KAHBHAO 3
3
Hangkuli Mang Thahpü
1Shaang Shembüpa Kahvangi lingpü phaüyemthü khongkü biü-ü peü mü glüp kohpü yem nyuteke. Hapa biüi nyüha kü, “Kahvangi hapa pemongei nyupü pü kübü meheyao tehah shei ephopü je?” shei phe. 2Hapa nyühai biü kü, “Pemongei nyupü püthü kübü betjük hami hahhen aok; 3shejao Kahvangi pe jiamei nyupü pü kübü betjük tehah hatü ha kü lakiyao tehong, hei nevaijema dihen shei ephopeih” shei e.
4Shejao hapa biüi nyüha kü e, “Hingmei payü nedipih; 5mechem nüngi ha hahhenshang, nüngei mük aphen, hatü nüngao Kahvang keiha tenhimei nyinghen shei Kahvangi nyingei nyüke.”
6Mechem hapa nyühai hapa pü kübü betjükü hahhen meihen khih, veihenao meiangke hatü kihikon danghenao lümshi khih shei veiaokpa, pinnyüi maani yah-ei ha hah. Shao pinnyüi pinnyü mü nyupü chepaha kao hanei shuoh, hatü büpai ha hah. 7Hahepak kü jijiphenei mük ap, hatü jijiphen bümkong nyupü khih shei nying; hanangkü jijinyi-i pülak phaenei jümhahteke.
8Hahepak kü hapa baha hatü chenyüha nyi-i om kü vanglük lükha dhüngpü hepak kü pemongei Shembüpa Kahvang kamteipü danei jijinyi-i pemong leipü püyingei Shembüpa Kahvang kü joteke. 9Shejao Shembüpa Kahvangi hapa shennyak kü, “Nüng melei nyüpa?” shei nyükei e.
10Büpai, “Pemongei nüng kamteipü danei ngei bümkong nyupü nangkü nyemei jodaipeih” shei e.
11Büpai, “Nüng bümkong nyüke shei üpai ephopa? Nüngi ngei haleipü tehah shei epü pü leipü betjük hahpü je?” shei e.
12Hapa shennyaki, “Nüngi ngei mü tuhphopü nyühapinnyüi hapa pü leipü betjük hanei yahphopeih, hatü ngei ha hahpeih” shei e.
13Hahepak kü Shembüpa Kahvangi hapa nyüha kü, “Nüngi mehe dükpa?” shei e. Hapa nyühai, “Biüi ngei luhahpeih; hanangkü ngei ha hahpeih” shei e.
Kahvangi Shahphenhen Epü
14Hanangkü Shembüpa Kahvangi hapa biü kü,
“Nüngi ha dükpü nangkü, yemhimak peü khongkü nüng thaüvaütüktih;
Nüngei vomi lüei nüng kamhen,
hatü nüngei den kemei kübhih hahhen.
15Ngei nüng hatü nyüha aa kü,
hatü nüngei li hi pinnyülei li aa kü ve vaihühen.
Büpai nüngei shangjing ngümtükhen,
hatü nüngi büpalei la-ong kü bheihen” shei e.
16Büpai nyühanyü kü:
“Nüng hapeü koshingkü ngei nüng kü hanghi nyeinya nyeihühen;
tüngpai nüngi hapeü bühhen.
Shejao nüngei ampaha kü lümpü nedoh-i nyuhen,
hatü büpai nüng shak kü vanglem lemhen” shei e.
17Büpai bahapa kü:
“Nüngi anyühalei shah bangei,
‘Nüngi haleipü tehah’ shei ejü nüngi hapa pü leipü hahpü nangkü,
nüng tata kü kahdok kü thaüvaütüktih,
nüngei den kemei tokvai hanghiyei dükei hahhen.
18Hapai nüng shing hühhinyai vamhühen,
hatü nüngi kahdok kübü vampü phenhavunglak hahhen.
19Nüng nyipabü kahshalei mangshü thahshi
shangjing kübü lem-ow yenei dükei mon hahhen danghen,
mehenangkü nüngü kahdok yah-ei lingpeih,
shao nyipabü kahdok leidaihen” shei e.
20Hapa bahapai chenyüha kü Ev#Ev lappü, “Yemmü nyupü nevaijü hangkuli” shei epü eenyüke. shei men; mehenangkü pinnyü-ü yemmü nyupü peüei nyü nyuteke. 21Shembüpa Kahvangi Adam hi chenyüha nyi kü yemhalei shuw yah-ei ashak lingei ümshuohteke.
Adam hi Ev Nyi Eden Leipü Changtükpü
22Hapheikü Shembüpa Kahvangi e, “Veituh, hapa shennyakü jenphong khongkü hük keiha tenhimei nyingei leiteke. Sheyü büpalei laki hapa yangnyu pü kübü betjük vaümei hahtü den kü nyuhen mü nehanhen vaipü khih.” 23Hanangkü Shembüpa Kahvangi büpa meleipü yah-ei ling, hapa kahdok kü ngüh-ei paangei dou dükei hahhen Eden pemong leipü changtük. 24Büpai hapa shennyak changtükpheikü yangnyu pü philei üpaiyao neheihhen shingvaishi heong philei cherubim hatü nyeleppü awlom vampü yanlu hük tuhphong.
Valið núna:
KAHBHAO 3: PHOMBSI
Áherslumerki
Deildu
Afrita
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.