LUK 24
24
Shia Aruba
(Mat. 28.1-10; Mar. 16.1-8; Yoh. 20.1-10)
1Saka deobar anepungi parnoki teronem menembaji bener parnoki leper jagi aru. 2Aser parnoki lungji leper nungjagi mekeptoker angu, 3saka kodang parnoki ajagi ai parnoki Kibuba temangji mangu. 4Iba indang parnok rata-mata alidang, ajiang, nisung ana sentsüprang sü abener parnok anasa noktak. 5Aser parnoki tsübuadok aser parnok tejak ali nung apudaka alidang nisungtem jagi parnok dang ashi, “Kechiba nenoki takümji tasür rongnung bushir? Pa yangi mali, saka shia aruogo. 6Pa kodang Galil nung liasü, pai nenok dang koda jembi ibaji bilemtetang. 7‘Nisung Chirji menenpurtem ket nung bendanga agütsütsü aser kangki nung angenloktsüla aser asemnübuba nung shia arutsüla’ ta pai shiogo.” 8Aser parnoki pa otem bilemtet, 9idangji parnoki leper nungi meyipa aru aser ya ajak terka aser tanüngba ajak dang ashi. 10Aser parnokji Mari Magdalin, Yoana, aser Yakob tetsü Mari liasü; aser parnok den tangar tetsürtemi tenyartem dang itemi ashi. 11Saka item o ajak nütsüngtem atema amajok osang ama aküm, kechiaser parnoki tetsürtemi ashiba o dakji mamang. 12Saka Peteri aramesoa leper jagi asem aser pai mokrema lur telunglenji ajidang nung pai sü tanükji dang balaka nung angu aser kechi atalok ta pai süngmanga kidangi aru.
Emma Lenmang Nung
(Mar. 16.12-13)
13Iba anogo nungji parnok rongnung nisung ana Yirusalem nungi mile tenet shi oa yim ka tenüng agi Emmai oya liasü. 14Aser kechisa atalok item ajak indang tena jembitepa liasü. 15Tenati külemi asüngdangtepa jembidang, Yisua parnok anasai aru, aser parnok den ao. 16Saka paji meshitettsüsa parnok tenük chilar liasü. 17Aser pai parnok dang ashi, “Nena jajadang jembitepba o to kechi?” Aser tejak mekümer parnoki ajemajema noktak. 18Aser tena rongnung nisung ka tenüng agi Kleopai langzü, “Yirusalem nung munger idakji item anogo nungji kechi atalok nai dang memetet no?” 19Aser pai parnok dang ashi, “Kechi ama?” Aser parnoki pa dang ashi, “Nazaret nunger Yisu indang, shiba o aser mapa nung Tsüngrem aser nisung ajak madang tashi aitba ainkar ka liasü. 20Asenok putiungertem aser yimsüsürtemi pa südaktsütsü aija bendanga agütsü, aser pa kangki nung angenlok. 21Saka paji Israel Kümtettsüsang ta onoki imla-a liasü. Hau, ya ajak alema, item ataloker tanü agi anogo asemnübuba lir. 22Ano onok medemer tetsürtem kari onok süngmangdaktsü, parnokji anepungi leper nung liasü, 23aser parnoki pa temang mangu; aser parnoki kotak tenyartem adoka angu ta arua shia liasü; aser kotak tenyartemi pa taküm lir ta ashi. 24Onok den alir kari leperi oa tetsürtemi ashiba amaji angu, saka parnoki pa mangu.” 25Aser pai parnok dang ashi, “Oh tamashi purtem, aser ainkartemi ashiba ajak temulung nung meilungi amangtsüba purtem! 26Khristaji pei sentsüwangshi daki aitsü atema pai item timtem tekangshi abentsü tenüngdaktsü masü ama?” 27Aser Mosa aser ainkartem ajak nungi tenzüka pa indang zülubatemji pai parnok dang rateta sayu.
28Aser parnoki aoba yimji anasa atong; aser ano pabo talangba aotsü amai liasü. 29Saka parnoki pa ajungshia ashi, “Onok den ata-a liang, kechiaser anü talangka luogo aser nikongtsütsü lir.” Aser pai parnok den anentsü atu. 30Kodang pai parnok den chiyungtsü amen, pai amtsük bena aru aser moatsü, aser aji sangsa aser parnok nem agütsü. 31Idangji parnok tenük lapokadok aser parnoki paji shiteta aküm; aser parnoki paji mungui samadok. 32Aser tena kati ka den jembitepa ashi, “Lenmang nung pai asenok den jembia Laishiba rateta sayudang, asenok temulungjang nung marong ama?” 33Aser parnoki iba mapang nungjisa aramesoa Yirusalemi meyip, aser terkaji aser parnok den alirtem külemi sentepa ngur ashi, 34“Kibuba atangji shia aruogo; aser Simon madangi adokogo!” 35Idangji lenmang nung kechisa atalok aser kechi koda amtsük sangsadang pai parnok nem paji shiteta kümdaktsü iba indang parnoki ashi.
Nütsüngtem Madangi Adokba
(Mat. 28.16-20; Mar. 16.14-18; Yoh. 20.19-23; TMa. 1.6-8)
36Aser parnoki item o jembia alidang, Yisuji parnok rongnung noktak aser parnok dang ashi. “Nenok den tesünep liang.” 37Saka parnoki aoksa aser tsübu, aser tanela ka angu ta bilem. 38Saka pai parnok dang ashi, “Kechiba nenoki aoksar? Aser nenok mulung nung arentaka bilema asüngdangteper? 39Kü teka aser tetsüng ajiang, kechiaser nenoki kü dak shi aser teret keta anguba ama tanela ka dak shi aser teret keta mangutsü.” 40Aser kodang pai ya ashi, pai pei teka aser tetsüng parnok dang sayu. 41Aser parnoki tepela agi mamangteti süngmangdang pai parnok dang ashi, “Yangi nenok langka tachitsü lir ma?” 42Aser parnoki pa nem ango tamen temelang ka agütsü. 43Aser pai aji agizük aser parnok tsüngdang achi.
44Idangji pai parnok dang ashi, “Mosa ozüng, aser Tenüngsang kentem nung kü indang kechisa zülu, itemji ataloktsü tenüngdaktsü ta, kü o itemi ni nenok den alidang jembiogo.” 45Idangji parnoki Laishiba angatettsüsa pai parnok mulung lapoktsü; 46aser pai parnok dang ashi, “Khrista tuo ashitsüla, aser asemnübuba nung tasü nungi shia arutsü. 47Aser Yirusalem nungi tenzüka kin ajak dang temulung meyipba aser temenen tatokba pa tenüng nung sayutsüngitsüla. 48Item indang nenok kulitem lir. 49Aser ajiang, kü Bui nangzükba ni nenok dangi yoker, saka temaba nungi nenok dangi ain maru tashi nenoki yimti nung mungang.”
Yisu Kotaki Atuba
(Mar. 16.19-20; TMa. 1.9-11)
50Aser pai parnok Bethani tashi anir ao, aser pai pei teka mekanga parnok moatsü. 51Pai parnok moatsüdang, pa parnok nungi pila, aser kotaki anir atu. 52Aser parnoki pa külem, aser tepela tulu agi Yirusalemi meyipa aru. 53Aser Tsüngrem tenüng sanga, parnok tenla kidang maneni liasü.
Valið núna:
LUK 24: AONAGABSI
Áherslumerki
Deildu
Afrita
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.