RIPHUTNA 1
1
Thilsiam thu
1Pathianin a tîra rinêng neh rivân a siamah khan, 2rinêng hi mêl riput dân îte la nei mak a, a korong ringot a nit a; tui inthûk#1:2 Rinêng neh rivân, boiruakhei hi â chîm riaitu tui iomin an riat a, amakha tui inthûk tak iti hi a nit. tak chung khom a zîng khap a. Pathian Rithla#1:2 Hebrai ṭongin rithla ti hei, ithli ti hei, rithuak iti hei hih a thu munkah a nit. ‘Pathian ithli a râng vut vut’ itih thei a nit; ‘Ithli natak a râng vung vung a’ a tina a nit thei. khan tui chunghei chu a op mai a. 3Pathianin “Ivâr hong om riseh,” a ti a; khanchu, ivâr a hong om tâk a.#2 Kor.4:6. 4Pathianin ivâr khah a en a, ṭha a ti ok a; khanchu, ivâr neh izîng kha a ṭhen tâk a. 5Pathianin ivâr kha sûn a be a, izîng kha zân a be a. Khanchu, kholoi tiang a om a, zîng tiang khom a om a; amakhah a sûn khat nî chu a nit.
6Pathianin, “Tui neh tui â ṭhen rangin boiruak rizat tak om riseh,” a ti a.#2 Pet.3:5. 7Khanchu, Pathianin boiruak#1:7 Boiruak iti hih vân pial idum tina khom a nit a, vân pial idum khi satel riko angkana thil ikhir rikhup thuk angkan an ringai a, Vân khup iti thei a nit. rizat tak chu a siam a, boiruak rizat tak nuaia tui iomhei neh boiruak rizat tak chunga tui iomhei khah a ṭhen tâk a. Khanchu, khangkah khan a hong nit tâk a. 8Pathianin boiruak rizat tak khah “Rivân” a be a. Khanchu, kholoi tiang a om a, zîng tiang khom a om a; amakhah a sûn nik nî chu a nit.
9Pathianin, “Rivân nuaia tuihei mun khatkatah richin zit sela, imuang chu ilang riseh,” a ti a. Khanchu, khangkah khan a hong nit tâk a. 10Pathianin imuang khah “Rinêng” a be a; tui richinhei kha Tuikhanglian a be a. Pathianin amakhah a en a, ṭha a ti ok a. 11Pathian khan, “Rinêngin chimu rimal ineia râ ngai chi tinrênghei, thei â râ sunga a chi om ngai tinrênghei#1:11 Bu hei, vâimîm hei, fatun hei hi rimal fang khatkah chit a nit. Thei danghei hi chu ru an nei a, a ru sungah a chi khom kha a om a, rimal fang khatkah ai nit ino a nit. khah isua riseh,” a ti a. Khanchu, khangkah khan a hong nit tâk a. 12Khanchu, rinênga rithokin chimu an chi om rang dân angkana rimal ineia â râ ngai chi tinrênghei, thei â râ sunga a chi om ngai dang danghei kha a hong ṭoi tâk a; Pathianin a en a, ṭha a ti ok a. 13Khanchu, kholoi tiang a om a, zîng tiang khom a om a; amakhah a sûn thumnî chu a nit.
14Pathianin, “Sûn neh zân ṭhenna rangin rivân rizat takah khin ivârhei om sela, khahei khah hunbihei, sûnhei neh kumhei richik theina rang ni sela, 15khahei khah rinêng elinvâr rangin rivân rizatah khin om riseh,” a ti a. Khanchu, khangkah khan a hong nit tâk a. 16Pathianin ivâr ilian ual inikah neh ârsihei a siam a; inî a vâr irât ual khah sûna vâr rangin a ti a, ithla a vâr idôk ual khah zâna vâr rangin a ti a. 17Pathianin khahei khah rinêng chung elinvâr rang neh, 18izîng neh ivâr iṭhen a, sûna vâr rang neh zâna vâr rangin rivân rizat tak a khin a sia tâk a. Pathianin a en a ṭha a ti ok a. 19Khanchu, kholoi tiang a om a, zîng tiang khom a om a; amakhah a sûn li nî chu a nit.
20Pathianin, “Tuihei kha ringna nei chi tinrênghein sip sela, ivahei khom vânlâizôl rizat tak rinêng chungah khin vuang sup sup riseh,” a ti a. 21Khanchu, Pathianin tuikhangliana sarâng inrît tak tak hei, tui sunga mîring chi tinrênghei neh chunga vuang iva chi tinrênghei a siam tâk a; Pathianin khahei khah a en a, ṭha a ti ok a. 22Pathianin ṭhat a vur a, “Chi tam takka neiin hong pung rei, tuikhanglian sip zit unla, ivahei khom rinêngah hong pung riseh,” a ti a. 23Khanchu, kholoi tiang a om a, zîng tiang khom a om a; amakhah a sûn ringa nî chu a nit.
24Pathianin, “Rinêng khan mîring chi tinrêng an om rang dân angka chitin ramsahei, insungsahei, sa lianhei, sa chînhei, an chi om rang dân angka chitin isua riseh,” a ti a. Khanchu, khangkah khan a hong nit tâk a. 25Pathianin ramsahei, insungsahei neh rinênga bokrivâka lôn murdihei, mîring tinrêng an chi om rang dân angka takin a siam a; Pathianin khahei khah a en a, ṭha a ti ok a.
26Pathianin, “Ei ri-angpuiin, eimani ang zekkan miriam#1:26 Hebrai ṭongin Adam iti hih miriam itina a nit, mi mal riming ni mak e. siam ei la, ani khah tuikhangliana ingahei, chunga vuang ivahei, insungsahei, ramsahei neh mîring rinênga bokrivâka lôn murdi chungah thu innei ei ti u,” a ti a. #1 Kor.11:7; Mat.19:4; Mk.10:6. 27Khanchu, Pathianin ama ri-angpuiin miriam, ipa neh nupang a siam a; Pathianin ama ang zekkan ai siam a nit.#Riph.5:1-2. 28Pathianin anni kha ṭhat a vur a; an ziangah, “Chi tam takka neia hong ipungin, rinêng chung hih luan sip unla, nin thunuaiah in-om rei; tuikhangliana ingahei, chunga vuang ivahei, rinêng chunga mîring murdi chungah thuneina nangni kî pêk a nit,” a ti a.
29Pathian ngirin, “Ringai rei, rinêng chunga chimu tinrênghei neh thei chi tinrênghei chu bua nin rin rangin nangni kî pêk a nit. 30Rinênga sa murdihei, chunga vuang iva murdihei neh nuaia bokrivâka lôn, ringna nei tinrênghei fâk rangin loisûl murdi kî pêk a nit,” a ti a. Khanchu, khangkah khan a hong nit tâk a. 31Pathianin a thil siam murdi chu a en a, ṭha a ti ok a. Khanchu, kholoi tiang a om a, zîng tiang khom a om a; amakhah a sûn ruk nî chu a nit,
Valið núna:
RIPHUTNA 1: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More