Ɉaan 1
1
Woo ə kɛ a nu
1Gɛɛ Yálá hvo yɛnɛ̨ɛ̨ pɛli, tɔlɔɔ, woo ə gbɛa kɛ laa. Nwoo tii, ə kɛ Yálá pɔ, gaa a Yálá. 2Tɔlɔɔ tɔlɔɔ, nwoo tii da Yálá ɓə kɛ laa. 3Nwoo tii ɓə Yálá ə hɛn gəlee pɛli la. Hɛnŋąą kpɔ yɛnɛ̨ɛ̨, da hvo pɛli li nwoo tii tɛɠi. 4Nwoo tii ɓə yɛnɛ̨ɛ̨ kpɛɛ hvo mą kaa ɉu, ɲiipoo tii ɓə a nuą di wɔ kɛɛ pono. 5Kɛɛ kaa ponoi kpinį hu, kpinį hva pɛli gɛɛ ponoi tii luwun ɉii.
6Yálá ə nwɔ wəlɛɛ ɓomun dɔɔ, diɛ kɛ naa ɓaa: Ɉaan. 7Ɉaan tii ə pa, ə kɛ a gɛɛ ponoi tii mąą kɛla hvaa ɓomun, ə gɛ, nu kəlee di laa gɛɛ ponoi tii mąą mɛ̨nį la. 8Nwɛlɛɛ ɓomun tii hvəə kɛ a gɛɛ pono. Kɛlaa, ə pa, ə gɛ, ə kɛɛ pono mąą kɛla hvaa ɓo. 9Nwoo tii, ə kɛ a kɛɛ pono kpɔ-kpɔɔ, yii pa yɛnɛ̨ɛ̨, ə gɛ, ə nu kəlee mąą pono.
10Nwoo tii ə wɔlɔ kɛ yɛnɛ̨ɛ̨, ya ɓə Yálá ə yɛnɛ̨ɛ̨ pɛli la. Kɛlaa, ə mą kɛ tii, yɛnɛ̨ɛ̨ hvo gɔlɔn ni. 11Nwoo tii ə pa bɔ lɔi nuą pɔ, kɛlaa, di hvo di yee hee mu. 12Kɛlaa, ə mą kɛ tii, nu tɛi-tɛiɠaai di yee hee mui, di laa na, ə huwalawala tɛɛ di pɔ, ə gɛ, di kɛ a Yálá lonni. 13Yiliɠaai di hvo kɛ li a Yálá lonni, yɛ pələi nu nwɔ kiliŋąhiɛ kaa la, a wala kɛ tii, yɛ pələi nu a lon ɉɔlɔɓo la. Kɛlaa, Yálá ɓə yɛnɛ̨ɛ̨ kɛ pələ nįnɛ̨ tɛɛ di pɔ.
14Nwoo tii, ə nu kɔ́lɔ həɠə, kwa diɛni ku yɛnɛ̨ɛ̨ kɛ gee pɔ, naa hvɛɛ a mɛ̨inɛ̨ɛ̨ da tɛ̨ą, ku nwɔ mąąwiɛ kaa yɛ bələi Lon gɔw tɔ̨nɔ̨ gbən a mąąwiɛ hɔlɔɓo la Nąn ɲəi. 15Nwoo tii ɓə Ɉaan Baptistə ə kɛi mąą kɛla hvaa ɓo yɛ tómą la, yɛ kɛ mą: «Nui ŋɛ̨i ɓə ŋį́ kɛi mąą mɛ̨nį ɓo gɛ́ kɛ diɛ: ‹Gaa búlú yɛ pa, kɛlaa, bɔlɔ-pɔlɔɔi dɛɛ mą́ą́. Mąąhɔlɔɓo, ə wɔlɔ kɛ laa gɛɛ di hvo ɉɔ́lɔ́ɓo.›»
16A tɛ̨ą nwɔ mɛ̨inɛ̨ɛ̨ kɛnɛ̨i tii, gu kəlee gu da hɔlɔɓo, lúwɔ́ ə laa lúwɔ́ mɛ̨i guɔ ɉɔlɔɓo. 17Gu Yálá nwɔ tɔ́n ɉɔlɔɓo Moisə háálai. Kɛlɛɛ, gu mɛ̨inɛ̨ɛ̨ da teŋą hɔlɔɓo Jesus Kristə háálai. 18Nu ta hvo ta Yálá kaa li, kɛlaa, Yálá Lon dɔ̨nɔ̨ gbən yii da Nąn di kɛ di kee pɔ, ya ɓə Nąn nɛ nuą diɛ.
Ɉaan Baptistə nwɔ kalan gɛ woo
(Matie 3.1-12; Markə 1.1-8; Lukə 3.1-19)
19Ɓɛlɔwai Ɉuifə nwun nąmįną ŋɛ̨i kɛ Ɉerusalɛmə daai di haláá laa həli nuą kpɛa-kpɛa da Levi huwu hu nuą tɔɔ la diɛ pa Ɉaan mąąni kɛi, diɛ kɛ mą: «Gbɛɛ ɓaa yɛ?»
