Matayo 17
17
Eliya la Mɔsɛ loyaongana la Yesu
1Mbisa ya bacho liambɛ, Yesu lɔɔsɔ Petelo, la Yakobo, la etungani ya Yakobo ako Yoane, Inde lɔkɛsɛnɛ lau olikolo lia löngo lofi, ko iyo angɛnɛ kongo; 2limɔ Inde lokindolomo bɔfɔnɔ wasi oso wa baiso bau, la bɔmbɔ wande longalikima kwa löwa, la bisinda yande imɔ lolangema langelele. 3Futuku Mɔsɛ la Eliya lɔɛnɛlɛ ani batoongana la Yesu. 4Lamao Petelo loonga la Yesu mbo— Ngɛnɛ, ende bolau end’iso ndoyala eyamaya, Aɛ bɔlɛmbɛ, isweke ono kumbo bisatɔ, ɛmɔi yaɛ, ɛmɔi ya Mɔsɛ, ɛmɔi ya Eliya. 5Angotasila ndoonga, lifita lia bolangalanga loyaisa iyo, la limiki lookana nda lifita, mbo— Oyo ende Wana wami wa losamɔ, oyatoomalesa’mi, okak’Inde. 6Okaka baeki lioi-li, iyo loomakana biɔmbɔ la se, iyo lowänga finɛ. 7Nde Yesu loyamata iyo, Inde mbo— Emalaka, owängëke. 8Ilak’iyo baiso, batiɛnɛ̈kɛ imɔ boto, sakolo ko Yesu angɛnɛ.
9Asekwäk’iyo nda löngo, Yesu loimak’iyo mbo— Okambesëke boto angɔmwito ebisoɛnɛlɛ sakolo ko ani Wana wa oto asɔtɛmwa nda liwa. 10Lamao baeki lofel’Inde mbo— Eok’iye, batikasa batoonga mbo loengani nde mbo Eliya atayaka oso? 11La Yesu lomutoel’iyo mbo— Wewe Eliya nd’atoya oso ndoyakɔkɔmɛsɛ bitotina, 12nde Im’itoonga lanu mbo Eliya asoya ndoya, nde iyo batiluwek’inde la basokeel’inde kwa asosang’iyo. Ko ongoma Wana wa boto eokesomoko bowaü ko lau. 13Lamao baeki lolüwa mbo aongiki lau loasɔ loa Yoane Bolufi.
Louweso loa wana oyaaka la Olimo Obe
14Iyäkä iyo ende bikuke ya bato liasi, boto ɔmɔi loya ende Yesu, inde loswa balui se oso wande, inde mbo— 15Ngɛnɛ welaka wana wami botolome shota, eoka ale l’isekakɔkɔ la wale finɛ la mbile la mbile atokwaka nd’ösä, la nda balia imɔ ko ongoma; 16iyiki ende baeki baɛ, nde batikɔkɔlɛkɛ ndouwes’inde. 17Limɔ Yesu lomutola lande mbo— E-fɛtɔ-ye eti la liimeli, esofenyakana nde; ¿itoumwaka lanu ko mbile yanga? ¿Itokɔkɔmɛlɛ ino konda eni mbile? Eshak’inde l’ono ende’mi. 18Lamao Yesu loimaka bolimo obe, la wao lokuswa, la wana losäsa ko la mbil’ao.
19Limɔ baeki loya ende Yesu ko iyo angɛnɛ lande, iyo mbo— ¿Iso angokɔkɔlɔ ndokusola wao monito? 20Yesu loonga lau mbo— Ko l’eoka ya liimeli lianu likɛkɛ, eoka itoonga lanu wewe mbo— Eya ngo mbo ino boyala la liimeli kwa lokoto lɔmɔi loa mbasɛ, ani ino koonga la e-löngo-lo mbo— Sokwa eya, etak’onamona, la loao kosokwa; angwɛnɛ imɔ loasɔ ango lɔmɔi eloitokɔkɔl’ino okela.
22Ainwäk’iyo nda Ngalilai, Yesu loonga lau mbo— Wana wa boto ewambomoko nda besamba ya bato, 23la batool’Inde, lamao mbisa ya bacho basatɔ, Inde kɔtɛmwɛsɔmɔ liasi. Iyo looka ikɛnɛnɛ sifi.
24Iyäkä iyo nda Kafenauma, basɔnjaki ba lifaefi lia BaYuda loya ende Petelo, iyo mbo— ¿Boekesi wanu atikusole lopata loa lifaefi? 25Inde mbo— Eingo. Aɔtɔkɔ Petelo nda ndakɔ, limɔ Yesu lotaonga oso wa Petelo, mbo— ¿Otoenyela to moni, Simona? ¿Bɛkɔta ya wenda-bo batɔɔsɔ bosömbo la bɔsɔmbi ende ndai? ¿Ende bana bau angɛnɛ kwa ende bana ba bɛɛnda? 26Petelo mbo— Ende bɛɛnda. Yesu mbo— Ongoma, bana angɛnɛ angokamba bɔsɔmbi to. 27Nde eoka mbo totakwesa bato-ba nda litwanelo, takɛndɛkɛ nda ngɔngɛ ya eliya, taka shuku, la swi eyetotangola shao ani osokɔkɛlɛ, aɛ kɔɔsɔ yao, akalioleke aɛ bɔnɔkɔ wa swi, aɛ koosha lopata lofi; ɔsɔkɔ loao, faefak’iyo loao loasɔ loaɛ lami.
Valið núna:
Matayo 17: NTKE58
Áherslumerki
Deildu
Afrita
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.