RIPHUTNA 3
3
Miriam ilîr thu
1 Pumapa Pathian isiam ramsa murdi lâiah irûl hih vârrilet tak a nit a, nupangnu ziangah khan “Pathianin rikula thing irâ murdi hih nin fâk rang ni mak e, ai ti mani?” itin ardon a.#Thup.12:9; 20:2.
2Nupangnu khan irûl ziangah khan, “Ti mak e, rikula thing irâhei hih kin fâk thei riai; 3rikul inlâina taka thing iom irâ bang hih Pathianin, ‘Nin fâk rang ni mak a, itôn khom nin tôn rang ni mak; khanonchu, nin ithi rang a nit,’ ai ti a nit,” a ti a.
4Irûl khan nupangnu ziangah khan, “Thi tlak no tin u! 5Nin fâk nî zelah khan nin mit hong vâr a ta, â sia â ṭha rian Pathian i-ang nin hong init rang iti Pathianin ai riat ṭian a nit kha,” a ti a.
6Khanchu, nupangnu khan thing irâ khah ifarua neh, mit iladap, mi invâr ranga thing irâ rizuk iom tak a nit iti a riatin chu â râ ṭhenkah kha armal a, a fâk a; a pasal khom a pêk a, ani khomin a fâk tâk a. 7Khan zel an ruaikah khan an mit a hong vâr a, korongboi an nit iti an hong ririat tâk a; khanchu, theichâng nâ an iṭhui inrikop a, silbomin an mang a.
8Khante, Pumapa Pathian khah kholoi ni tlâkrikâia#3:8 Hebraiin ‘Ithli dong rangin’ iti a nit, kholoi ni tlâk rangto hih ithli râng vang zoro a nit. rikula a lêng irî khah an lei riat a; Adama neh a nupui khan rikula thingkung kârah khan Pumapa Pathian chu an lei ribîk pêk tâk a. 9Nikhomsela, Pumapa Pathian khan Adama khah a koi a, a ziangah, “Adam, taktiang im nî om tâk?” a ti a.
10Ani khan, “Rikulah ner hu ki riat a, korongboia om ki nit sikin nang ki ṭi a, ki irbîk tâk a nit,” itin a sâm a.
11Pathianin, “Korongboi ni nit iti tûm nang iril? Thei irâ fah loi rang kî ti khah nî fâk tâk a nit na?” a ti a.
12Adama khan, “Ne ompui ranga ni nupang ne pêk khan thei irâ khah a ne pêk a, kî fâk tâk a nit,” a ti a.
13 Pumapa Pathian khan nupangnu ziangah khan, “Îtho sika hingkana sin hih nî tho tâk im?” a ti a.
Nupangnu khan, “Irûlin a ne lêm a, kî fâk tâk a nit,” a ti a. #2 Kor.11:3; 1 Tim.2:14.
Roirêlna Pathianin an puang
14 Pumapa Pathian khan irûl ziangah khan, “Hi thil hih ni tho sikin mîring tinrêng lâiah hin vânisalin om bîk ni ta, ni phûng itâtin lôn mai tâng ni ta, ni damsung kârkah ipil fah tâng ni ti. 15Nangmah neh nupangnu hih nangni inridoi ki ta, nangma richihei neh ama richihei khom lân ridoi mai ki ti. Ama richi khan ni lu lâ to khoi a ta, nangman a ke ârtui la chuk ni ti,” a ti a.#Thup.12:17.
16Nupang ziangah khan, “Ni nai vonga ni dengtheina neh ni nai neia naihasê chu natinsat takkan inpung ki ta, dengithei takkan nai nei ngai ni ti; nikhomsela, ni nuamna chu ni pasal tiang nîng a ta, ani khan ni chungah thu nei mai a ti,” a ti a.
17Adama ziangah khan, “Ni nupui thu ni zôm a, thing khatkah, â râ ni fâk rang ni mak kî ti khah ni fâk sikin rinêng hih nangma sikin vânisalin ai om tâk a nit; ni damsung kârkah isôl taka sinithon â râ kha fah tâng ni ti.#Heb.6:8. 18Riling neh ibuarhei hong ṭoi a ta; rinênga loisûl loinâ kha fah tâng ni ti. 19Rinêng ata ila suak nî nit angkan rinêng ngirah ni kîr nôk mâkah chu ni mâia rithlantui iluang ngûi ngûia sin ithon fâk fah tâng ni ti. Ipila siam ni nit a, ipil ngirah nî kîr nôk rang a nit,” a ti a.
20Adama#3:20 Adama: Hebrai riming a nit. khan a nupui khah miriam naihei murdi nu a nit sikin arming Evi a be a. 21Khante, Pumapa Pathian khan, Adama rang neh a nupui rang savun zakorfual a siam pêk a, ân hâk tâk a.
Rikul ata Adama neh Evi ûm isua
22Khanungchu, Pumapa Pathian khan, “Ringai ta u, miriam khah â sia â ṭha rian eimani ang a hong nit tâk a; atûn chu a kuta banin, ringna thing irâ khah lei va fan, kumkhuan a ring duai lôiin,” a ti a.#Thup.22:14. 23Khasikin, Pumapa Pathian khan amah a lâk suakna rinênga loisin itho rangin Eden rikul ata khah a ûm isua tâk a. 24Khanungchu, miriam khah a ûm isua tâk a; khante, ringna thing lampui irung rangin, Eden rikul sua tiang pangah khan Cherubhei neh mei khandai rihel lap khah a sia a.
Valið núna:
RIPHUTNA 3: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More