LUKE 17
17
Gitlohna
(Mat 18.6-7, 21-22; Mrk 9.42)
1Chun, Isu’n a sinsakte kawmah, “Pukna haw hi umlo thei ei puoi, himahlele, pukna tun sakpa chung chuh a gik hi! 2Zie mi neucha cha laka khat le sukpuk sang chun, a supuk pa ngâwng achun buh gawih gawpna suong awh sak in, tuisuohgiet ah kikhie leh, amah dingin phazaw ding ahi. 3Zieziekchun, na thilhih u a chun chingthei un.
“Na suohpih in thil a hihkhelh chun, gai inla, a kisik chun, ngaidam in. 4Ni khatin na chungu ah sagih vei thil hihkhiel in, sagih vei, ‘Ka kisik hi,’ ti a nang lam a hung ngat kit chun, na ngaihdam ding ahi,” a ti a.
Ginna Chuh
5Chun, sawlchakte chun Lalpa kawmah, “Ka taksannau ei sukpun sak in,” a tiu a. 6Chun, Lalpa’n a dâwng a, “Ankam mu chang khat tieh taksanna na neih u chun, zie thingtheimi kung kawma hin, ‘Hung kibawtdawk inla, tuisuohgiet ah hung kiphut ah,’ ti leu chin, na thuu a nung ding ahi.
7“Na lak u a khat hin, suok, lo kai in ahim belam chingin ahim nei un la hi leu chin, lo apat a In a a hung tun tieng chu leh, ‘An hun um zieng ah,’ kuo a na ti ding? 8‘Ka nek ding nei siem sak in la, na puon cheng in la, ka nek a, ka dâwn zawh masang cheng chuh, ka nek bawl ah; zie nung chu leh nangin ne na’n la,’ ti zaw ding na hiu hi. 9Na thuu a a nun ziek u chun na suokteu in, kipah thugen a lawh ngei um leh? 10Khutibang mah in, nang haw’n le, na kawm u a hih ding a thupiek chengcheng na hih nung un, ‘Suok phachuom lo ka hiu hi; ka sep ding mawng uh ka sep uh ahi,’ tiu in,” a ti a.
Phâk Sawm Sukdamna
11Chun, tihi a hung hi a, Jerusalem zuona a chieh lai in, Samari leh Galili gamgi zul a hawh malam a. 12Khuo bang ahim a a lut ding kuon in, phâk ngen cha mi sawm in a kituokpih u a. Ziete chuh gamla tak ah a ding u a, 13a kiko u a, “Isu, Sinsakpa, kei uh nei lungsiet ah!” a tiu a. 14Chun, Isu’n amau haw chuh a muh phetin, a kawm u ah, “Thiempute kawmah va ki-etsak tau u,” a ti a. Chun, tihi ahi a, a chieh lai u chun, a hung thieng vek tau a.#Tpd 14.1-32 15A laku a khat chun, a dam tai tih a hung kimuhdawk phet chun, ngeih tak a Pathien pakcha kawmin a vaikit ta a. 16Isu keng bul ah a khupbawk a, kipahthu a gen ta a. Zie pa chu Samari mi a hi a. 17Isu’n a kawmah, “Mi sawmte kha na thieng uh hilo maw? Adang kuote kha khawi ah a um tau hi? 18Pathien pakcha dinga kîkkit, zie nam chuom mi tihloh hi, kuoma’n mi dang mu lo ahiu maw?” a ti a. 19Tichun, Isu’n a kawmah, “Kipan in la, chieh ah, na taksan na’n a hun dam sak a hi,” a ti a.
Pathien Gam Hungtung Ding
(Mat 24.23-28, 37-41)
20Chun, Pharisaite’n, Pathien gam hungtunna ding phat a dawt ziekun, Isu’n a kawm u ah, “Pathien gam chuh muh theih in a tung puoi. 21Kuoma’n, ‘En tiem u, zie tak a hin a um hi,’ ti’n ahim, ‘zie tak a khun a um hi,’ ti puo’n au; a ziek chuh, Pathien gam chuh nangmau haw a um a hih ziekin,” a ti a.
22Chun, amah chun a sinsakte kawm achun, “Mihiem Chapa dam lai nite hi, ni khat bêk hi na muh nawp hun uh hung um ina, himahlele, na muh theih loh niu hungtung ding ahi. 23Chuleh, na kawm u ah, ‘Entiem u, taka khuh!’ ‘Entiem u, taka hih!’ ti hung um un au. Himahleh, en dingin pawtdawk kiu in. 24Kâwlmawng lehlam apat a kâwl a phet a, vannuoi kâwlmawng lehlam tienga a en sek guol hin, Mihiem Chapa a hung ni chu leh um ding ahi. 25Himahleh, zie masang chun thil tamtak thuok intin, tulai khanga mite deih loh hin le um ding a hii. 26Noah dam laia thil umzie guol khan, Mihiem Chapa a hungkit ni chu leh um ina.#Tsb 18.20—19.25 27Noah kuong a a lut a, tui a hung let a, a bawnchau a a thih suok kêi niu a tun masang sieh, a neu in, a chau a, zi leh pasal in a kichêng tuoh sek ui.#Tsb 6.5-8; 7.6-24 28Khutibang mah khan. Lot dam lai inle a hung um a, a ne’n, a chau a, a chawu a, a zuok u a, a chi’ng u a, a sa sek ui. 29Himahlele, Sodom khuo apat Lot a pawt ni chun, van apat in mei leh kât in a zu a, a bawnchau in a thi suok kêi ta a. 30Khutibang mah chun, Mihiem Chapa a hung kilak ni chu leh um ina.
31“Zie ni chu leh, In chunga um chuh, In sunga a thuomphuo um la dingin kum kihe’n; zie tawbang mah chun, lo a umte chu le, In lam ah vaikit kihe’n, 32Lot zi hezing un.#Tsb 19.26 33Kuole, a hinna humbit guo ta’n chan intin, kuole, a hinna chan ta’n humbit ina. 34Ka hilh na hiu hi, zie zan chun, zâlkhun khat ah mi nih giekkhawm untin, khat chuh lak mang in um intin; khat chuh nutsieh in um ina. 35Numei nih buh gawigawp in um untin, khat chuh lâk in um intin, khat chuh nutsieh in um ina.” a ti a. 36Mi nih lo ah nasem in um untin, khat chuh lâk in um intin, khat chuh nutsieh in um ina, a ti a.#Zik khenkhat achun châng 36na hi footnote ah a kikawih hi.
37Chun, a sinsakte chun, “Lalpa, khawitak ah e?” ti’n a dawng u a. Amah chun a kawm u ah, “Khawiale, saluong umna tâkah, mulukawlh te le um khawm un au.” a ti a.
Valið núna:
LUKE 17: GANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.