THILSIEMBUL 1
1
Thilsiem Thu
1Atûng in Pathien in lei leh vante a siem a, 2Lei chuh guong bei leh a hawm mai ahi a; tui thuk tak chung achun thimna a um a: Pathien Thagau chun tui chung chuh a awp zing a. 3Chun, Pathien in, “Vak hung um hen,” a ti a, tichun vak a hung um ta a.#2 Kor 4.6 4Chun, Pathien in vak chuh a en a, pha a sa a; tichun Pathien in vak leh thim chuh a khen ta a. 5Chun, Pathien in vak chuh “Sun” a vawh a, thim chuh “Zan” a vawh a. Tichun nitâk a hung hi a, zingkal a hung hi kit a, a ni khatna chuh.
6Chun, Pathien in, “Tui leh tui kikalhaw achun vanthamzawl zatak um hen la, zie chun tui leh tui haw chuh khendang hen,” a ti a.#2 Pet 3.5 7Tichun, Pathien in vanthamzawl chuh a siem a, vanthamzawl nuoia tui haw leh vanthamzawl chunga tui haw chuh a khen ta a: khutibang chuh a hung hi ta a. 8Pathien in vanthamzawl chuh “Van” a vawh a. Tichun, nitâk a hung hi a, zingkal a hung hi kit a, a ni nihna chuh.
9Chun, Pathien in, “Van nuoia tui haw chuh mun khat ah kigawm khawm hen la, lei hul hung lang hen,” a ti a; tichun, khutibang chuh a hung hi ta a. 10Pathien in lei hul chuh “Lei” a vawh a; tui um khawm haw chuh Tuisuohgiet haw a vawh a; chun, Pathien in zie chuh a en a, pha a sa mah mah a. 11Chun, Pathien in, “Lei chun hampahaw, thaichi nei haw, theikung, leia amau haw chi umdan ding banga gah leh a gah sunga chi um haw chuh sepdawk hen,” a ti a; tichun, khutibang chuh a hung hi ta a. 12Tichun, lei chun hampahaw leh thaichi amau umdan ding banga chi nei haw, thing amau haw chi umdan ding banga gah, a gah sunga chi um haw chuh a sepdawk ta a; Pathien in a en a pha a sa a. 13Tichun nitâk a hung hi a, zingkal ahung hi kit a, a ni thumna chuh.
14Chun, Pathien in, “Sun leh zan khenna dingin vanthamzawl akhun vak haw um u hen la, ziehaw chuh melchikna haw, hunbi haw, nihaw, kum haw hetna ding hiu henla, 15lei chung salhvak dingin vanthamzawl akhun vakna pie dingin um u hen,” a ti a: tichun khutibang chuh a hung hi ta a. 16Tichun Pathien in vak lopitak nih a siem ta a; vak lopizaw chuh sun a vaihawm ding leh, vak lopi lo zaw chuh zan a vaihawm dingin a siem a, aksihaw le a siem hi. 17Pathien in ziehaw chuh lei chung salhvak ding leh, 18suna vak ding leh zan a vak dingin leh thim leh vak khen dingin vanthamzawl achun a kawih ta a: tichun, Pathien in zie chuh a en a, pha a sa a. 19Tichun nitâk a hung hi a, zingkal a hung hi kit a, a ni lina chuh.
20Chun, Pathien in, “Tui haw chun thilsiem tawithei hinna nei tamtak hun sepdawk sak hen la, vacha haw le vanthamzawl achun leng u hen,” a ti a. 21Tichun Pathien in tuisuohgiet a ngapi lientak haw chuh a siem a, thilhing tawithei tincheng, tui in chi chuom chuom a sep dawk haw chuh, amau haw chi umdan bang chietin a siem a, vacha tha nei tincheng le amau haw chi umdan bang chietin a siem a: Pathien in zie chuh a en a, pha a sa mah mah a. 22Chun, Pathien in, “Chi tamtak suoh in hung pung unla, tuisuohgiet tui haw hi luoh dim un, vachate le lei ahin hung pung u hen,” ti’n vang a pie a. 23Tichun nitâk a hung hi a, zingkal a hung hi kit a, a ni nga na chuh.
24Chun, Pathien in, “Lei chun thilhing amau haw chi umdan ding bang chietin, gancha haw, ganhing haw, gamsa haw amau haw chi umdan ding bang chietin pawtsak u hen,” a ti a: tichun khutibang chuh a hung hi ta a. 25Tichun Pathien in gamsa amau haw chi umdan ding bang chietin, leia bawk vak chengcheng te amau haw chi umdan ding bang chietin a siem a: Pathien in zie chuh a en a, pha a sa a.
26Chun, Pathien in, “Hung tiem u! ei uh mellepâng pu’n, ei u bang bang in mihiem siem hitiu, amau chuh tuisuohgiet a ngahaw chung leh, chung leng vacha haw chung leh, gancha haw chung leh lei chung chengcheng leh, ganhing leia bawk vak chengcheng te chung achun thu neih sak hitiu,” a ti a.#1 Kor 11.7 27Tichun Pathien in amah melpu’n mihiem a siem a, Pathien lim bang ngêi in ahi a siem chuh. Amau chuh numei leh pasal in a siem hi.#Mat 19.4; Mrk 10.6 28Chun, Pathien in amau chuh a vangsak a: Pathien mah in a kawm u ah, “Chi tamtak sep a hung pung in, lei hi luoh dim un la, na thu thuu in um sak un: tuisuohgiet a nga chunghaw leh, chung leng vacha chung leh, thilhing leia bawkvak chengcheng te chung achun le thu nei un,” a ti a.
29Chun, Pathien mah in, “Ngaiun, lei chung chengcheng a thaichi nei um tincheng leh thing tincheng, thinggah nei chi umna haw chuh na an dingun ka hun piei. 30Chun, leia sa tincheng kawm leh chung leng vacha tincheng leh ganhing leia bawka vak, hinna nei bawkvak tin chengte kawmah a an dingun hampa chitin ka piei,” a ti a: tichun khutibang chuh a hung hi ta a. 31Tichun, Pathien in a thilsiem tincheng chuh a en a, ngaiin, pha a sa mah mah a. Tichun nitâk a hung hi a, zingkal a hung hi kit a, a ni gupna chuh.
Valið núna:
THILSIEMBUL 1: GANGBSI
Áherslumerki
Deildu
Afrita
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.