Luc 24
24
Jésus azingo na kuâ
(Matt 28.1-10; Marc 16.1-8; Jean 20.1-10)
1Na kota ndaperere ti layenga, awali ni amu ayombo so ala leke ni ti zia na tere ti kuâ, ague na ni na du ti kuâ ti Jésus. 2Ala baa so, têne so a kanga na yanga ti du ni, a pusu ni si a zi ni awe. 3Ala li na ya ti du ni, me ala wara kuâ ti *Kota Gbia Jésus pepe. 4So ala ngba ti gi li ti ala na ndö ti ye so asi so, mo ye ti baa, akoli use asi, ala yu bongo so aza zango. 5Mbeto agbu awali ni, ala bi le ti ala na sese si akoli use so atene na ala: “Ngbanga ti nyen si ala yeke gi zo so ayeke na fini na popo ti akuâ? 6 Lo yeke na ndo so pepe, lo zingo na kuâ awe. Ala dabe ti ala na tënë so lo tene lani na ala na ndembe so lo de na Galile, 7lo tene: ‘Alingbi a zia *Molenge ti Zo na maboko ti azo ti sioni, ala fâ lo na ndö ti keke ti kroa si na lango ota ni, lo yeke zingo na kuâ.’ ”
8Ala dabe ti ala na tënë so Jésus atene lani na ala so. 9Ala londo na yanga ti du ti kuâ ni si ala gue, atene tënë ti aye so kue na adisiple baleoko na oko nga na tanga ti azo ni kue. 10Awali ni ayeke Marie ti kodro ti Magdala, Jeanne na Marie mama ti Jacques. Ambeni wali so ague na ala atene nga gi tënë ni so na *awatokua. 11Me awatokua ni abaa tënë ti awali ni tongana abuba tënë si ala yeda na ni pepe. 12Me Pierre akpe ague na yanga ti du ti kuâ ni; lo kuku, lo baa ya ni si lo baa gi akamba ti bongo ni. Na pekoni, lo kiri na ndo ti lo, li ti lo kue akpe ndali ti ye so asi so.
Jésus asi na adisiple use na lege ti Emaus
(Marc 16.12-13)
13Gi na lango ni so, adisiple use amu lege ti gue na mbeni kete kodro so iri ni Emaus. Ti londo na Jérusalem ti gue na Emaus, zo ayeke tambula na ya ti ngbonga use. 14Ala yeke tene tënë na ndö ti aye so kue asi so. 15So ala ngba ti tene tënë ni si zo oko oko ayeke fa tënë ti be ti lo na ndö ni, Jésus wani asi na popo ti ala si lo na ala ayeke tambula. 16Ala baa lo, me mbeni ye akanga lege na ala ti hinga lo. 17Jésus ahunda ala, atene: “Tënë ti nyen laa ala yeke tene si ala yeke tambula na ni so?” Tongaso ala luti, vundu agbu ala kue. 18Mbeni oko so iri ti lo ayeke Kleopas atene na lo: “Ye so asi na ya ti alango so, gi mo oko na popo ti azo ti Jérusalem laa mo ma tënë ni pepe?” 19Lo hunda ala, lo tene: “Ye ni ayeke nyen?” Ala kiri tënë na lo: “Ye so asi na Jésus, zo ti Nazaret so! Lo yeke mbeni ngangu wayanga-Nzapa na lege ti akota ye so lo sara na atënë so lo fa; lo fa ni na dawa ti Nzapa nga na dawa ti azo kue. 20Akota wayango-sandaga na amakonzi ti e amu lo, aka lo titene a fâ ngbanga ti kuâ na li ti lo si a fâ lo na ndö ti keke ti kroa. 21Ti e, e zia be ti e ti ku e tene, lo laa lo yeke zi ande Israel na gbe ti ngbaa. Me na ndö ni kue, aye ni asi asara fadeso lango ota awe. 22Ambeni wali so ayeke na popo ti e aga atene mbeni tënë so e hinga li ti e daa pepe. Na kota ndaperere, ala gue na yanga ti du ti kuâ ni, 23me ala wara kuâ ni pepe. Ala kiri atene na e atene, *a-ange asi na ala si a-ange ni atene na ala atene, Jésus ayeke na fini! 24Ambeni mba ti e ague na yanga ti du ti kuâ ni si ala baa so ye ni ayeke gi tongana ti so awali ni atene so; me ala baa Jésus pepe.” 25Tongaso Jésus atene na ala: “Ala azo so li ti ala ayeke daa pepe so, tënë so kue awayanga-Nzapa atene ando so, ala ma na be na ni hio pepe! 26Alingbi fade titene *Mesii abaa pasi kozoni si lo li na ya ti gonda ti lo pepe?” 27Na pekoni, Jésus ato nda ti fa na ala nda ti tënë so ando awayanga-Nzapa kue atene na ndö ti lo na ya ti Mbeti ti Nzapa, ti londo na Moïse ngbii asi na awayanga-Nzapa kue.
