LUK 24
24
Jisu Yangei Leipü
(Mt. 28:1–10; Mk. 16:1–8; Jn. 20:1–20)
1Shejao hapta kü shongpü nyih#Hapayü hatnyih vaikahen. dhom mü lomi jomi tempü vong büpü meli notü mahngchongei heih. 2Jomi mahngchong kü küppü yaong ngowdaitü ee, 3shejao mechem jomphong mongei shüpa jomi mahng ne-ee. 4Mechem jomi ha kü thamaei nyupa, ngangahük kü shennyak nyi nyangnyangpü ashak ümtü jomphong touei peiyei yaong. 5Jomi nyemei kahdokei dhe aümei sha, shejao ha shennyak nyi-i jomphong kü e, “Mehekei ammi dipüthü khong mü yemmü nyupü hük yemnya? Büpa hatouei nenyu, shejao yangei leidaitih. 6Büpa Galilei nyushi am kü epü deihhümao: 7Shennyak Ha mangthülei lak kü lanei shuohhen, hatü shophang kü aphen, hatü nyih jempabü kü yangei leihen.” 8Hahepak küang jomphongi büpalei shah deih-ei dang, 9hatü mahngchong leipü nyokei leiyei jomi ha jung peü anpühük hatü lebüthü peü kü eteke. 10Shaang hapayü Mary Magdalen, Joanna, Jakobei chenyü Mary, hatü jomphong mü nyupü nyühathüi phongshanthü kü ha jung eteke. 11Shejao hapa shah-ü jomphong keyü ngahiyoi shah kei leidai, hatü jomi ha kü hingnelem. 12Shejao Peter yaongei mahngchongei mokei heih; büpai aümei shatü veiyei shüshihjü büpai nyemin ashak mon ee; hapheikü büpai hapa vampü kü thamaei shemei lei.
Emmaus Lemei Kampü
(Mk. 16:12–13)
13Shaang hapa nyih-üng shennyak nyi Jerusalem kübü mile nyet hükshing yanei Emmaus shei epü chingei leilemei kamei nyu, 14hatü mehe douthü vampa ha jung hüki hük mü eteiyei nyu. 15Mechem jiji shah eteiyei hatü shah shükteiyei nyupa, Jisu jiji yopailei peiyei jiji mü kamei nyu, 16shejao büpa khih shei nenyinghen mü jijilei mük küptüktü nyu. 17Büpai jiji kü, “Anji kamyaki hüki hük mü mehe jung eteinya?” shei e. Jijinyi mongmang dhe kohtü sheanei yaong. 18Jiji khongkü Kleopas shei menpü shennyaki büpa kü, “Hathü nyih kü mehe douthü vampa, ha nenyinghen mü nüngü Jerusalemei yenthüng vaishi nyupü je?” shei e.
19“Mehe douthü?” shei büpai jiji kü phe. Jijinyi-i, “Nazareth am Jisu nang” shei e. “Büpayü thibü hük, shah kü hatü dou kü Kahvang hatü nanglak peü touei wong kohshi nyuhampeih, 20hatü hamei ngongpathü hatü mübüthüi büpa jühen nangkü nyonghühen lanei shuoh, hatü büpa shophang kü apei jütükpeih. 21Shejao Israel am angei leihenü büpa shei monglempeih. Hih, ha mü lenei hathü douthü vampheikü shaangpai nyih jempabü khih. 22Anyei vaishi hamphong khong kübü nyühathü hanei ami ham thamahüpeih. Jomphong shenep dhom mü mahngchongei heihteke, 23shejao jomi büpalei mahng ne-ee, shejao jomphong nyokei leiyei hamphong kü vangsho phongshan eepeih, hatü hathüi büpa yangei leidaitih shei eshuohpü jung eküpeih. 24Hanangkü hamphong khong kübü hanei am mahngchongei heihjajü nyühathüi epükei chongjateke, shejao jomphongi büpa ne-ee.”
25Büpai jiji kü, “Oh ngadaiphei nyi, thibüthüi epü shahthü kü hinglemhen mong chetpüthü! 26Messiah-i hathü shangpong heühen hatü büpalei müknyinshekhang kü shühen nadang nenyuhampü hiang?” shei e. 27Hapheikü Mosa kübü pangei thibüthüi nyangpü laithü kübü büpa jung epü peü nih-eikhoei eteke.
