Yohana 4
4
Yesu na nkīma Nsamalia
1Hūna lūūlū, ū Seeba akadeeba gīkī, a Bafalisayo bigwile gīkī ū Yesu akūpandīkaga bahemba bingī kūtinda ū Yohana, na kūbabatīīja. 2Gwike ū Yesu walī atabatīījaga ū wei ng'wenekīlī, babatīījaga bahemba bakwe. 3Aho wagūdeeba ū mhayo gwenūyo, wīnga ī Būyudaya ūja hangī Galilaya. 4Ī nzīla īyo akabītīla yalī ībītile mu Samalia. 5Ūshika mu nzengo nebe gwa Samalia, gwitanagwa Sikali, gwalī hihī n'ilaale ilebe, Yakobo walī wang'winha ng'witūnja wakwe Yosefu. 6Lwalīmo na lwinzī lokwe ū Yakobo. Hūna lūūlū ū Yesu īkī walī wanojiwa lūgendo, aho washika a ha lwinzī lwenūlo wigasha; gaalī makanza gītī ga sa itandatū limi. 7Kwimanīla nkīma Nsamalia wiza kūdaha minzī; ū Yesu ūng'wīla, “Mayū ninhage minzī nang'we.” 8A bahemba bakwe baalī baja mu nzengo kūjūgūla shilīwa. 9Ū nkīma ū Nsamalia ng'wenūyo ūng'wīla gīkī, “Tūhaya ūlī Nyudaya ahene ū bebe, hama nibūlī ūlīnilomba minzī, alīyo ū nene nalī nkīma Nsamalia?” (Nguno a Bayudaya batī na būsangī na Basamalia). 10Nang'hwe ū Yesu ūnshokeja ūng'wīla, Ūlū ni ulimanile īlī nong'ho lya ng'wa Mulungu, nū yūyo alīkūwīla gīkī, ‘Ninhage minzī nang'we,’ nang'ho ni wanomba akwinhe minzī gali na bupanga.” 11Ū nkīma ūng'wīla gīkī, “Bebe baba wagafunya halī a minzī gali na bupanga, alīyo nī lidahījo ūtī nalyo; hama nū lwinzī lwenūlū lūshimu gīkī? 12Ū bebe ūlī ntaale kūnkīla ū sīswe ū Yakobo, ūyo watūlekela ū lwinzī lwenūlū? Īkī nū wei ng'wenekīlī wang'welaga henaha aha, pye na a baana bakwe, nī mitugo jakwe!” 13Ū Yesu ūnshokeja ūng'wīla, “Būlī ng'wene ūyo akagang'waga a minzī genaya akakolagwa nota hangī. 14Alīyo ose ose ūyo ūgang'wa a minzī ayo nakūng'winha nene, atūkolwa nota welelo bose, a minzī ayo nakūng'winha gakūbiza lūzwīlo ū mulī wei, lwa kwikala lūkūpumunhikaga būja na būja pyī ī shikū.” 15Ū nkīma ūng'wīla gīkī, “Ninhage nane baba a minzī genayo, nooye ū kūkolwa ī nota, nooye na kwikala niza aha kūdaha minzī!” 16Nang'hwe ū Yesu ūng'wīla, “Jaga ūkang'witane ū ngoshi wako ng'wize aha.” 17Ū nkīma ūnshokeja ūng'wīla, “Natī na ngosha wane.” Nang'hwe ū Yesu ūng'wīla, “Watūngīlīja ū kūhaya gīkī, ‘Natī na ngosha wane.’ 18Nguno washishaga bagosha batanò, hama nū yūyo ūlī nang'hwe ī haha atī ngoshi wako. Ohaya ūmo īlī gete!” 19Ū nkīma ūng'wīla, “Baba ī gete nabona ūlī ng'hangi ū bebe. 20A bakūlūgenji bise balamījaga mu lūgūlū lwenūlū ūlū, alīyo a bing'we mukahayaga gīkī ī lipandī īlo shiigeleelilwe kūlamīja moilīī Yelusalemu!” 21Nang'hwe ū Yesu ūng'wīla, “Nizunīlījage gete mayū; gīkī, līliza ikanza īlo mukoya kūgonga kūnamīja ū Baba mu lūgūlū ūmu, nūūlū Yelusalemu. 22A bing'we mukalamyaga īsho mutashimanile, alīyo a bise tūkanamyaga ūyo tūūmanile; nguno ū būpīji būfumile kū Bayudaya. 23Gwike ī likanza līliza, nīyo ī haha līlīho, ī lya balamya ba ng'wa ng'hana kūyūnamya ū Baba mu moyo na mu ng'hana; nguno ū Baba abatogilwe a balamya abo bakanamyaga mu mbika yenīyo. 24Ū Mulungu alī Moyo, a balamya bakwe nabo shibigelile kūnamya mu moyo na mu ng'hana.” 25Ū nkīma ūng'wīla, “Namanile gīkī akwiza Masīya, ūyo akitanagwa Kilisito, na lūūlū ūlū wiza ū ng'wenūyo, hū ng'wene ūyo akūtūgoloolela pyī ī yose.” 26Ū Yesu ūng'wīla, Ū Nene ūyo nalīyomba nang'ho, hū nalī ng'wene.” 27Ī likanza lyenīlo būshika a bahemba bakwe, būkumya ū kūmona alīyomba na nkīma. Alīyo nūūlū ūmò wabo atabūgije gīkī, Ūlīkooba kī?” Nūūlū gīkī, “Nibūlī ūlīhoya nang'hwe?” 28Ū nkīma ng'wenūyo ūlūleka ū lūnno lokwe ūshoka mu nzengo ūūkabawīla a banhū gīkī, 29“Bing'we ka nzūgwi kūūnū munole ūūyū munhū, waniwīla pyī īyo nakīītaga; akūduuma kūbiza Kilisito gete ū ng'wenūyū?” 