YOHAN 6
6
Meyi Pungu Chiyungdaktsüba
(Mat. 14.13-21; Mar. 6.30-44; Luk. 9.10-17)
1Iba sülen Yisu Galil nung aliba Tiberia tzüyim külen jagi ao. 2Aser telok tulu ka pa sülen anitak, kechiaser shirangertem madak pai kechi temaitsütem inyak parnoki aji angu. 3Yisui tenem kati atu aser pa nütsüngtem den amen. 4Idangji Yihuda nunger Kümtettsü Benjong anasa liasü. 5Anungji kodang Yisui reprangzüka yok, pa dangi telok tulu ka aruya pai angu aser pai Filip dang ashi, “Parnok chiyungtsü asoshi asenoki amtsük kong alitsü?” 6Filip tendangtsü asoshi pai ya shia liasü, kechiaser pai kechi inyaktsüar pai pei sasa meteta liasü. 7Filipi pa dang langzü, “Nisung shia tilala dang chiaka taribi sen#6.7: “Taribi Sen: Iba Taribi sen kaji anogo ka nung nisung kati aaba jenjang liasü.” noklang ana jenjang agia parnok meperitsü.” 8Pa nütsüng rongnung ka Andria, Simon Peter tenu, pai ashi, 9“Yangi tanur ka lir aser pa ket nung amtsük pungu aser ango ana kar, saka nisung paikati asoshi yagi meperitsü.” 10Yisui ashi, “Nisungtem mendakjang.” Yangji ai kanga liasü, anungji nisungtemi amen; parnok meyi pungu shi liasü. 11Anungji Yisui amtsükji bena aru aser Tsüngrem nem tenüngsang agütsü, aser parnok mena alir nemji aji sangsaa agütsü, aser yamaji angojia parnoki aginüba tashi agütsü. 12Parnok peria chir külen Yisui pei nütsüngtem dang ashi, “Kecha mesamatsüsa tanüngba tanük-tariji bendenang.” 13Anungji parnoki itemji benden, aser amtsük pungu nungi nisungtemi chir tanüngba tanük-tari agi molok terana asüng. 14Anungji pai inyakba temaitsüji ngua nisungtemi ashi, “Atangji alimai tarutsü aliba ainkarji ya lir.” 15Anungji parnoki arua pa pua chuba kümdaktsüdi ta aliba Yisui meteta pai pa kija tanaben tenemi atu.
Tzü Manung Jajaba
(Mat. 14.22-33; Mar. 6.45-52)
16Kodang nikongtsütsü aküm, pa nütsüngtem tzüyimi alu. 17Parnoki rong kati ai aser tzüyim ajanga Kapernaumi oya liasü. Joko mangadoker aser Yisu ano parnok dangi maru liasü. 18Aser mopung tulu ka aon nung tzüyim kanga sashia liasü. 19Anungji nütsüngtemi mile asem pezü shi rong nung jua or külen Yisu tzü nung jaja-a rong anasai aruba parnoki angu aser parnok tsübua liasü. 20Pai parnok dang ashi, “Niar tetsübuma.” 21Anungji parnoki pa rongi anioktsü pela-a liasü, aser kechi linük atongtsü parnoki oya liasü, idangyongji rongi aji atong.
Yisu, Taküm Chiyungtsü
22Asüngji tzüyim külen nisung telokti noktaka alirtemi idakji rong ka dak alema tanga rong mali asü ta meteta aser rong nungji Yisui pei nütsüng den mao, saka pa nütsüngtem dang ao ta meteta liasü. 23Joko kechi nung Kibubai Tsüngrem tenüng sanger parnoki amtsük achi, aji anasai Tiberia nungi rongtem aru. 24Anungji Yisu aser pa nütsüngtem idakji mali ta meteta parnoki rongtem jagi atu aser Yisu bushia Kapernaumi aru. 25Kodang parnoki Yisu tzüyim külenji angu, parnoki pa dang asüngdang, “Tesayur, na yagi kodang aru?” 26Yisui parnok dang langzü, “Atangji züngpong ni nenok dang shidi, nenoki temaitsütem anguba agi masü, saka nenoki amtsük chia tipatembayong ni bushir. 27Sama-a aoba chiyungtsü asoshi teinyak, saka chiyungtsü kechi agi teti alir koba Nisung Chiri nenok nem agütsütsü aji asoshi inyakang; kechiaser Tebu Tsüngremi pa dak temaitsü ajenogo.” 28Idangji parnoki pa dang ashi. “Tsüngrem mapatem inyaktsü asoshi onoki kechi inyaktsüla?” 29Yisui parnok dang langzü, “Tsüngremi shiba yoka lir pa dak nenoki amangtsü, aji Tsüngrem mapa lir.” 30Anungji parnoki pa dang ashi, “Ajangla onoki ngur ne dak amangtsüsa nai kechi temaitsü inyaktsü? Nai kechi mapa inyaker? 31#Ani. 16.4,15; TKe. 78.24 Ozü tetsüteboutemi azüngmeyakdak lisem lima nung mana achi; zülua aliba ama, ‘Pai parnok nem kotak nungi chiyungtsü agütsü.’” 32Idangji Yisui parnok dang ashi, “Atangji züngpong ni nenok dang ashir, kotak nungi nenok nem chiyungtsü agütsübaji Mosa masü; saka kü Bui kotak nungi nenok nem atangji chiyungtsü agütsür. 33Kotak nungi shiba alu aser alima nem taküm agütsü aji Tsüngrem chiyungtsü lir.” 34Anungji parnoki pa dang ashi, “Kibuba, iba chiyungtsüji onok nem teti kua.” 35Yisui parnok dang ashi, “Taküm chiyungtsü ni, shiba kü dangi arudir pa mayatsü, aser shibai kü dak amangdir pa kodanga metzüratsü. 36Saka nenoki ni nguaka mamanger ta ni nenok dang shiogo. 37Kechi Tebui kü nem agütsü aji ajak kü dangi arutsü aser shiba kü dangi arudir ni pa kodaka-anga meindoktsü. 38Kechiaser ni pei mulungba inyaktsü asoshi masü, saka ni tenyabai mulungba inyaktsü asoshi kotak nungi alu. 39Ni tenyabai mulungbaji ya lir, oda pai kü nem kechisa agütsüogo, aji kecha ni mamadoktsüla, joko tatem anogo nung ibaji shia arudaktsütsüla. 40Kechiaser kü Bui mulungbaji ya lir, oda shibaisa Techir ngudir, aser pa dak amangdir, teti taküm angutsüla aser tatem anogo nung ni pa shia arudaktsütsü.”