28Jiji daipü ching yoei ngoiyaki Jisu-ü tailulei daihen keiha she yeiyei kam. 29Shejao jiji-i büpa kü kangei, “Henji mü paümdaishah, mehenangkü om dhüdaiteke hatü hepak lüdaiteke” shei e. Hanangkü büpa jiji mü paümnüng dai. 30Mechem büpa jiji mü nükdülei uopa, büpai aan yah-ei moihiman, hatü ha bhaoktü jiji kü shuoh. 31Hahepak kü jijilei mük ap, hatü jiji-i büpa nying, hatü büpa jiji toueipü mahdai. 32Jiji hüki hük mü, “Büpai ji kü lemei shah eshingkü hatü büpai laihing aptü nih-ei ephüshingkü mong kü aw bahnyukei shaamküla?” shei etei.
33Hahepak kü-üng jiji layaongei Jerusalemei nyokei dai, hatü jiji-i anpühük hatü küphüthü chemi thaiyei heüteke. 34Jomphongi, “Shembüpa yangei leidaiteke, hatü büpa Simon kü vamei hushuohpüja” shei eteiyei nyu. 35Hahepak kü jijinyiyao lemei mehe heüpa, hatü aan bhaokei hahshingkü jiji kü büpa nyinghüpü ejateke.
Jisui Nanglomthü Touei Vampü
(Mt. 28:16–20; Mk. 16:14–16; Jn. 20:19–23; P.Dou. 1:6–8)
36Mechem jomi ha jung eteiyei nyupa, Jisu büpa nyingi jom touei peiyei yaong, hatü jomphong kü, “Amphong mü chingmei nyutuh” shei e.
37Jomphongi nyemei top, hatü jomi laangha eenyu vaaishang shei deih. 38Shejao büpai jomphong kü, “Amphong mehekei nyemnya hatü mehekei ammei mong kü jü-üpü peihünya? 39Ngelei lak hatü la kü veituh; veituh, hayü ngei hih. Ngei kü laki dükei veituh; mehenangkü ngei kü nyupü ammi eepükei laangha kü phai hatü vang nenyunyih” shei e.
40Büpai ha etü büpai jomphong kü büpalei lak hatü la hushuoh. 41Jomphong mongongpü hatü yashanpai hingnelemaoki nyu, hanangkü büpai jomphong kü, “Hatouei hahhen meheyao nyüla?” shei e. 42Jomi büpa kü nyahlang phuo hük shuoh, 43hatü büpai ha yah-ei jomphong touei hah.
44Hapheikü büpai jomphong kü, “Hathüyü ngei amphong mü nyushi am kü epü shahthü hih– Mosa shahkung, thihivam laithü hatü menvih kesho kü ngei nang nyangei nyupü peü dhaümkahen” shei eteke.
45Hapheikü laihing nyingaokhen büpai jomei mong aphü, 46hatü büpai jomphong kü, “Hapakei nyangei nyüke, Messiah shangponghen hatü nyih jempabü kü yangei leihen, 47hatü Jerusalem kübü pangei jatthü peü kü mong leppü hatü mang tükpü jung baonghen. 48Amphongü hathü jung denbüthü. 49Veituh, ngelei Pa-i mehe lah, ha ngei am kü shomhen; hanangkü amphong shangeipü ngani am kü mangbak thahshi chingnyülei nyutuh” shei e.
Jisu Vangsholei Aongdaipü
(Mk. 16:19–20; P.Dou. 1:9–11)
50Hapheikü büpai jomphong müei Bethany thahshi dai, hatü büpalei lak haongei jomphong kü moihiman. 51Büpai jom kü moihimanei nyushingkü büpa jomphong toueipü yanei vangsholei anlang. 52Jomi büpa kü khüm, hatü longi mongongpai Jerusalemei nyokei lei; 53hatü jomphong nedoh-i phopshemei Kahvang men longei nyu.
Valið núna:
LUK 24: PHOMBSI
Áherslumerki
Deildu
Afrita
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.