LUKA 15
15
Bera rimang
(Mat.18:12-14)
1Sûnkah chu siadôltuhei neh mi sual itam takkah a thu sîr ringai rangin Jisua ziangah an hong a. 2Farisaihei neh Dân inriseituhein, “Hi mi hih mi sualhei a lôm a, munkan fâk khom a zongpui ngai,” itin an riphun a.#Lk.5:29,30.
3Khante, Jisuan an ziangah hi ṭongrikhek hih â sîr a. 4“Nangni lâiah khatka khôk hin bera rizakah nei unla, an lâia khatkah rimang sela, phûlah sômikuakkah kuakkahei khah imarakin, armang khah a mu nôk mâkah zong no nîm a? 5A mu nôkin chu ilôm takkan a dârah hong riput a ta, 6in a hong tlungpuiin chu a rualhei neh a bungahei koibûm a ta, ‘Ki bera rimang khah ki mu nôk tâk a; tho, ne lômpui rei,’ tîng a ti. 7Nangni ke ril, khangkah takah khan mi fel sômikuakkah kuakkah rilet nang khâi inohei nêkan chu mi sual khatka rilet chungah khan rivân mihei lômna a irsâng ual rang a nit.
Duli rimang
8“Khante, nupang khatkan duli #15:8 ‘Drachma’ ti a nit. Grik tangka, Denarion ritlukpui vêl, bera khatkah richôk theina, rilofa sûnka thalo a nit. sômkah nei sela, khatkah inrimang sela, meiser ichokin a in phît a ta, a mu nôk mâkah takritâi takkan ai zong rang ni mak im a? 9A mu nôk tenan chu a chamhei neh a bungahei koibûm a ta, an ziangah, ‘Ki sum rimang kha ki mu nôk tak a; tho, ne lômpui rei,’ tîng a ti. 10Nangni ke ril, khangkah takah khan mi sual khatka rilet chungah khan Pathian vântirtônhei an ilôm ngai a nit,” a ti a.
Naipa tlân rimang
11Jisuan a la sîr mai a, “Mi khatkah hin naipa inikah a nei a; 12a naipang ual khan a pa ziangah, ‘Epa, richon ki dongtum rang chu atûn ne peh ta roh,’ a ti a. Khanchu, an pa khan archon khah a naihei ziangah a sem pêk tâk a.#Dn nik.21:15-17. 13Sûn itôiteka nungah chu a nai naipang ual khan a dongtum murdi khah a lâk riai a; ram ilah takah a fe tâk a, amakhan nuam ninga lêngin a sum â hek tâk a. 14Khante, a sum â hek zoi riai tenan chu kha ramah khan ṭâmpui a tlâk a, îte ifah rang nei khâi mak a. 15Khanchu, kha rama om mi khatkah a var bêl tâk a, ani khan vokhei ienkol rangin a loiah a tir a. 16Khante, vokbuhei khah ifah rangin arzuk tak tak a, tute lakin îte ifah rang peh mak a.
17“Khante, arriat suak kaneh chu, ‘Ki pa inah rilo mihei bu ne zoi loi rakka nei an tamtlia kaneh kei lakate hin voniṭâmin kî thi rang na! 18Thoi ki ta, ki pa ziangah fêng ki ta, a ziangah, Epa, Pathian chungah neh ni chungah ki îsual tâk a nit. 19Ni naia be rang khomin ritluk khâi mang, ni zianga rilo mi khatka angkan ne mang ta roh,’ tîng ki ti, a ti a.
20“Khanchu, a thoi a, a pa ziangah a fe tâk a. Ilah taka a la om lâiin a pa khan a hei mu a, â lung a kham tak tak a, â tlân a, â kol a, â riam a. 21Khante, a naipa khan, ‘Epa, Pathian chungah neh ni chungah ki îsual tâk a nit, ni naia be rangin ritluk khâi mang e,’ a ti a. 22Khannisela, a pa khan â somhei ziangah, ‘Rimot takkan zakua ṭhatak khah hang lah unla, inhâk rei, a kutṭimah kutsabit inbun unla, a keah pheikok inribun rei.#Riph.41:42; Zak.3:4. 23Serâtchaltuai vâiinthâi khah hang kâi unla, that rei; ilôm takkan ruai iṭhêng ei ti u. 24Hi ki naipa hih a thi a, a hong iring nôk tâk a nit; armang a, ei imu nôk tâk a nit hih,’ a ti a. Khanchu, lômna ruaiṭhe an phut tâk a.#1 Tim.5:6; Efes.2:1.
25“Kha lâi takah khan a nai ulian ualpu chu loiah a om a, in a hong tlung rangin chu belem irî neh lâm rihu khah a riat tâk a. 26Khanchu, isom khatkah a koi a, ‘Ithôm im a omzia tâk?’ itin ardon a. 27Khante, ani khan, ‘Ni unaipa, inah a hong kîr nôk a, â ring â dama a mu nôk sikin ni pa khan lômnan serâtchaltuai vâiinthâi khah a that a, ruai a iṭhe a nit,’ a ti a. 28Khanchu, a ning ân thik a, inah khan lût nuam khâi mak a. A pa kha a va suak a, insunga lût rangin a va thlêm a. 29Khannisela, a pa ziangah khan, ‘Ringai roh, hi ten kum sung hih ni ta rangin suak sinin ki sin a, ni thu khom zôm loiin om ngai mang a; khan, im ni ne pêk ngai a? Ki malhei neh ruaiṭhena rangin kêlte lua khom ne peh ngai mak cheh. 30Khannisela, hi ni naipa, nochizuarhei zianga ner chon ichêk zoitu hi a hong nôkin chu serâtchaltuai vâiinthâi ni lei ithatpui hih,’ a ti a. 31Khante, a pa khan a ziangah, ‘Ki naipa, nang chu ki zianga om mai ni nit a, kî nei murdi hih ni ta kêng ai nit. 32Khannisela, ni unaipa hi chu â thi tâk kha a hong iring nôk tâk a nit, armang tâk kha ei imu nôk tâk a nit hih; khasikin, râiifân takkan ei lôm rang pial a nit,’ a ti pêk a,” a ti a.
Valið núna:
LUKA 15: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More