RIPHUTNA 37
37
Josefa neh a urênghei
1Jakoba chu a pa mikhualna ram, Kanan ramah khan a om mai tâk a. 2Amahih Jakoba insungkuahei thurchi chu a nit.
Josefa khah kum sômlei kum sarika mi a nitin, a ûhei neh ran lômhei ienkolin, a pa thâikêm Bilhaii neh Zilpaii naihei ziangah a om ngai a. Josefa khan an thurchi ṭha no murdi an pa ziang a hong ithlun ngai a.
3Israela khan Josefa khah a tar nunga nai a nit sikin a nai danghei murdi nêka khan lung a thlung ual a, zakorfual ze dang danga rizia â ṭhui pêk a. 4An pa khan ani khah a ulianhei murdi nêkan lung a thlung ual iti a ûhei khan an riat tâk a; khanchu, ani khah an nel tâk a, ṭongbâi iṭha rêng rêngin isôn nuam khâi mak a.
5Zânkah chu Josefa khan rimang a phan a, a ûhei â sîr pêk a; khanchu, ani khah an nel nôk ual tâk a. 6Ani khan an ziangah, “Ringaiihoi takkan ker mang phan hi ner ngaipui ta u. 7Ei rêngkan loiah fathlu ei lei itêl a, ki fathlu khah a hong thoi a, a hong iding a; khanchu, nin fathluhei khan an hong hual vêl a, ki fathlu khah chibai an bûk a,” a ti a.
8Khanungchu, a ûhei khan a ziangah, “Nang mâmte hih kin chungah roi nî rêl bâk rang na? Nang mâmte hih kin chungah thu nî nei bâk rang na?” an ti a. Khanchu, armang phan sik neh an chungchâng thu â sîr sika khan an nel nôk ual ual tâk a.
9Josefa khan rimang a phan nôk a, a ûhei khah â ril nôk a, “Ringai ta u, rimang ki phan nôk a; ker mangah khan inî hei, ithla hei, ârsi sômleikhatka hei khin chibai an ne lei bûk a,” a ti a.
10Armang phan khah a pa khom â sîr pêk a; khanchu, a pa khan a ngo a, a ziangah, “Ner mang phan hih îrimang im ai nit? Keimah neh ni nu neh ni ûhei hin lingisikin chibai nang kin ibûk rang im ai nit?” a ti a. 11A ûhein ani khah an narsa a, a pa rêkin chu a thusîr khah a lungrilin a vong mai a.#TS.7:9.
Josefa an zuar, Aigupta ram a tlung
12Sûnkah chu Josefa ûhei khah Sekema khan an pa ran lôm ienkol rangin an fe a. 13Israela khan Josefa ziangah, “Ni ûhein ran an enkolna Sekema khan nang itir kî nuam kêng,” a ti a.
Josefa khan a ziangah, “Ne tir roh ba,” a ti a.
14Khanchu, a pa khan a ziangah, “Va fenla, ni ûhei khah an dam im, ran lômhei khom an dam im va rian fel inla; khanungchu, an thurchi ne hong iril nôk roh,” a ti a. Khanchu, Hebron phâi ata kha a pa khan a tir suak a, Sekem tiang khah a pan tâk a.
Josefa khan Sekem khah a va tlung a, 15phûlah rilong diaia a om lâi khah mi khatkan a va mu a, a ziangah, “Im nî zong tâk?” itin ardon a.
16Ani khan, “Ki ûhei kî zong a nit, ringaiihoi takkan ran lôm an inlêngna ne ril roh ba,” a ti a.
17Ani khan, “Hin taka rithokin an suak rangah khan, ‘Dothan tiang fêng ei ti u,’ an ti chu ki riat,” a ti a. Khanchu, Josefa khan a ûhei inungah khan a fe zel a; Dothanah khan a va mu tâk a.
18Ilah takah a la om lâiin a ûhei khan an lei mu a; khanchu, an ziang a hong tlung maah khan an that rang dân thu an lei phan a. 19“En ta u, rimang phanah a hong soh. 20Tho, that ei ta, khur khatkatah iṭhul ei ta, sarângin a sê that tâk la ti rei u. Khanchu, armang phanhei khah ingkan im a om la riang ei ti,” an riti a.
21Reubena khan amakhah a riat a, an kut ata inzôk a tum tâk a, “Ithat chu that no min u,” a ti a. 22Reubena ngir khan, “Thisen chu isua no rei; ramchâra khurah hin iṭhul unla, kut chu a chunga tlâk no rei,” a ti a. Amahih Reubena khan Josefa khah an kut ata a san inzôk a, a pa ziangah a tir kîr nôk theina rang ituma ai ti a nit.
23Josefa khan a ûhei ziang a va tlungin chu a zakorfual, ze dang danga rizia a îhâk khah an lei khek pêk a. 24Khanchu, an ṭhui a, khurah khan an iṭhul tâk a. Khurah khan îte omak a, tui khom ichînteka lua om viat mak a.
25Bu ne ranga an iṭhung lâiin an hang tang a, an hang enin chu Ismael khualzinhei Gilead rama rithoka an saringseihei kha namhoi hei, thingnâi damdôi hei neh Murra hei ipêla Aigupta rama fe ranga hong an mu a. 26Khanungchu, Juda khan a urênghei ziangah, “Ei unaipa ei that a, a thisen isuak ei iipah khan im rifena a om rang? 27Tho, a chungah kut tlâk loiin Ismaelhei ziangah son lei zuar rei u; ani hih ei unaipa, ei lâirui ri-âtpui ngêi a nit a,” a ti a. A urênghei khan a thu khah an zômpui tâk a. 28Midian rivai mihei khah an hongin chu, Josefa khah khur ata khah an#37:28 ‘An’ iti hi Midianhei a tina a ang. Lettu ṭhenkan chu Josefa urênghei hin an ikâi suak inin an ringai. kâi isua a, Ismaelhei ziangah khan tangka sôminikan an zuar tâk a. Khanchu, Josefa khah Aigupta ramah an ṭhui tâk a.#TS.7:9. 29Reubena kha khurah khan a va fe a, Josefa kha khurah khan lei om khâi mak a; khanchu, ringai insian a silbomhei â pot thlêr a. 30A urênghei ziangah a hong kîr nôk a, “Tôitea khah om khâi mak; Ingkan im ei tho rang tâk?” a ti a.
31Khanungchu, kêlchal an that a, Josefa zakorfual khah an lâk a, kêl thisenah khan an nôk a. 32Khanchu, zakorfual khah an pa ziangah an chôi a, a ziangah, “Amahih kin mu ringot a, ni naipa zakorfual a nit im hong en ta,” an ti a.
33Ani khan a lei riat zel a, “Ki naipa zakorfual a nit hi. Sarângin ai sê tâk a nit hi te; ki naipa Josefa chu inkhêl loiin ramsa kutah ai thi ngêt tâk a nit hih,” a ti a. 34Khanchu, Jakoba khan a silbomhei â pot thlêr a, borapuan a sil a, sûn isôt takka a naipa chu a ṭâ a. 35A naipahei neh a nainuhei murdi khah amah thlangam isak rangin an hong a; nikhomsela, ani khan thlangam isak nuam mak a, “Ki naipa ṭâ pumin thlânmual kî khum rang a nit,” a ti a. Khanchu, a naipa Josefa khah a ṭâ mai tâk a.
36Kha sungah khan Midianhei khan Josefa khah Aigupta ram an lûtpui a, Faroa nuaia milian Potifara ziangah khan an zuar a. Ani khah vêngtu pôla ruaitu tak a nit.
Valið núna:
RIPHUTNA 37: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More