O Kandɔɔ 2
2
1Nuaa halataalaa, lɛŋnden a ɲɛm co lenin-ndon kpow n cuu cɔvɔɔ ni. 2Mɛɛ Hala cii baala kon tosa kpow, mó mal vallo, mó pɛngi o paale ŋɔmmɛwndɔlen coo. 3Mó dɔaw paale ŋɔmmɛwndɔle len duaa, mó siinguu len paale pɛngiaalen, kani ɲinkon o pɛngi a baala ndɔ cɔavaa ni. 4Nuaa Hala cɔw halataalaa a lɛŋnden o ceendo kandɔɔ ni.
Nakɔɔ o lɛŋnde Edɛn-nden nin
Tuma Mɛlɛka Hala cɔw halataalaa a lɛŋnden-ndo, 5yɔmndo ndu pilɛ bɛɛ ndóò vil-lɔ o lɛŋnden coo le, hali billo bɛɛ ndóò vil-lɔ le. Kani Mɛlɛka Hala ndóò tuisi vɔ piɔɔ o ceendo coo le. Vanaciee ve vɔ vɛlɛ le baalaa tosaa o lɛŋnden coo le. 6Fɔ mɛmma va fulaa lɛŋ-ndan ma va lɛŋnden pɔɔliaa ni.
7Mí Mɛlɛka Hala ɲɔla puuloo lɛŋ, mó cɔaw vanacieo a puulu kon. Mó hul ndu hoeyii yoomuɛi o tɛɛngun lamilinndon nin, mí vanaciee kon siŋnun ɲɛ yoomaa. 8O kon kɔɔli, mí Mɛlɛka Hala soli nakɔɔ o lɛŋnde Edɛn-nden nin, a ba paalen le can-ndo, mó mal vanapɔnɔ o cɔw kon-ndo o nakɔ kon nin. 9Mó soli yɔmnde súúlan kpow o nakɔ kon nin, í naŋ o tofaa mi ì yeela o dioo-e. Mó soli yɔm cindaa o nakɔɔ tɛɛn déŋ, mó soli vɛlɛ yɔm tosa mì vana siná dɛnɛ kɛndɔɔ a dɛnɛ vɔɔndo-o.
10Pee bɛndoo pum va fulaa Edɛn le nakɔ kon pɔɔliaa, mí pee kon piɔvan tɛiyon mún hiɔɔlu lon. 11Tɛyii tasei diolan Pison, ndi balu lɛŋnde Havila len ni. Sianion co o lɛŋnde len nin taw, 12naŋɔɔ pila sianin mun naŋ ni. Bedeliɔmndo va vɛlɛ lon taw, a pow onikse. 13Tɛyii diinndɔɛi pee kon va Kihon ni. Ndi balu lɛŋnde Kus len kpow ni. 14Tɛyii yàándɔɛi va Tikre ni, ndi kei o lɛŋnde Asiri len a ba paalen le can-ndo ni. Tɛyii hiɔɔlundɔɛi pee kon va Efrate ni.
15Mí Mɛlɛka Hala cua vanapɔnɔɔ#2.15 vanapɔnɔɔ: Adam pɛɛn, ndu co vanapɔnɔ kon ni., mó mal ndu o nakɔɔ Edɛn nin le baalaa tosaa lenin a le nakɔ kalaa mandaa. 16Mí Mɛlɛka Hala hendul ndu tɔŋndo aa: «A nɔla mà de kɔmnde yɔm oo yɔm co o nakɔɔ ho nin, 17kɛ dia kɔmnde yɔm tosà mì vana sina dɛnɛ kɛndɔɔ a dɛnɛ vɔɔndo-o le. Kani paale n co ndu dio len, piɔ́mndo siŋnun ɲinkon mial nɔm.»
Mɛlɛka cɔw vanalanɔɔ
18Mí Mɛlɛka Hala dimi aa: «O niŋ mì vanapɔnɔɔ va ndu pilɛ le. I co ndu vana malaa toosial mò va maa ndu pila.» 19Mí Mɛlɛka Hala cɔaw visia yondoa a yowva súúlan kpow a puuloo, mó yaa nda o vanapɔnɔɔ lo le cɔu mɛɛ ndóò kenin nda diolan yɛ. Visi oo visi ndóò bɛnda mì ndóò nɔ diola vanapɔnɔɔ ndóò yɔngunin ndu lan. 20O kon, mí vanacieo yɔngu visia cieeninnda, visia yondoa a yowva kpow diolan. Kɛ ndu pila ndóò sɔla vɔ vana malaa va maa ndu-o le. 21Le hee, mí Mɛlɛka Hala tuisi dialun vílɛ́in bɛndu-bɛndon vanapɔnɔɔ coo, mó hiawnun lɔan cundun. Mí Mɛlɛka soli ndu kpɛndɛi ipilɛ, mó mingi fonda kon peelu a visiei. 22Mó toosiaa vanalanɔɔ a kpɛndɛi o soli ken vanapɔnɔɔ o n'dial-le, mó yaa ndu o vanapɔnɔɔ lo. 23Mɛɛ vanapɔnɔɔ ce ndu, mó dimi aa:
«Ɛ̀ɛ̀ hɛ́ɛ̀! Má cè nihau paa fula o paala nilan nin-ndo
a dialii fula o dialun nun nin-nde!
O nɔnin diolan aa vanalanɔɔ,
kani o falun vanapɔnɔɔ nin o fula ni.»
24Lelan, vanapɔnɔɔ faŋannin fuɲa ndɔ a kala ndɔ, mò holnun laa ndɔ, mà siŋnun dialii pilɛi nda ŋiɔn.
25Vanapɔnɔɔ nda laa ndɔ á va tumnda fondo nda ŋiɔn kpow, kɛ vana-vana ve lasiɛmbu yɔŋ a o pilɔɔ le.
Valið núna:
O Kandɔɔ 2: BKG
Áherslumerki
Deildu
Afrita
Want to have your highlights saved across all your devices? Sign up or sign in
© Alliance Biblique en Guinée