RIPHUTNA 27
27
Isakan Jakoba ṭhat a vur
1Isaka chu a hong tar a, a mithei a hong zîng nungah khan a naipa ulian ual Esauva khah a koi a, a ziangah, “Ki naipa” a ti a.
Ani khan “Hin ki om,” a ti a.
2Isaka khan, “En ta, ki tar ok tâk a, ki thina rang khom a nâi tâk a. 3Khasikin, ni thalhei neh ni phel lan la, ram va chai inla, sakhi ne va kâp pêk roh. 4Ke du lam takkan, an itui tak ne suang#27:4 An siriak mang ngai tak hi oliv riak a nit a, amakhan an an izêi ngai a nit. pêk inla, ki fâk rang ki ziangah hong do roh. Khanchu, fâng ki ta, ki thi ma ngêiah hin ki ṭhatvurna nî dong rang a nit,” a ti a.
5Isakan a naipa Esauva â sôn lâi khah Rebeki khan a lei ringai ṭian a. Khanchu, Esauva khah sa kâp ranga ramah a fe kaneh, 6Rebeki khan a naipa Jakoba ziangah, “Ringai roh, ni pa khan ni u Esauva ziangah, 7‘Sakhi ne hong that pêk inla, ne suang pêk roh, fâng ki ta; ki thi ma ngêiin Pumapa maah ki ṭhatvurna nî dong rang a nit,’ a ti pêk lâi ki riat a. 8Khasikin, ki naipa, atûnah hin thu nang ki pêk lam takkan tho roh. 9Kêl lôm lâiah va fen la, an lâia a tuai rinoi iṭha tak kêlte inikah hong chôi roh; amakhah ni pa nuamlam takkan an itui tak suang pêk ki ti. 10Ni pa fâk rangin a ziangah chôi ni ta; khanchu, a thi maah khan ṭhat nang ai vur rang a nit” itin he a be a.
11Nikhomsela, Jakoba khan a nu Rebeki ziangah, “Ki u Esauva chu mi rimulthût a nit a, keimah lak mul nei ino, mi nâm ki nit a. 12Ki pa khan a ne lei ituai duai a, kî lêm a nit iti a riat suak duaiin chu ṭhativur nêkan vânisâm ilo ka kêng kî nit rang,” a ti a.
13A nu khan a ziangah, “Ki naipa, ni vânisâm dong rang murdi chu ki chungah la ṭum riseh, ki thu zôm inla, kêl chu ne va la pêk roh,” a ti a. 14Khanchu, a fe a, a va lâk a, a nu ziangah a hong chôi a; khanchu, a nu khan a pa dû lam takkan a suang pêk a. 15Rebeki khan a nai ulian ual Esauva silbom iṭha tak, ina a zianga om khah a lâk a, a nai naipang ual Jakoba khah ân hâk a. 16Kêl vunhei khah â bân neh a ring mul omnonaheiah khan a tuam pêk a. 17Khanchu, an itui tak neh ibai ai siamhei khah a naipa Jakoba kutah a pêk a.
18Khanungchu, Jakoba khah a pa ziangah a fe a, “Epa” a ti a.
Ani khan, “Hin ki om, ki naipa a tukhôk im nî nit?” a ti a.
19Jakoba khan a pa ziangah, “Ni naipa ulian ual Esauva ki nit; ni ne tir lam angka khan, ki tho zoi tâk a, ringaiihoi takkan thoi inla, iṭhung inla, ki sakhi sa hi fah roh; khanchu, ni ṭhatvurna kî dong rang a nit,” a ti a.
20Isaka khan a naipa ziangah, “Ki naipa, ingkan im lo ni va tluk imat bâk tâk a?” a ti a.
Jakoba khan, “Pumapa ni Pathian khan lo a nen tluk sika a nit,” itin a sâm a.
21Isaka khan Jakoba ziangah, “Ki naipa, ringaiihoi takkan ne hong nâi ta, nang lei ituai vêl rong, ki naipa Esauva chu ni nit titak im a,” a ti a. 22Jakoba khan a pa Isaka chu a va nâi a; ani khan a lei ituai vêl a, “A rôl irî chu Jakoba rôl irî a nit a, a kuthei lak chu Esauva kut a nit a,” a ti a. 23A kut khah a u Esauva kut angkan armul sikin ani khan Jakoba a nit iti khah ai riat thei ino a nit. Ṭhatvurna a pêk ma takin, 24â thar pialin, “Esauva chu ni nit titak na,” a ti nôk a.
Ani khan “O, ki nit,” a ti a.
25Isaka khan, “Hin ki ziangah hong chôi roh; khanchu, ki naipa ni sa that chu fâng ki ta, ṭhat nang lei vur rong,” a ti a. Jakoba khan a hong chôi a, ani khan a fâk tâk a; uain khom a hong chôi pêk a, a in sa tâk a. 26Khanungchu, a pa Isaka khan a ziangah, “Ki naipa, hong nâi inla, ke biang tum roh,” a ti a. 27Khanchu, ani khan a silbom inam khah a lei riat a; khanchu, ṭhat a vur a,
“O, ki naipa nam hih,
Pumapa ṭhatvur ram inam a nit.#Heb.11:20.
