JOHN 11
11
Lazaras thih ba
1Lazaras thijaoyaba subung saosi limhi dong ba. Mari ode boni bahandao Martha ni nolei ha bo dong ba. 2Ebo bo Mari ning, sere Gabra ni basao ha thao midim khe lukhru hi jarni khnai jang Gabra ni yapha basao ha rusa ri ba, boni buphlung Lazaras limhi dong ba. 3Odebani boni bahandao thu Jisu niha graojma hai ba, Nai lah, Gabra, ning hamjaoyaba limhi dong.
4Ebo khe khna hi, Jisu thiba, Ebo limyaba de thih mani de niya, thikhabo, Madai ni muima ni khlai hi se ja ba, boni gede jahi Madai ni Basa ni muima ja mani khlai hi.
5Jisu Martha khe ode boni bahandao ode Lazaras khe khasao re. 6Lazaras limhi dong thihi khnahibo, braha bo dong ba, oraha bo ar nokha sain gini dongthao ba. 7Yaohon ha Jisu jarni rikphayarao niha thi ba, Phai, jing Judai raji gede thangphin nang.
8Rikphayarao Jisu niha thi ba, Rabbi, sagang ha se ning Judarao ning khe longthai lem ma bao ba, ode oraha ning thangphin ma bao du kho?
9Jisu thiphin ba, Sain si ha gontha jhi gini bubli jaya? Saosi subung sain ha daobai ba ha khudaya, bede thikhala, ebo phirthi ni jdanma jang gede nu bani. 10Sere andar ha daobai re thikhade bo khuda ma se, bede thikhala oraha jdanma giri. 11Ebo khe thibani yaohon ha, bo bonsi niha thilang ba, Jini lugu Lazaras thuhi mudri thang la kha; thikhabo bokhe masaphin mane ang oraha thang du.
12Boni rikphayarao thiphin ba, Gabra bo thu kha thikhade bo hamphin ma se.
13Jisu boni thihbani balam ha se thi ba, thikhabo nalai thuhi mudri thangba lai se thihi boni rikphayarao bao la ba. 14Odese Jisu bonsi niha ragao sisi thi ri ba, Lazaras thih kha, 15nisi ni khlai hi ang khaja la du, ang oraha giri, odebani nisi lon lah, thikhabo phai, jing boniha thang nang.
16Thomas Didumas thijaoyaba jarni ha thaoyaba rikphayarao thi ba, Phai jingbo bo jang thihpha mane thang nang.
Jisu baigophin riyaba ar hayu
17Bokhe mangkhlong ha phipba nokha sain bri ja kha thihi Jisu sophai hi ebo khe tharmai ba. 18Jerusalem ni phrang Bethani hamsi jain kha bo mel gin lai se ning ja ma. 19Martha ode Mari niha boni buphlung thih bani, bonsi khe dukhu waimu phoron rimane gabang ning Judarao phai ba.
20Jisu phai du thihi graojma khna ba ha ning bo jang goron lai mane bajiha baigo lang ba, thikhabo Mari noh ha ning khamhi dong ba. 21Martha Jisu niha thi ba, Ning eraha dongpha kha de ani buphlung thih nang niya mu, 22asababo, Madai niha ning khainsu kha de, Madai ninthane bokhe ri nang thihi ang tharmai du.
23Jisu bokhe thi ba, Nini buphlung baijaphin ma se.
24Martha thiphin ba, Jamthaohiba ni basain ha baijaphin ma thihi ang tharmai du.
25Jisu bokhe thi ba, “Baija phinriyaba ode hayu ang se ning. Sere ani basao ha lonma deng re, bo thih la khabo, thangphin ma se. 26Sere thanghi dong ode ani basao ha lonma dong, bo thaoglao habo thih thaoya kha, ebo grao khe ning lon du?”
27Om, Gabra, bo thiphin ba, ang lon du, Madai ni Basa Krista, sere phirthi ha phaiginyaba dongba, bo de ning se.
Jisu gra kha
28Ebo khe thiblai hi bo thang la kha, ode jarni bahandao Mari khe longkhao hi thi ba, Slingriyah era ning dong, bo ning khe long hadu. 29Mari khnaba jang baija hi boni ha phai ba. 30Jisu duha sosibo nolei ha sohiya kho, braha Martha bo jang goron ba, bo hathan ha ning dong kho. 31Judarao Mari jang baosi noh ha dongba ode bonsi khe dukhu waimu phoronba ha Mari srap baija hi baji gede baigo langba khe nuhi, bonsi baoba, bo mangkhlong ha gra mane se thang ba, odebani boni yaohon rikpha ba.
32Braha Jisu dong ba, Mari oraha sohiba ode bokhe nuba jang boni igah ha galai hi thi ba, Gabra, ning eraha dongkha de, ani buphlung thihya kha mu.