30Būfuma ū mu nzengo būhūūma bajile ūko walī. 31Ū ng'wikanza lyenīlo a bahemba būng'wīla ū Yesu gīkī, “Rabi ka lyaga!” 32Nang'hwe ūbawīla, Ū nene nalī na shilīwa īsho mutashimanile a bing'we.” 33A bahemba būyiwīla gīkī, “Hamo munhū walī wang'wenhela shilīwa?” 34Nang'hwe ū Yesu ūbawīla, “Ī shilīwa shane ū nene, shilī kwīta īyo atogilwe ūyo anitūmile; kūgūshikīlīja ū nīmo gokwe. 35Ī gīsī mutiwīlaga gīkī, ‘Yasaagaga myeji īne gashike magesa?’ Ali lūūlū, ī haha nalīmuwīla būūchagi a miso ging'we, mulole ū mu migūnda, mukūbona gīkī a magesa gashikaga. 36Ī haha ū ngesi wandije kwanukūla mheela, akūkumingaga matwajo kūlwa būpanga, bupanga butashilaga; ībize gīkī ū ngesi nū mībi bayegele hamò. 37Nguno ū mu gīko gūkubiza gūlī gwa ng'hana ū mhayo ūyo gūhayile gīkī, ‘Ū mībi ūngī, nū ngesi ūngī.’ 38Nalīmutūma kūshigesa īsho mutashikoyelile a bing'we, bashikoyela bangī; a bing'we mulingīla mu nīmo ūyo gwandiwa na bangī.” 39Basamalia bingī ū mu nzengo gwenūyo bakanzunya, kūlwa mhayo gwa nkīma ūyo akagūhaya; ī gīkī, “Waniwīlaga pyī īyo nakīītaga.” 40Hūna lūūlū a Basamalia aho bashika, būnomba ū Yesu alende lende hamò nabo; na ng'hana wikala nabo shikū ibīlī. 41Na bangī hangī bakazunya kūlwa mhayo gokwe. 42Būng'wīla ū nkīma gīkī, “Ī haha twigwaga bise benekīlī, na lūūlū twazunyaga; alīyo ītī kūlwa nguno ya mhayo gwako dūhū, twamanaga gete gīkī ū munhū ng'wenūyū ng'hana Mpīja wa ba mu sī.”
Kūpījiwa kwa ng'witūnja wa nsugi
43Aho jabīta shikū ibīlī, ū Yesu wīnga a henaho ūja Galilaya. 44Gwike walī wamala kūhaya hape gīkī, Ū ng'hangi atinhagwa ikūjo ū mu sī ya ng'wawe!” 45Hūna aho washika ī Galilaya bingī ba bana Galilaya būng'wanukūla, nguno baalī bībona īyo akībeeja aho alī Yelusalemu kū shigukulu, īkī nabo baalī ko. 46Ūja ūūkashika hangī ī Kana ya Galilaya, ūko walī wagalūcha minzī gūbiza mvinya. Walīho nsugi nebe muna Kapelanaumu, walī asaatīlilwe ng'witūnja wakwe. 47Aho wigwa gīkī ū Yesu wīngile ī Būyudaya, alī mu Galilaya, wiza kūng'wikūmbīlīja atulumenhe, aje akampīje ū ng'wana wakwe. Nguno walī mandetendete, hihī na kūcha! 48Alīyo ū Yesu ūng'wīla gīkī, “A bing'we ūlū mutabonile shimanīkījo nūūlū mihayo ya kūkumya, angū mmho mutūdūla gete ū kūzunya!” 49Ū nsugi ng'wenūyo ūng'wīla gīkī, “Baba ka tulumenhaga wangū, kūko kataalī kūcha u ngwanone!” 50Ū Yesu ūng'wīla gīkī, “Jaga ū ng'wana wako mpanga.” Ū munhū ng'wenūyo ūgūzunya ū mhayo ūyo akawīlwa na Yesu, ūja ng'hana. 51Aho alīshoka ūmanhya na batūmami bakwe, būng'wīla gīkī ū ng'witūnja wakwe wapīlile. 52Wahayūbabūja ī likanza īlo akandya kūbeeja, būng'wīla, “Igolo aho lyandya kūhūga ī līīmi; mu makanza gītī ga sa mpungatī, gwandya kwika ū nswiza.” 53A henaho ū ise ūmana hū lyene ī likanza īlo Yesu akang'wīla gīkī, Ū ng'wana wako mpanga.” Na lūūlū ūbiza nzunya, nī kaya yakwe pyī ī yose. 54Ī shenīsho shalī shimanīkījo sha kabīlī īsho a kabeeja ū Yesu aho alī mu sī ya Galilaya, hanze ya Būyudaya.
Valið núna:
Yohana 4: SUKBI15
Áherslumerki
Deildu
Afrita
Want to have your highlights saved across all your devices? Sign up or sign in
Sukuma Bible © Bible Society of Tanzania, 2019.