Matayo 9
9
1Limɔ Inde lokwa nda watɔ, Inde loleka, Inde loiya nda okenge wande angɛnɛ.
Boto wa Lonyango
2Omao iyo loeshel’Inde boto wa lonyango, aingalaka tambelele nda tange; ɛnɛkɛ Yesu liimeli liau Inde loonga la ewa lonyango mbo— Wana, sambolaka botema, njasɔ ibe yaɛ bisomɛsɛlɔmɔ. 3Lamao batikasa bamɔi loonganaka mbo— Boto-yo asosɛɔlɔ Mungu. 4Aluwäkä Yesu baenyeli ba betema yau, Inde mbo— ¿Monito otoenyela obe nda betema yanu? 5Loni losoeta la ɔlɛmbu, kwa ndoonga mbo— Njasɔ ibe yaɛ bisomɛsɔlɔmɔ, kwa ndoonga mbo— Emalaka la tangwaka? 6Kongo ko mbo boluweke mbo Wana wa Boto ende la isosha shomɛsɛlɛ njasɔ ibe ono se, limɔ Inde loonga la ewa lonyango mbo— Emalaka, ilaka tange yaɛ, la kɛndɛkɛ nda ndakɔ yaɛ. 7Boto loemala yai, inde lɔkakɛ nda ndakɔ yande. 8Nde ɛnɛkɛ windi wa bato ongoma, iyo lowanga, iyo loinela Mungu oyasofa bato isosha sha bɔfɔnɔ-bo.
Lotomo-lioi loa Lewi
9Etaka Yesu omao Inde lɔɛnɛ boto ako Matayo, ani ayaläkä se nda ɛsɔnjɛlɔ ya bɔsɔmbi, la Inde loonga lande mbo— Tutaka’mi. Inde loemala la inde lotuta Yesu. 10Lamao ayalaka Yesu nda mɛsa nda ndakɔ, bɛsɔnji ya bɛsɔmbi la bato ba njasɔ ibe wike loya oyayalaka la Yesu la baeki bande. 11Nde ɛnɛkɛ BaFalusi ongoma, iyo loonga la baeki bande mbo— ¿Monito Boekesi wanu atola bieka amamwito la bɛsɔnji la bato abe? 12Okäkä Yesu ongoma, Inde loonga lau mbo— Ebale la bosasu baitolüka bonganga kangä eba kambo. 13Kɛndɛkɛ okeka litina lia elioi-li liko mbo— Ilɛmbi nde booto, inga nyama yoolomu; eoka itiye oyata eba liengani lioi, kangä eba njasɔ ibe.
14Lamao baeki ba Yoane loya ende Inde, iyo mbo— ¿Monito la iso la BaFalusi, totokilaka ndola bieka mbile la mbile, kongo ko baeki baɛ baitokila? 15Yesu loonga lau mbo— ¿Atoyalaka tolesani amamwito la oyatosɔngɔ, batokɔkɔlɔ ndolelaka? Bacho beyaka nde ani bɔsɔngi atɔɔnɔkɔlɔmɔ end’iyo, limɔ iyo kokila bieka. 16Boto aitowamba esinda ya liɔmbɔ la yaki ya esinda eyai, eoka mbamba ya esinda eyai etosalaka eya liɔmbɔ limɔ lifola litofalwa. 17Boto aitoangola banä bayai nda biuku ebisoumwa eoka mbo banä bataacha biuku, limɔ banä batowɛlɛmɛkɛ se la biuku kowa; nde banä bayai batowɛlɔmɔ nda biuku biyai, l’ani yao imbale kotekama.
Wana Otomali wa Yailo
18Aongäkä Yesu baoi-ba, bokumi ɔmɔi loya oyakwa balui se oso wande, inde mbo— Wana otomali wami asokwela se ko kwani, kongo ko yauku oyatalia inde bosamba waɛ, limɔ ewawaka. 19Yesu loemala, Inde lotut’inde la baeki bande lisanga.
20Limɔ botomali oyayalaka la lisendwi lia bakila ko miaka liu la imbale; inde loya ombisa ya Yesu, inde lomata lisɛmbɛlɛ lia esinda ya Yesu, 21eoka inde loonga nda botema wande mbo— Yemata ango esinda yande imi kouwesomo. 22Lamao Yesu lokikwa, Inde lɔɛnɛ otomali, Inde mbo— Wana otomali, sambolaka botema, liimeli liaɛ lisouwes’aɛ. Ko la mbile-ao otomali ona louwesomo.
23Iyäkä Yesu nda ndakɔ ya bokumi, Inde lɔɛnɛ ebatoomaka tofonge la limbilititi lia bato batofichaka etondo efi, 24Inde loonga lau mbo— Sokwaka eya, boseka atiwe, aingali ilɔ! limɔ iyo losɛkɛlɛ Inde finɛ. 25Nde asokolomökö windi wa bato, Inde lɔɔtɔ ndakɔ, Inde lounda boseka la lingasa, inde loemala yai. 26Lokuku loa eloasɔ-lo lofafana nda yese ena etotina.
Bato bambale ba botuku
27Etaka Yesu omao bato bambale ba botuku lotutak’Inde, iyo loamama mbo— Welak’iso shota, Aɛ Wana wa Dawidi. 28Ɔtɔkɔ Inde nda ndakɔ, iyo loya end’Inde; limɔ Yesu loonga lau mbo— ¿Oimeli nde mbo isokɔkɔlɔ okeel’ino eloasɔ-lo? Iyo mbo— Eingo Ngɛnɛ. 29Limɔ Inde lomata baiso bau, Inde mbo— Lokeelomoko ino kwa ayali imɔ ko liimeli lianu. 30Limɔ baiso bau loliolomo. Yesu loimak’iyo mbo— Otaluwesëke boto angɔmɔi. 31Nde iyo losokwa omao, limɔ iyo lofafanesa lokuku loande nda yese ena etotina.
32Atangwäkä ebato-ba, tɛnɛ boto weuma oyaɔtɛlɔmɔ̈kɔ̈ imɔ la bolimo obe! 33Asokolomökö bolimo obe eweuma loongaka, la windi wa bato lomwaala, iyo mbo— Lotitɛnɛlɛkɛ kɔni ongoma nda Isalaele. 34Kongo ko BaFalusi loakola ndoonga mbo— Ende ko la bɔkɔta wa belimo ebe eyetokusol’Inde belimo ebe.
Kɛndɔ ya Yesu yonangola Mboli Ilau
35Yesu lɔkɛndɛkɛndɛkɛ nda kenge bifi la ebikɛkɛ bitotina bitimbi ndokaekese nda bisɔngɔmɛlɔ yau, Inde lonangokolaka Mboli Ilau ya Bɔkɔta la Inde louwekekesa bato ba ngwo la kambo ya bɛfɔnɔ bitotina. 36Nde ɛnɛk’Inde biindi ya bato Inde lookel’iyo ngandi, eoka baeyaeyäkä, batekukumäkä kwa bɛkɔkɔ ebiti la botingani. 37Limɔ Inde loonga la baeki bande mbo— Eula yende efi nde ebatotwaka yao bende bamyɔ, 38eokao sombokolaka Ngɛnɛ wa eula mbo atomeke batwi nda eula yande.
Valið núna:
Matayo 9: NTKE58
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.