20Yii ə di woo ŋąą pənə la ya ka: «Hvo kɛ lənə li di woo ŋąą pənə mɛ̨nį ɓa, yɛ diɛ ‹Və́ a Nwun mąąɓomun yii Yálá ə naakwɛlanmo.›»
21Di pənə di mąąni kɛ diɛ mą: «Gbɛɛ ɓaa yɛ? Akɛti, Eli ɓaa yɛ?»
Ə di woo ŋąą pənə yɛ diɛ: «Ya hvaa ɲą́ą́.»
Diɛ nwɔ̨nɔ̨ mą: «Akɛti, yɛ ɓə a Yálá kwəi mɛ̨nį hukulɔ mun?»
Ə di woo ŋąą pənə yɛ diɛ: «Kpaa-o!»
22Di mąąni kɛ diɛ mą: «A kɛ tii, gbɛɛ ɓa kani a yɛ? Ə gɛ, nuą ŋɛ̨i gu tɔɔ kwa li ku woo ŋąą pənə tɛɛ di pɔ. Ə kaa kɛi lə?»
23Ə mo diɛ, yɛ diɛ:
«Nui ŋɛ̨i nwoo kaa tɔɔi nɔi pun ɉu, ya ɓaa ɲą́ą́.
Yaa ŋɛ̨i kɛi diɛ: ‹Ka Ną́mu nwɔ pələi haŋą a nɛlɛɛ!›
Yɛ bələi tii Yálá kwəi mɛ̨nį hukulɔ mun Esai ə mo la.»
24Yaan nuąi ŋɛ̨i di di tɔɔ, Farisiɛ̨ɠaa di kɛ di lɔwai. 25Di pənə nwɔ̨nɔ̨ di Ɉaan mąąni kɛ, diɛ mą: «Akɛ Nwun mąąɓomun Yálá ə naakwɛlanmo ya hvaa yɛ, ə lɛɛ, Eli hva nwɔ̨nɔ̨ a yɛ, hvo nwɔ̨nɔ̨ a Yálá kwəi mɛ̨nį hukulɔ mun, lə mɛ̨nį ɓa ə kaa nuą mąąwaai?»
26Ɉaan ə di woo pulu pənə yɛ diɛ: «Ɲą́ą́ gáá nwɔ́ mąąwaai kɛi yái, kɛlaa nu ta kaa ka lɔwai yii ka hvo gɔlɔn, 27gaa búlú yɛ pa, ɲą́ą́ ŋɛ̨i mą́ą́ hvo nɛ̨ɛ̨li kpɛli a nwɔ kɔ́lɔi ɲɛli hvólóonmun.»
28Mɛ̨nįɠaai tii ə kɛi kɛ Bɛtani daai, Ɉurdɛn yá pulu ɓɛi Ɉaan ə kɛi mąąwaai kɛ laa.
Jesus kaa a Yálá nwɔ ɓɛlaa Lon
29Mąą yələ laa ɓoɔ, Ɉaan ə Jesus kaa yɛ pa bɔ. Ə mo yɛ diɛ: «Yálá nwɔ ɓɛlaa Lon ga, yii a yɛnɛ̨ɛ̨ nuą kəlee kɛ nɛ̨ŋɛ̨n gulɔ diɛ. 30Ya ɓə ŋį́ kɛi mąą mɛ̨nį ɓo gɛ́ kɛ diɛ: ‹Nu ta kaa búlú yɛ pa, bɔlɔ-pɔlɔɔi dɛɛ mą́ą́, mąąhɔlɔɓo, ə wɔlɔ kɛ laa.› 31Ɲą́ą́ ŋɛ̨i və́ kpɛli kɛ gɔlɔn, kɛlaa ŋą pa tɔwɔ ŋį́ mąąwaa yai, ə gɛ, ŋą yaai tii nɛ Israɛlə nwɔ nu huwui ɓa.»
32Ɉaan ə mo nwɔ̨nɔ̨ yɛ diɛ: «Ŋą́ Yálá nwɔ Kilii kaa yɛ yɛɛ mɛ̨i yɛ ɓopo, ə hee galan ŋą; ə lɛɛ mə̨i. 33Və́ kɛ gɔlɔn, kɛlaa Yálái ŋɛ̨i dɔ́ɔ́ ə gɛ ŋį́ mąąwaa kɛ, ə mo mą́ą́ yɛ mą́ą́: ‹Nui ə́ kaa pai Kili kaai ə yɛɛ mɛ̨i, a kɛ tii mąą nui tii ɓə pai mąąwaa kɛi a Kili-Mąąhəɠɛɛ.› 34Ɲą́ą́ ŋą́ą́ yili kaa tii, ya ɓə gɛi gɛ́ kɛ diɛ: Nui ŋɛ̨i kaa a Yálá lon.»