28Pathianin rivân rido nang pe sela,
Rinêng ṭhatna chu nang pe riseh.
Bu neh uain itam takkah hong nei roh.
29Nam dang danghei khan ni sin tho sela,
Mi tin tinin nang ikhûn riseh.
Ni suapuihei chungah ilalin om inla;
Ni nu naihein nang ikhûn riseh.
Vâni nang isâm kangân chu vâni sâmin om sela,
Ṭhat nang ivurtu kangân chu ṭhat ivurin om riseh,” a ti a.#Riph.12:3.
Esauvan a pa ṭhatvurna a ngên
30Hingka hin a nit a, Isakan Jakoba ṭhat a vur zoi a, Jakoba khah a pa Isaka ziang ata a suak zoi chakin, a u Esauva kha a ramrivâk a hong kîr a. 31Ani khom khan an itui takkan a suang a, a pa ziangah a hong chôi a; a pa ziangah, “Epa, thoi inla, ni naipa sakhi sa hih fah roh; khanchu, ni ṭhatvurna kî dong rang a nit,” a ti a.
32A pa Isaka khan a ziangah, “Tûm nî nit?” a ti a.
Ani khan, “Ni nai ulian ual Esauva ki nit,” a ti a.
33Khanungchu, Isaka khah natinsat takkan ân thing a, “Sa kâpa ki zianga a sa ne hong ichôi pêk khah tûm ai nit tâk? Ni hong tlung ma takah khan ki lei fâk a, ṭhat ki lei ivur tâk kha. Ṭhatvurna chu ai dong thal rang tâk chu a nit,” a ti a.
34Esauva khan a pa thuril khah a riatin chu ringaiinseh takkan a ṭap ngûi ngûi a, a pa ziangah, “O Epa, kei khom ṭhat ne vur sa roh,” a ti a.
35Nikhomsela, ani khan, “Ni unaipa khan a ne hong lêm a, ni dongtum ṭhatvurna chu ai lâk tâk a nit,” a ti a.
36Esauva khan, “Arming Jakoba an isak hih chu a îdik a nit. Hih voinikah a ne lêmna a nit tâk; ki nai lutîr nitna khah a ne lâk pêk tâk a; atûnah hin ṭhatvurna ki dong rang khom a ne ilâk pêk nôk tâk a nit hi,” a ti a. Amah ngirin, “Ṭhatvurna ichînteka lua ne zua pêk khâi mak chêm a?” a ti a.#Riph.25:29-34.
37Isaka khan Esauva kha a sâm a, “Ani chu ni chunga inlal rangin ki lei ti tâk a, a suapuihei murdi khom a suak rangin ki pêk riai a; bu neh uain khom itam takka nei rangin ki lei ti sa tâk a. Khasikin, ki naipa atûn chu nangma rangin îte tho thei nei khâi mang e,” a ti a.
38Esauva khan a pa ziangah, “Epa, ṭhatvurna khatkah bang im nî nei? O, Epa, kei khom ṭhat ne vur sa ngêt roh,” itin a ngên ngit a. Esauva chu iring takkan a ṭap a.#Heb.12:17.
39Khanungchu, a pa Isaka khan a sâm a, a ziangah,
“Ringai roh, ni omna chu ram ṭhatna ata ila takah nîng a ta,
Chungtiang ata rivân ridohei dong no tin e.#Heb.11:20.
40Ni khandai imangin ring ni ta,
Ni unai sin nî tho rang a nit.
Nikhomsela, ner hel suak tikin chu,
A ringkol khah ni ring ata ikhiak tâng ni ti,” a ti a.#Riph.36:8; 2 Rêng.8:20.
41A pa khan Jakoba khah ṭhat a vur sikin Esauva khan Jakoba kha a nel tâk a. Esauva khan a lungrilin, “Ki pa, kin sûn rang nikhua a nâi tâk a, khanungah khan ki unai Jakoba chu kî that rang a nit,” a ti a.
42Nikhomsela, Rebeki khan a nai ulian Esauva thiltum khah a riatin chu a nai naipang ual Jakoba khah a koi a, a ziangah, “Ringai roh, ni u Esauva hin nang ithat itumin a irsoi mai a nit. 43Khasikah khan, ki naipa, atûna ki thu hih ôi roh; thoi inla, Haran khuaa ki ṭâpa Labana ziangah lâizâm tho roh. 44Ni u ningthik hih a ṭuai mâkah chu a ziangah zoro itena sôt manih chu va om hi roh. 45Ni u ningthik hih ni chungah a boi a, a chunga ni sintho hih arngil tikah khan mi hong tir ki ta, khantak ata khah nang la hong inṭhui ta rong. Îtho rang im sûn khatkan ki naipahei nin ruaikan nangni ki îchân rim rang hi?” a ti a.
Labana ziangah Jakoba itir a nit
46Rebeki khan Isaka ziangah, “Esauva nam dang nupuihei sikah hin ki ringnun khom hih ki chang a dong tak tak tâk. Jakoba hin hi ram nungâk, Hit mihei lâia mi hih nupuiin a nei nôk vângin chu ki rangin iring hih im arfena rang?” a ti a.
Valið núna:
RIPHUTNA 27: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More