Lukə 15
15
Jesus da hɔn ɲɔ̨n gɛ nuą
1Hvóló ta nįįhɔ̨nwɔ̨ kulɔ nuą da túwɔ́ pələ ɲɔ̨n gulɔ nuą, di lɛɠɛ Jesus ɓa, əgɛ, di nwoo mɛ̨n. 2Farisiɛ̨ɠaa da dɔ́n galamɔ̨ɔ̨ɠaa di líí ə holi, diɛ kɛ di kee ɓa: «Nui ŋɛ̨i a ɲee hee túwɔ́ pələ ɲɔ̨n gulɔ nuą mu, ɛlɛɛ, da diɛni diɛ kɔ̨nɔ̨n mį́į́ gee ɓa.»
Ɓɛlaa yii pili di gaa
(Matie 18.12-14)
3Jesus ə ɉanwon ŋɛ̨i hɔɔ diɛ, yɛ diɛ: 4«Ka nɛlɛ ɓə mɛlaa nwun dɔ̨nɔ̨ a kɛ yəi, dɔ̨nɔ̨ a pili ɉu, hva bow mɛ̨inąąn gɔw mɛ̨inąąn tii lɛɛ nɔi pun ɉu, yɛ li yii pili kwɛlii, ə lɛɛ ɉu ə gaa? 5Akɛ a gaa, gwəi a nɛ̨ɛ̨ kpɔ kɛnɛ̨. A ɉon, ə naa galan ŋą, 6ə paa la bɔɔli, yɛ mɛlaa da gwɛlɛ nuą diɛ, yɛ diɛ: ka gu kwəinɛ̨ɛ̨ kulɔ, mąąhɔlɔɓo, nwɔ́ ɓɛlaai kɛ aa pili, ŋą́ą́ gaa. 7Gáá moi kaa, akɛ nɛ̨ŋɛ̨n ɉəɠəmun dɔ̨nɔ̨ kpɛli a ɉɔn mąąhvalin, kwəinɛ̨ɛ̨ kɛnɛ̨ a kɛ Yálá-taa, nui tii mąą mɛ̨nį ɓa, ə tɛɛ telmo nuą pow mɛ̨inąąn kɔ́w mɛ̨inąąn ɓa, diɛi di hɔn mąąhvalin mɛ̨nį niihɛlɛn və diɛ.»
Wali yii pili di gaa
8«A wala kɛ tii, akɛ wali kwələ pow a kɛ nɛ̨ɛ̨nu ta yəi, dɔ̨nɔ̨ a pili ɉu ɲəi, hva mɔ̨ɔ̨ labon dɔɔ, ə bɛlɛ́n nąą kəlee kələ yɛ gwɛli kpɔ a nwąnąąi, ə lɛɛ la ɉu ə gaa? 9Akɛ a gaa, a mɛlaa kəlee təli, yɛ diɛ: ‹Ka gu kwəinɛ̨ɛ̨ kulɔ, mąąhɔlɔɓo, nwɔ́ walii pili, ŋą́ą́ gaa.› 10Gáá moi kaa, akɛ nɛ̨ŋɛ̨n ɉəɠəmun dɔ̨nɔ̨ kpɛli a hvaa mą ə bulu tɔɔ gɛ nɛ̨ŋɛ̨n ma, pələ kpɔlɔɔ ɓə kwəinɛ̨ɛ̨ a kɛ la Yálá nwɔ malakaɠaa yəi.»
Hulɔnon li toonwuma hu, ə pənə ə pa
11Jesus ə mo nwɔ̨nɔ̨ diɛ, yɛ diɛ: «Hulɔnu ta ə kɛ laa, lon ɉinąą hveelɛ di ɓo ɲəi. 12Nokolo laa mun yɛ di nąn ma: ‹Nán, lɛɛ heeni, ə́ ə́ kwɛlin ɲąąkwɛlɛ, ə́ nwɛ́i hvə.› Di nąn ə gwɛlin ɲąąkwɛlɛ di nu hveelɛ di lɔwai. 13Ɉu hvo kpɛli kwɛa, nokolo laa mun ə nwɔ hɛnŋąa həɠə ə nɔwɔtɔɔ, ə li a wali toonwuma hu. Ə lɛɛ laa, ə ɉɛn gɔwi tii kəlee hu kala. 14Ɓɛlɔwai ə ɉɛn gɔwi tii kəlee hu kala la, pulu kɛnɛ̨ ə too nɔi tii hu. Hɛn da hvo kɛa kɛ ɲəi yii a mį́į́. 15Ə li, ə lɔ nɔi tii hu mun da pɔ, əgɛ, yɛ koló kɛ laa. Yili ə dɛɛ ɲəi ɲɛa, əgɛ, yɛ nwɔ ɓoiɠaai mɛ̨i kaa. 16Ə kɛ bɔ, gɔ̨nɔ̨n tii moiɠaa di kɛi mį́į́, yaa kpɛli ə da mį́į́, kɛlaa, nu ta hvo kɛi da tɛɛ bɔ. 17Hvóló ta, ə hee, ə giliŋąhiɛ, yɛ mą: ‹Kóló kɛ nuą tamąą kaa ną́n ɲəi bɛlɛ́n, diɛ kɔ̨nɔ̨n mį́į́ diɛ gbəli lɛɛ! Kɛlaa, ɲą́ą́ mun, gɛ́ ɓo ɓɛ, gɛ́ haa a pulu! 18Yili ɓa, gáá pənəi ŋą li ną́n bɔ. Gáá lii kɛi mą: «Ną́n, ŋą́ą́ nɛ̨ŋɛ̨n ɉəɠə Yálá ɓa, ə lɛɛ, ŋą́ą́ nɛ̨ŋɛ̨n ɉəɠə yɛ́! 19Mąą hvo nɛ̨ɛ̨li hvo gáá kɛa a ə́ lon da, ɉón yɛ bələi yá ə́ wɔ koló kɛmun da.»› 20Yili pulu, ə muhəɠə, ə pənə yɛ li nąn bɔ.
