LUKE 13
13
Lunghei dinga Chielna
1Chun, zie lai tak chun, Galili gama mite Pilate in a thah a, a thisan uh kithawihna sa tawh a helkhawm sek thu chuh mi khenkhat in a hung gen u a. 2Chun, Isu’n a dawng a, a kawm u ah, “Zie tawbang thil chuh a tuok ziekun Galili gama mi cheng cheng sanga gilo zaw dingin na ngaihtuoh u? 3Hi lo e, ka hilh na hiu hi, nang u le na lunghei loh u chun, ziete tawbang mah a chuh thi ding na hiu hi. 4Chun, Siloam insang in, mi sawm le giet a delhlupte kha bangti dana le? Ziete kha, Jerusalem a mi dang chêngte sanga kha phalo zaw’n na ngai u? 5A hi chuom diek puou, ka hilh na hiu hi, nang haw le na gitlohnau apat a na kihei loh u chun ziete guol mah khan thi ding na hiu hi,” a ti a.
Theipi Kung apat Tehkalna
6Chun, Isu’n zie tehkal thu hi amau haw chu a hilh a: “Kuo ahim khatin, a grep huon ah theipi kung khat a nei a. A kung achun a gah a hawl sek a, himahleh, bangmah a mu puoh a. 7Tichun, a grep huon enkawlpa kawm achun, ‘Entie, kum thum sung hi, zie theipi kung a hin a gah ka hawl zing sek a, himahleh, khat chale ka mu kha puoi. Zieziekchun, phuk mai ah! Bang ziekin a ziehi mun luoh chauha a um zing ding?’ a ti a. 8Himahlele, huon enkawlpa chun a dâwng a, ‘Hepu, kum khat bêk hiti hin um sak tadih in, a vel lai chuop ka ting, lei pha vuk tadih ing ka. 9Tichun, kum kit leh a gah lele pha’n tin, a gah loh hiel leh phuk na’n la,’” a ti a.
Numei khat Sukdamna
10Chun, Chawlhni khat chuh, Isu’n kikhawpna In ah a sinsak a. 11Chun, ngaitie, numei khat, kum sawm leh kum giet thitha mat a um a, zie nu chuh a khun zing a, amah cham in a ding zang thei puoi. 12Amah chuh Isu’n a muh phetin, a sama, a kawmah, “Numei, na hatlohna chun a hun thah tai!” a ti a. 13A chungah a khut a nga a, tichun, thakhat in a hung ding chang zieng ta a, Pathien a pakcha ta a. 14Isu’n Chawlhni a mi a sukdam ziek chun, kikhawpna In lawiupa chuh a lungna ta a, mipite chuh a hopih a, a kawm u ah, “Mihiemte nasepna dingin ni gup sung a um a puo; zie sung chun hung unla, kisukdam sak un,” a ti a.#Pdn 20.9-10; Dann 5.13-14 15Lalpa chun a dâwng a, “Nanguh mi gukhahte haw, Chawlhni’n nangmau bâwng ahim, sabiltung ahim a an nekna apat a sut in, tui dâwn dingin na puidawk chiet sek uh hilo maw? 16Zie Abraham suona mi, Setan in kum sawm leh kum giet a hen chak zing hi, Chawlhni ale sut sak hilo ding ahim?” a ti a. 17A dawnna chun a melmate cheng chuh a suzakcha ta a, mipite chuh la a thilmak hih chengcheng ziek chun a kipâk suok kêi u a.
Ankam mu leh Chawl apat Tehkal Thu
(Mat 13.31-32; Mrk 4.30-32; Mat 13.33)
18Khutichun, amah chun, “Pathien gam chuh bang tawbang ahi? Bang tawh ka tehkal ta die? 19Mi’n ankam mu changkhat a laka, huona a theh tawbang hi ahi. Thai chuh a hung khang a, thing a hung hi a, tichun, vachate’n a bâk chung achun bu a sep sek ui.” a ti a.
20Chun, “Pathien gam chuh bang tawh ka tehkal ta die? 21Zie tawbang hi ahi: Numei in chawl a lak a, changbuong, dân thum laka a bawn cha keia a thawh suok masang sieh a, a buok tawbang chuh ahi,” a ti a.
Kawtkhak Chîp
(Mat 7.13-14, 21-23)
22Isu chun, sinsak kawm zelin, Jerusalem khaw lam zuonin, khuo lien leh khuo neu haw chuh a tawh zel a. 23Chun, kuo ahim in a kawmah, “Hepu, mi tawmcha chauh hukdam hi ding maw?” a ti a.
Isu’n a dâwng a, 24“Kawtkhak chîp achun lut guo hâm un; ka hilh na hiu hi, mi tamtakin lut guou untin, himahleh lut thei ngâl puo’n au. 25In neipa chuh hung tho intin, kawt chuh khâk intin: tichun, nang haw’n pawlama dingin kawtkhak na kiuh u a, ‘Lalpa. Lalpa, kawt ei hawn sak ah,’ na tih tieng u leh, ama’n hun dâwng intin, ‘Khawi lam mi na hih uh ka hun he kha puoi!’ ti’na. 26Zie tieng chu leh nang un, ‘Nang tawh le I neu in, I dâwn khawm u kha la! ka khawpiu ale na sinsak sek kha e!’ hun ti’n lau. 27Himahleh ama’n, ‘Khawi lam mi na hih uh ka hun he kha puoi, nanguh thil gilo hih chengcheng te haw, ka kawm apat in chieh mang vek un,’ hun na ti’n a.#Sam 6.8 28Abraham te, Isak te, Jakob te leh thiemgau chengcheng te, Pathien gam sunga um na muh u a, nanguh pawlama nawhdawk na hih uh na kihet tieng u leh, zie chun kah leh hagiel chu um ina! 29Khutichun, sak leh thang apat leh, sim leh mâl apat in mipi hung khawm untin, Pathien gama guolvakna chun a na chu’n au. 30Tichun, tu a nunung pên te hi a masapen in hung um untin, tu a masapente hi nunung pên ah hung um un au,” a ti a.
31Zie lai tak chun, Pharisaite khenkhat a hung u a, Isu kawmah, “Pawt inla, zie tak apat hin chieh mang ah: Herod in hun thah nuom mah mah ahi,” a tiu a.
32Chun, Isu’n a dâwng a, “Chieh unla, zie si-âl chuh va hilh u: Ngai ah, tuni tawh, zing tawh, thithate nawhdawk ing ka ting, damlote le hihdam ing ka, a ni thum ni leh ka nasep zo ing ka. 33Bang hita leh, tuni tawh, zing tawh, a kit tawh chieh zel ding ka hi; Jerusalem khuo pawlama thiemgau thih chuh a dân ahi puoi,” a ti a.
Isu’n Jerusalem a Kahchamna
(Mat 23.37-39)
34“Aw Jerusalem, Jerusalem, thiemgau haw that, na kawma thupuo a hun sawlte suong a sep lum! Akpi’n amah note a tha nuoia a awp khum guolin, na chate bang zat vei a awp khum ka guot tâk kha! Himahleh na ut ngâl puou a. 35Zieziekchun, na Ho-In chuh a hawma nutsieh in a um tai. Ka hilh na hiu hi, ‘Lalpa min a hung chuh a hamphâi,’ na tih masang sieh chuh, nei mu kit ta puo’n lau,” a ti a.#Sam 118.26; Jer 22.5
Valið núna:
LUKE 13: GANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.