41Anungji ni kotak nungi aluba chiyungtsü ta pai ashi nung Yihuda nungeri pa indang kangkokangjia jembi. 42Aser parnoki ashi, “Ibai Yosef chir Yisu masü no? Pa tebu aser tetsü asenoki memetet no? Ajangla ni kotak nungi aluba ta pai koda shir?” 43Yisui parnok dang ashi, “Nenok rongnung kangkokangji tesü. 44Ni tenyaba Tebui mesüra, shingaia kü dangi arutsü makok, aser tatem anogo nung ni pa shia arudaktsütsü. 45#Isa. 54.13Ainkartem kaket nung yamai zülua lir, ‘Aser parnok ajak dang Tsüngremi sayutsü.’ Shibaisa Tebu nungi angashiogo, aser angazükogo pai kü dangi arur. 46Nisung kari Tebu nguogo ta masü, oda shiba Tsüngrem nungi lir, pai dang Tebu angu. 47Atangji züngpong ni nenok dang shidi, shibai amangdir pa teti taküm kar. 48Ni taküm chiyungtsü. 49Nenok tetsü-teboutemi azüngmeyakdak arem nung mana achi, aser parnok asü. 50Nisungi chir masütsü asoshi ibai kotak nungi aluba chiyungtsü. 51Ni kotak nungi aluba taküm chiyungtsü. Kari iba chiyungtsü chira, pa teti taküm alitsü, ano alima taküm asoshi ni koba chiyungtsü agütsütsü aji kü shi.”
52Anungji Yihuda nungeri parnok o parnok na raratepa ashi, “Iba nisungi kechi koda tachitsü asoshi asenok nem pei shi agütsütsü?” 53Anungji Yisui parnok dang ashi, “Atangji züngpong ni nenok dang shidi, nenoki Nisung Chir shi mechira aser pa zü mejemra nenok pei sasa dak taküm mali. 54Shibai kü shi achir aser kü zü ajemer, pa teti taküm kar, aser tatem anogo nung ni pa shia arudaktsütsü. 55Kechiaser kü shi chiyungtsü shitakba aser kü zü tajemtsü shitakba. 56Shibai kü shi achir aser kü zü ajemer, pai kü dak alir aser ni pa dak alir. 57Taküm aliba Tebui komama ni yok aser Tebu agi ni taküm alir yamaji shibai ni chidir, pa-a ni agi taküm alitsü. 58Kotak nungi aluba chiyungtsüji ibai tetsü-teboutemi chir asüba ama masü; shibai iba chiyungtsü chidir pa teti taküm alitsü.” 59Kapernaum nung sayua alidang, pai itemi sinagog nung jembi.
Tatem Makaba Taküm O
60Anungji ya angashidang pa nütsüngtem rongnung aikati ashi, “O yabo tasak, shibai ya angatettsü?” 61Saka ya asoshi nütsüngtemi kangkokangjir ta Yisui pei mulung nung meteta parnok dang ashi, “Iba yagi nenok tsüktakdaktsür asü? 62Ajangla nenoki Nisung Chir pa tamasa alidak tuya ngura, koda asütsü? 63Taküm agütsübaji Tanela lir; shibo amajok, ni nenok dang ashiba oji Tanela aser taküm lir. Saka nenok rongnung mamanger kar lir.” 64Kechiaser shiri mamang, aser shibai pa ashioktsütsü, aji Yisui tetenzük nungi metet. 65Aser pai ashi, “Iba asoshi Tebui magütsüra shingaia kü dangi arutsü makok ta ni nenok dang shiogo.”
66Idangji pa nütsüng aika meyipa oadok aser joko pa den mejaja. 67Anungji Yisui terana dangji ashi, “Nenoka oadoknür asü?” 68#Mat. 16.16; Mar. 8.29; Luk. 9.20 Simon Peteri pa dang langzü, “Kibuba, onoki shiba dangi aotsü? Ne dak teti taküm o lir. 69Aser na Tsüngrem Temeshibaji ta onoki amangogo, aser meteter.” 70Yisui parnok dang langzü, “Ni nenok teranaji meshimtetka ma? Saka nenok rongnung kabo mojing lir.” 71Iba o Simon Iskariot chir Yihuda indang pai ashi, kechiaser terana rongnung shibai pa ashioktsütsü ibaji pa liasü.
Valið núna:
YOHAN 6: AONAGABSI
Áherslumerki
Deildu
Afrita
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.