33Jisu bokhe ode bo jang baosi Judarao phai phayarao khe bo graba khe nuhi Bese ha hamsi ning dukhu nang ba. 34Ode, bo sing ba, Nisi bokhe braha deng ba? Bonsi thiphin ba, Phai hi nai lah, Gabra.
35Jisu gra ba. 36Odehe Judarao thi ba, Nai lah, bo Lazaras khe bislei hamjao du!
37Thikhabo, bonsi ni bising ha gejesi thi ba, Bo gana subung khe muh nu riphuyaba se, ebo subung khe bo githi ni phrang mathang phinphu nang niya?
Lazaras khe mathangphin ba
38Jisu khasu ha dukhu nang hi mangkhlong ha sophai ba. Bo masi longkhor se, odebani hapsing thani ha masi longthai jang baophung hi deng ba. 39Jisu thi ba, Longthai khe disai lah.
Bo thihyaba ni bahandao Martha thi ba, Gabra bo ni phrang maramyaba bahai phai du, bede thikhala bo thiba nokha sain bri ja kha.
40Yaohon ha Jisu thi ba, Ning lon du thikhade Madai ni muima khe ning numa se thihi ang ninthane thiya na? 41Odehe, bonsi longthai khe disai ba, yaohon ha Jisu basao ha naikhu hi thi ba, Abai, ning ani grao khe khnaba ni ang nini basao ha khaja la du. 42Ning nalaibo ani grao khe gainsong du thihi ang tharmai du; thikhabo, ning se ang khe haiha ba thihi bonsi lonphu mane ode eraha subung buthu songhi dongyarao ni khlai hi se ang ebo grao khe thi ba. 43Ebo grao khe bo thi hi, Jisu khurang si jirik khao hi longhun ba, Lazaras, bajiha phai lah. 44Boni yao ode yapha ha rih jang repding hi ode masi rih boni mukhang repphung hi githi subung baji ha baigo phai ba. Jisu bonsi khe thi ba, Rih khe khru ode bo khe haiha.
Jisu khe sthai mane bao ba
(Mt. 26.1-5; Mk. 14.1,2; Lk. 22.1,2)
45Gabang Judarao Mari niha daobai phai ba, ode Jisu dangyaba khusi khe nu ba, bonsi gabang ning Jisu ni basao ha lon la ba. 46Thikhabo bonsi ni bising ha gejesi subung Pharisairao niha thang ba, ode Jisu dangyaba khusi khe bonsi niha sainthi ri ba. 47Ode, Jonthaimarao, Pharisairao, Khamhojarao khe masi mel jamani longthim ba, Jing snadi khlaima kho? thi hi bonsi sing ba. Ebo subung gabang ning gmang thaosisiyaba khusi khe dang phnu kha. 48Jodi jing bokhe elei ning haiger re thikhade, khripbo boni basao ha lonma phaima se, ode Rom sarao phaihi jini hathan ode jadi magin ni basao ha hok ja lama se.
49Ode bonsi ni bising ha saosi subung, bumu Kaiapha thijaoyaba dong ba, bo maithai ha Jonthaima jahi dong ba, bo thi ba, Nisi musi khe bo mithiya. 50Khrip jadi gma tharba thane subung buthu ni khlai hi saosi subung thihba se nisi ni khlai hi hamdao thihi nisi baoba maiya? 51Ebo grao khe bo jarni gede jahi de thiya, thikhabo bo maithai ha Jonthaima jahi, japhai ginyaba khe se thida ri ba, Juda jadi ni khlai hi Jisu thih ma. 52Bo jadi ni khlai hi se ning niya, thikhabo, Madai ni sasik dra-dri japhlung tharyaba khrip bonsi khe labu hi bojom khlai ma, ode bonsi khe masi slam ma.
53Odese, bo basain ni phrang bokhe sthai mani baolei ma. 54Odehe, Judarao ni bising ha Jisu gabang daobaiya hi dong ba, masi hathan ni hajengling gabasi ha Ephraim thiyaba nolei ha bo thang la hi, jarni rikphayarao jang bo oraha se dong ba.
55Judarao ni Baiglai ni Busu ni bubli sampha phai kha bani gabang subung jar khe thar rila mani khlai hi jarni mulug ni phrang Baiglai ni Busu ni sagang ha Jerusalem ha thang ba. 56Bonsi Jisu khe smai hi, Madaikhoh ni hathan ha songhi bonsi jar jang jar thilai ba, Ning la bedehe bao du? Mel ha bo phai nang niya? 57Jonthaimarao ode Pharisairao Jisu khe rem mani khlai hi, sere boni dongthan khe tharmai re thikhade bonsi khe khna rima nangma thihi hukhum ri ba.
Valið núna:
JOHN 11: DIMASBSI
Áherslumerki
Deildu
Afrita
Want to have your highlights saved across all your devices? Sign up or sign in
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.