«Gɛɛ nii kwɛaa la, nąn ə gaa, mąąwɛli ə ɉon gbɔ kɛnɛ̨. Ə gilɛ həɠə yɛ li non naakwiɛn ɉii; ə nɛ̨nɛ̨ɓo, ə wolo mą. 21Non ə mo kɛa mą, yɛ mą: ‹Ną́n, ŋą́ą́ nɛ̨ŋɛ̨n ɉəɠə Yálá ɓa, ŋą́ą́ nɛ̨ŋɛ̨n ɉəɠə yɛ́. Mą́ą́ hvo kpɛli nɛ̨ɛ̨li hvo gáá a ə́ lon da.› 22Kɛlaa, nąn ə mo nwɔ koló kɛ nuą diɛ, yɛ diɛ: ‹Ka pa a gbaawi lɛlɛɛ ɉa-ɉa ka doo gwaną, ka gbono too ɲee ɓa, ka kɔ́lɔ lɛlɛɛ lɔ gɔwɔ ŋą. 23Ka pa a nįŋɛ̨ gbɔn tii gɔlɔ lɛlɛɛ laa mą, ka baa, ka gu kwəinɛ̨ɛ̨ kulɔ, guu laa mį́į́. 24Hvó gaai, nón ŋɛ̨i, aa kɛ haa, aa pənə aa nwun; nwun na aa kɛ pili, ŋą́ą́ pənə ŋą́ą́ gaa. Diɛ kɛa mąą kwəinɛ̨ɛ̨ kulɔ.›
25«Nąąlɔwai, ɉulɔnui tii non gɛnɛ̨mun ə kɛ ɲɛa yɛ koló kɛ. Ɓɛlɔwai kɛa ə kɛi paa la, mąą kpua bɛlɛ́ laaləi ɓa, hvɛli woo yɛ tɔɔ bɛlɛ́ laaləi, nuą diɛ mąną kaa. 26Ə góló kɛmun dɔ̨nɔ̨ təli, ə mąąni kɛ, yɛ mą: Lə ɓə kɛ bɛlɛ́ laaləi? 27Yili ə nwoo pulu pənə yɛ mą: ‹Ə́ ləɠə ka tii aa pənə aa pa. Ə́ nąn aa nįŋɛ̨ gbɔn baa mą, gbala ə tɔɔ, aa gaa gɔlɔi ponoɔ.› 28Nu pɔlɔ laa mun ə niiɲąnwąną hvo kpɛli gɛ hvo lɔ bɛlɛ́n. Nąn ə kulɔ ɲɛnɛ̨ɛ̨, ə də li, ə niɛwoo ɓo yɛ mą: ‹'Lɔ.› 29Kɛlaa, non ə nwoo pulu pənə yɛ mą: ‹Ə́ wəli tɔɔ, aa kɛ a kwɛlan damąą, gɛ́ koló kɛ yɛ́, və́ ta ə́ woo pili li. Kɛlaa yaamun, hvo takpɛli ɓolu lon dɛɛ li bɔ́, kwa mɛ́laa ku hvo mį́į́ a kwəinɛ̨ɛ̨. 30Kɛlaa, ə́ lon ŋɛ̨i aa li, aa ə́ yəi hɛn gɔw hu kala nɛ̨ą pulu, a pənə a pa, ya ɓə ya nįŋɛ̨ gbɔn baa mą.› 31Nąn ə mo mą, yɛ mą: ‹Nón, gwa yɛ́ gu kaa gu kee ɓa a hvóló kəlee, ə lɛɛ, yii gaa ɲəi ə́ wɔɔ li. 32Kɛlaa, ə́ ləɠəi ŋɛ̨i, mąąnɛ̨ɛ̨ gu kwəinɛ̨ɛ̨ kɛnɛ̨ kulɔ mąą mɛ̨nį hu. Mąąhɔlɔɓo, ɉaai kɛ, aa nwun, ɛlɛɛ, aa kɛ pili, ŋą́ą́ pənə ŋą́ą́ gaa!›»
Valið núna:
Lukə 15: BKPDCG
Áherslumerki
Deildu
Afrita
Want to have your highlights saved across all your devices? Sign up or sign in