28So ala ga nduru na kete kodro so ala yeke gue daa, Jésus asara, mo baa mo tene, lo yeke hon ti gue. 29Me ala gbanzi lo, atene: “Mo ngba na e ge, ngbanga ti so lâ aga nduru ti kui si ndo ato nda ti vuko.” Lo li na ya ti da si lo ngba na ala. 30So lo na ala aduti ti te kobe, lo mu mapa, lo mu singila na Nzapa; na pekoni, lo fâ ya ni si lo mu na ala. 31Tongaso le ti ala azi si ala hinga lo. Na pekoni, lo girisa na le ti ala 32si ala tene na popo ti ala: “So lo yeke tene tënë na e na lege si lo yeke fa nga na e nda ti tënë ti Mbeti ti Nzapa so, be ti e ayeke kporo fade na ya ni kâ pepe?”
33Gi hio tongaso, ala londo si ala kiri na Jérusalem. Ala wara adisiple baleoko na oko na tanga ti azo ni so abongbi kâ. 34Azo ni atene na ala: “Taa-tënë, *Kota Gbia azingo na kuâ awe! Lo si na Simon!” 35Adisiple use so atene tënë ti ye so asi na ala na lege so. Ala fa nga lege so ala hinga Jésus na ni, na ndembe so lo fâ ya ti mapa si lo mu na ala.
Jésus asi na adisiple ti lo
(Matt 28.16-20; Marc 16.14-18; Jean 20.19-23; Awat 1.6-8)
36So ala ngba ti tene tënë so, Jésus wani asi, lo luti na popo ti ala si lo tene na ala: “Siriri aduti na ala!” 37Mbeto agbu ala si tere ti ala ayeke do; ala baa ti ala atene, mbeni toro laa ala baa lo so. 38Jésus ahunda ala, atene: “Ala yeke gi be ti ala ngbanga ti nyen? Ala yeke dekite na be ti ala ngbanga ti nyen? 39Ala baa maboko ti mbi na gere ti mbi: so taa mbi laa! Ala ndu tere ti mbi abaa! Toro ayeke na tere wala na bio pepe tongana ti so ala baa mbi yeke na ni so!” [ 40So lo yeke tene tënë ni, lo fa na ala maboko ti lo na gere ti lo.] 41Be ti ala asi na ngia, ye so asara si ala ngba ti dekite, li ti ala kue akpe. Tongaso Jésus ahunda ala, atene: “Ala yeke na mbeni ye ti tengo ni na ndo so?” 42Ala ga na lo mbeni nduru zongo susu. 43Lo mu ni si lo te ni na le ti ala. 44Na pekoni, lo tene na ala: “Na ndembe so mbi de na popo ti ala, mbi tene na ala, mbi tene: ayeke nzoni atënë so kue a su na ndö ti mbi na ya ti mbeti ti *Ndia ti Moïse, ti awayanga-Nzapa na ti Abia, aye ni asi alingbi na ni.” 45Tongaso lo sara si hingango ndo ti ala azi ti hinga nda ti Mbeti ti Nzapa. 46Lo tene na ala: “A su na ya ti Mbeti ti Nzapa, atene: Fade *Mesii ayeke baa pasi si na lango ota ni, lo yeke zingo na kuâ. 47Na iri ti lo, fade azo ayeke fa Nzoni Tënë na amara kue, ti to nda ni na Jérusalem. Ala yeke tene na azo titene ala zia ngbene lege ti sarango ye ti ala, ala kiri na Nzapa si fade Nzapa azi siokpari na li ti ala. 48Ti ala, ala yeke azo so abaa aye ni na le ti ala awe. 49 Ti mbi, fade mbi yeke tokua na ndö ti ala ye so Babâ ti mbi amu zendo ni. Ti ala, ala ngba na ya ti gbata ni ngbii ala wara ngangu so alondo na nduzu.”
Jésus akiri na yayu
(Matt 16.19-20; Awat 1.9-11)
50 Na pekoni, Jésus amu ala, ague na ala nduru na Betanii, lo yo maboko ti lo na nduzu si lo sara tufa na ndö ti ala. 51So lo ngba ti sara tufa na ndö ti ala, lo londo na tere ti ala, lo hon si a mu lo, a gue na lo na yayu. 52Ti adisiple, ala voro lo; na pekoni ala kiri na Jérusalem, be ti ala asi na kota ngia. 53Lakue, ala yeke na ya ti kota da ti Nzapa si ala yeke sepela Nzapa.
Valið núna:
Luc 24: MNF2010
Áherslumerki
Deildu
Afrita
Want to have your highlights saved across all your devices? Sign up or sign in
© La Société Biblique de Centrafrique 2010