; Lk.7:50; 8:48; 17:19. 43Khanchu, voikazelin a mu thei tâk a. Pathian inpâk pumin Jisua a zui sa tâk a. Mi murdîn amakhah an mun chu Pathian an inpâk tâk a.
Valið núna:
LUKA 18: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More