YOHAN 10
10
San Kikümbang
1Yisui ashi; “Atangji züngpong ni nenok dang shidi, shibai kikümbang ajanga maiti, saka tanga len kati san kidangi aiter, pa auür aser rakzükraktemer; 2Shibai kikümbangji ajanga aitdir paji san tanüker. 3Aser pa nem kishinükeri kishiji lapoktsür, aser santemi pa ola angateter; pai pei san tenüng agi ajar aser parnok anir aor. 4Pai pei meyong san ajak anitener külen, pai parnok jakdang aor aser santemi pa sülen anidaker; kechiaser parnoki pa ola metet. 5Jokorla tangar sülen parnoki manidaktsü, pa madang nungibo parnoki jenshitsü, kechiaser parnoki tangar ola memetet.” 6Iba o entepba Yisui parnok dang ashi, saka pai parnok dang kechi ashi, aji parnoki mangatet.
Yisu Sannüker Tajung
7Anungji Yisui tanaben parnok dang ashi, “Atangji züngpong ni nenok dang shidi, Ni kikümbangji lir. 8Kü dang tamasa arur ajak auürtem aser rakzükraktemertem; saka santemi parnok dang manga. 9Ni kikümbang, ni ajanga shiri aiter pa kümzüktsü aser aitli tuguli ta asütsü aser chiyungtsü angutsü. 10Auüri tauyatsü, tepsettsü aser raksatsütsü atema dang arur. Parnoki taküm angutsü aser aji talubosa akatsü asoshi ni aruogo. 11Ni sannüker tajung, sannüker tajungi santem asoshi pei taküm yutsür. 12Shiba sannüker masü saka ayanger dang aser santemji pa meyong masü, pai tsünü aruya angur aser san toktsür ajener; aser tsünü jagi parnok apur aser jenshidaktsür. 13Pa ayanger ka dang aser santem asoshi mebilemer anungji pa jena aor. 14Ni sannüker tajung, aser kü Bui ni kechi koda metet, yamaji ni kü meyong san metet aser kü meyongi ni metet; 15#Mat. 11.27; Luk. 10.22 aser santem asoshi ni kü taküm yutsür 16Aser iba san ki nung matenba kü meyong ano tanga san lir; itemjia ni anir arutsüla, aser parnoki kü ola angatsü aser parnok Sannüker ka kübok san telok ka akümtsü. 17Iba asoshi kü Bui ni meimer kechiaser tanaben meyipa agitsü asoshi ni kü taküm yutsür. 18Aji ni nungi shingaia merakzüker, saka kü sasa ni aji yutsü. Aji yutsütsü kü tashi-ain lir. Iba temelaba ozüng ni kü Bu nungi agizük.”
19Item o atema Yihuda nunger rongnung telemsa adok. 20Aser parnok aikati ashi, “Pa dak temenen tanela lir, aser pa yiar; kechiba nenoki pa o angar?” 21Tangari ashi. “Yabo temenen tanelai apuba o masü. Temenen tanelai nükpoker tenük lapoktsütetdi ma?”
Yisu Yihuda Nungeri Jentokba
22Idangji Yirusalem nung Temeshitetba benjong ka liasü. Aji tsüngkhümwa liasü, 23aser Yisu Solomon kilempok nung senzüya liasü. 24Anungji Yihuda nungeri pa meketbanger pa dang ashi, “Kopiga nai onok ratamadaktsütsü? Na Khristaji süra onok dang jangja jangja shiang.” 25Yisui parnok dang langzü, “Ni nenok dang shiogo, saka nenoki mamanger. Kü Bu tenüng nung ni kechi mapatem inyaker item yagi kü indang kuli agütsür. 26Saka nenoki mamanger, kechiaser nenok kü san rongnung maten. 27Kü santemi kü ola angar, aser ni parnok metet, aser parnoki kü sülen anitaker. 28Aser ni parnok nem teti taküm agütsü, aser parnok kodanga mesamatsü, aser parnok kü ket nungi shingaia rakzüka motettsü. 29Kü Bu shibai parnok kü nem agütsü, pa ajak dang tuluba, aser kü Bu ket nungi shingaia parnok rakzüka moutet. 30Ni aser kü Bu ka dang.”
31Ajagi Yihuda nungeri pa dak aontsü tanaben lung am. 32Idangji Yisui parnok dang langzü, “Kü Bu nungi mapa tajung aika ni nenok dang sayuogo. Item rongnung koba mapa asoshi nenoki kü dak aoner?” 33#Lev. 24.16 Yihuda nungeri pa dang langzü, “Mapa tajung asoshi onoki ne dak maoner, saka Tsüngrem atalaba yong, kechiaser na nisung dang sür nung ne sasa Tsüngrem akümba yong.” 34#TKe. 82.6 Yisui parnok dang langzü, “Ni ashi, nenok tsüngremtem lir, ta nenok ozüng nung zülua melika ma? 35Shir dangi Tsüngrem o aru, parnok dang tsüngremtem ta pai aja süra (aser Lai o raksatsü makok), 36ajangla ni Tsüngrem Chir ta ni ashi nung, Tebui shiba meshitettsü aser alimai yok; pa dang nai Tsüngrem atalar ta nenoki ashir ama? 37Ni kü Bu mapatem meinyakra idangjibo nenoki ni tamang. 38Saka ni itemji inyakra nenoki ni mamangaka, mapatemji amangang, anungji Tebu kü dak lir, aser ni Tebu dak lir ta nenoki metettsü aser angatettsü.” 39Parnoki tanaben pa aputsü bushi; anungji pai parnok ket nungi aenshia ao.
40 #
Yoh. 1.28
Aser Yisui tanaben Yordan külen Yohani mezüng baptija alidaki ao; aser yangji pai ali. 41Aser aika pa dangi aru aser ashi, “Yohani atangji temaitsü kecha meinyak, saka Yohani iba Nisung indang kechisa jembi ajak shitak liasü.” 42Aser yangji aikati pa dak amang.
Valið núna:
YOHAN 10: AONAGABSI
Áherslumerki
Deildu
Afrita
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.