JOHN 3
3
Jisu ode Nikodemas
1Oraha Pharisairao ni saosi subung, boni bumu Nikodemas thihi dong ba, bo Judarao ni hoja jahi dong ba. 2Bo hor ha Jisu niha phai hi thi ba, Rabbi, Madai ni phrang phaiyaba ning saosi slingriyah thihi jing mithi du. Bede thikhala, oleiyaba gmang thaosisi khusi khe ning dang phu du. Madai ni juruma giri kha de saosibo dangphu nang niya.
3Jisu bokhe thiphin ba, Gibi gibi jang ang nisi khe thi du, subung hajai phinya si de sorgo raji khe saosi bo nuphu nang niya.
4Jisu niha Nikodemas thiphin ba, Subung saosi rabani yaohon ha bede khlai hi hajai phin phu ma? Gibi jang bo jarni buma ni sathip ha hap phin hi hajai phin phu ma?.
5Jisu thiphin ba, Gibi grao khe ang ninthane sainthi ri du, asaba subung dih jang bese ha hajai phinya thikhade, Madaini Raji ha hap phu nang niya. 6Saomang ha hajaiyaba de saomang se ning, thikhabo bese ha hajaiyaba de bese se. 7Ang sainthi riyaba khe ning da gmang, ning hajai slam phinma ning nang du. 8Bar bajang gede nangjaoba, ojang gede ning sip ba se. Ning boni sar khe se ning khna phu ba, thikhabo bo braha ni phrang phaiba ode bo braha thang la du, bokhe ning thiphuya. Odebani bese jang hajaiyaba khrip subungbo olei jasosi se.
9Nikodemas singphin ba, bedehe ebo japhu ma?
10Jisu thiphin ba, Ning Israel saraoni slingriyah jahibo ebo khe ning bujiya? 11Ang gibi jang nisi khe thi du, jing snadi khe tharmai du, bokhe ning thiba se, ode snadi khe jing nuba, bo khe ning sainthi riba se; thikhabo, nisi jing snadi khe sainthi ridu, bokhe nisi nangjaoya. 12Ang ninthane habsao ni grao khe sainthi riba ha ning boni basao habo lonya thikhala, ang sorgoni grao khe thi rila khabo ning bedehe lonphu ma? 13Sere saosi sorgo ni phrang phai ba, Marsini Basa khe garhi saosi bo sorgo ha gakhu langphuya.
14Moses hajengling ha jbu khe basao ha suguba lai jasosi Marsini Basabo basao ha sugujao ma. 15Odese khripbo sere boha lon re, thaoglao ni hayu mai ma se. 16Bede thikhade, Madai phirthi khe hamsi ning hamjaoba, bo jarni basa saosi mang mang dongyaba khe ri ri ba, sere bokhe lon re, bo de gma thaoya, thikhabo thaoglao ni hayu se mai ma. 17Phirthi khe gajai rimane Madai jarni basa khe haihaya, boni gede jahi phirthi khe sogo mani khlai hi se bo khe haiha ba. 18Sere bokhe lon re, bo de gajai ja nang niya, thikhabo sere bokhe lonya re, bo gajai jama se, bede thikhala bo Madai ni Basa saosi mang mang dongyaba ni bumu ha lonya. 19Ebo ning gajai riyaba bisar se: jnama phirthi ha phai ba, thikhabo subung buthu jnama thane andar khe hamjaodao du, sumjabani thikhala bonsini khusi se hamya. 20Sere hamya khusi khe dang re, bonsi jnama khe regejao re, ode bonsini dangthai khe nujaone khinba ni khlai hi jnama ni rogong ha phaiya. 21Thikhabo sere gibi ha dong re, jnama ni rogong ha phai re, odese boni khusi Madai ni gede jahi se dang riba thihi nujao ma.
Jisu ode Johan
22Eboni yaohon ha Jisu ode boni yaohon rikphayarao jang Juda rajini haphai ha thangla ba. Oraha bonsi jang baosi gijisa bubli dongpha ba, ode subung buthu khe baptisma ri ba. 23Salim ni rogong gabasi Arnon ha Johanbo baptisma ri ba, bede thikhala oraha dih bang bi, odebani baptisma rijao mane subung phai songhi ning dongba se. 24Ebo Johan khe phatho ha dengjao mani sagang ha se ja ba.
25Johan ni rikphayarao ode saosi Judasa tharba ni balam ha niyalai hi grao banglai ba. 26Odebani bonsi Johan niha phaihi thi ba, Rabbi, saosi subung Jordan ni ojang nar ha ning dong pha ba, ode sereni balam ha ning sainthi riba, bo subung ning baptisma ri du, ode khrip subung boniha thang du.
27Johan thiphin ba, Sorgo ni phrang riya kha de, saosi bo musi khebo mai phu nang niya. 28Ang de Krista niya, thikhabo ang de boni sagang ha haiha jaoyaba se thihi ang thiyaba khe nisi ning sakhi se. 29Damanjik ni bubra de daman se, daman ni khaoyah, bo jang songphayaba, boni khurang khe khna hi dongyaba de, daman ni khurang khe khna khali ha hamsi ning khaja re. Eboni khlai hi ani khajama duha gablai kha. 30Bo dedao phalang ma, ang khasidao phalang ma.
Sorgo ni phrang phaiyaba
31“Sere basao ni phrang phai re, bo khrip tha daothaoyaba se. Sere phirthi ha hajai du bo phirthi ni subung se, bo de phirthi ha dopha ba. Thikhabo, sere sorgo ni phrang phai re, bo de khrip thane dedao thaoyaba se. 32Snadi khe bo nu re, ode khna re, bo boni sakhi ja re, thikhabo boni sakhi khe bo ajao mane nangjaoya. 33Sere subung boni sakhi khe mani re, bo se phorman jari re, Madai de gibiyaba se. 34Bede thikhala, sere Madai jang haiha jao re, bo de Madai ni grao khe se ning thi ri re. Bede thikhala Madai bonthane bese khe thaoya si ri re. 35Bupha, Basa khe hamjao re, ode bo jarni yao jang khrip jadi khe rithar re. 36Odebani, sere boni basa khe lon re, bo thaoglao ni hayu mai re; thikhabo, sere Madai ni basa ni grao khe maniya re, bo hayu mai nang niya. Madai ni thamsi boni basao ha dongsong ma se.”
Valið núna:
JOHN 3: DIMASBSI
Áherslumerki
Deildu
Afrita
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.