Jesus nwɔ kalan nɛa tɔlɔɠaa
35Yili pulu yələ laa ɓoɔ, Ɉaan da nwɔ kalan nɛai veelɛ di kɛ nwɔ̨nɔ̨ tɔɔni gɛɛnąą tɔ̨nɔ̨i tii. 36Nąąlɔwai Ɉaan ə ɲɛ̨i hee Jesus ɓa yɛ tɛɛ ə mo yɛ diɛ: «Yálá nwɔ ɓɛlaa lon ga!»
37Ɉaan nwɔ kalan nɛa hveelɛi tii di nwoo tii mɛ̨n nɔ di hvilɛn Jesus pulu. 38Jesus ə di kaa di hvilɛn ŋąą bulu, yɛ diɛ: «Lə ɓə ka káá gwɛli?»
Di nwoo pulu pənə diɛ mą: «Rabi, (yili mukulaa ɓaa: kalamɔ̨ɔ̨) mįnɛ̨ ɓə ə́ kaa laa?»
39Jesus ə mo diɛ yɛ diɛ: «Ka pa gwəli, ɓɛi gáá laa ka naa kaa.»
Da diɛni də li, ɓɛi ə kɛ laa, di naa kaa. Ə kɛ kɛa a hvóló mąą laa lɔwai da diɛni di voló kpəli kɛ laa. 40Nu hveelɛi tii dɔ̨nɔ̨ ɓaa kɛ a Simɔn Piɛrə nəɠə Andre, diɛ ɓə Ɉaan wooi tii mɛ̨n, di hvilɛn Jesus pulu. 41Andre ə gbɛa li tɔlɔɔ ə həli niɛ Simɔn ɓa yɛ mą: «Nwun mąąɓomun Yálá ə naakwɛlanmo kwaa gaa. (Yai da kɛ mą: Kristə.)»
42Ə niɛ hon a ɲee da yaa di pa Jesus pɔ. Jesus ə ɲɛ̨i hee kpɔ Simɔn ɓa a ɉu kwɛa, yɛ mą: «Ə laa ɓaa Simɔn, Ɉaan lon maa yɛ. Kɛlaa ə́ laa ɓaa pai kɛi a Sefasə» (mukulaa ɓaa: Piɛrə, a wala kɛti: hvaɲą.)
Jesus ə Filipə da Natanaɛlə di təli
43Mąą yələ laa ɓoɔ, Jesus ə giliŋąhiɛ yɛ diɛ gaa li Galile lɔi hu. Ə Filipə kaa, ə mo mą yɛ mą: «Hvilɛn búlú.»
44Filipə ə kɛ a Bɛtsaida daai mun. Daai tii lɔ ɓə kɛ a Andre da Piɛrə di pɔ taai. 45Filipə ə́ li ə Natanaɛlə kaa, yɛ mą: «Nui ŋɛ̨i Moisə nwɔ tɔ́n ɉɛɓɛ́i da Yálá kwəi mɛ̨nį hukulɔ nuą di mąą mɛ̨nį ɓo, kwa gaa. Da kɛ naa ɓaa: Jesus, Ɉosɛfə Nazarɛtə mun lon ni.»
46Natanaɛlə yɛ mą: «Mɛ̨nį lɛlɛɛ ta a pɛli kulɔi Nazarɛtə daai?»
Filipə ə nwoo pulu pənə yɛ mą: «Pa lɔ ə kaa pai gaai.»
47Ɓɛlɔwai Natanaɛlə ə kɛi paa la, Jesus ə gaa, ə mo Natanaɛlə laa mɛ̨i yɛ diɛ: «Ŋą́ą́ Israɛlə lon neelee kaa! Hulu mɛ̨nį tɔ̨nɔ̨ kpɛli hvə nwɔ kiliŋąhiɛ hu.»
48Natanaɛlə ə Jesus mąąni kɛ yɛ mą: «Ə gɔlɔn bələ kɛ ləi?»
Jesus ə nwoo pulu pənə yɛ mą: «Gɛɛ kɛ Filipə hvə ə́ təli, ɓɛlɔwai ə́ kɛ la moolaa wulu mu, ŋą kɛi ə́ kaa.»
49Natanaɛlə ə pənə yɛ mą: «Mąąkwɛli kɛmun, ə́ kaa a Yálá Lon, yɛ ɓo a Israɛlə tɔɔmun.»
50Jesus ə nwoo pulu pənə yɛ mą: «Kɛi ŋį́ mo yɛ ŋą́i kaa moolaa wulu mu ya ɓə gɛ yɛ laa ná? Ə kaa pai mɛ̨nį kpɛa-kpɛa tamąą kaai ə tɛɛ yili ɓa.»
51Jesus ə pənə ə mo yɛ mą: «A tɛ̨ą kpɔ-kpɔ gáá moi kaa, ka káá pai kɛi yələkɔlɔn gaai naa ɓoɔ, Yálá nwɔ malakaɠaa diɛ tɛ diɛ yɛɛ Nu Lon mɛ̨i.»
Valið núna:
Ɉaan 1: BKPDCG
Áherslumerki
Deildu
Afrita
Want to have your highlights saved across all your devices? Sign up or sign in