Northern Zazaki, Dersim - WBT (Luke) Non Drama

Northern Zazaki, Dersim - WBT (Luke) Drama

Bado İsa bı des u dı telebanê xo'a sukı bı sukı, dewı bı dewı feteliya. İsay waaz denê, Mijdania Hukumdariya Heqi denê mıleti. Lê ninan de cinıkê kı İsay cındıkan ra, nêweşiyan ra xelesnay bi ra, i ki esti bi. Ninan ra jüyê dewa Mecdel ra Meyremı biye. Wertê na cinıkı ra, hawt teni cıni veciyay. Yohanna cinıka Xuzay bi, Xuza ki idarıkarê kê Hukumdar Hirodesi bi. Cinıka de binı ki Suzanna biye. Bı ninan'a pia xeylê cinıkê bini ki esti bi. Çıqa kı destê ni cinıkan ra amenê, İsay bı telebanê iy rê yardım kerdenê.

Waxtê jüyê de, zaf sukan ra sılxetiya de gırsı amay bi lê İsay, İsay inan rê mesela nanênı qeşi kerdı: “Rocê, jü mêrık sono kı toxım bercero hêga. Key kı toxım erceno hêga, tayê phıjiqiyo rayê ser. Nowo kı phıjiqiyo na ray ser, bınê nıngan de beno phan, çuçıkan rê beno qut. Tay toxım ki phıjiqiyo serê khırre ra. Owo kı rışiyo serê ucay, zil dano, feqet têsaniye ra beno husk sono. Tay toxım ki phıjiqiyo wertê çaliyan ro. Owo kı phıjiqiyo wertê çaliyan ro zil dano, bı çaliyan'a pia beno gırs, feqet çali toxımi wertê xo de xendeqınê. Tayo bin ki gıno wertê wela de rındı ro. No toxım beno gırs, se qat genım dano.” İsay na mesela dıma nia vat: “Kamo kı eşino pê, gos bıdero ni qesanê mın.”
Telebanê İsay mana na mesela İsay ra pers kerdı. İsay inan rê vat: “Sırrê Hukumdariya Heqi sıma rê amay vatenı. Ez ni sırran mıletê bini rê bı meselan'a qeşi kenan. Ez nia bı meselan'a qeşi kenan kı,

‘İ sêr kerê feqet mevênerê,
Bıeşiyê pê feqet fam mekerê.’

“Mana mesela nawa: Toxım qesa Heqia. Toxımê kı phıjiqiyê ray ser, mordemê kı qesa Heqi eşinê pê, iyê. Seytan êno, qesa Heqi zerria ninan ra gêno erceno kı i bı Heqi'a inam mebêrê, mexeleşiyê ra. Toxımê kı rışiyê khırre ser, mordemê kı qesa Heqi bı kêf'a qebul kenê, iyê. Ni tenê waxt inam kenê, feqet kokê ninan nêsono xori. Ay ra waxto kı kuti tengiye, iman ra kunê duri. Toxımê kı gınê wertê çaliyan ro, mordemê kı qesa eşinê pê, feqet wertê qısaweta variyetı u zewqê weşiye de, xendeqinê sonê, iyê. Ay ra ni nanêni nêşkinê genımê de rındi bıderê. Toxımê kı rışiyê wela rındı ser, mordemê kı qesa Heqi eşinê pê, zerri ra inamê ay benê, iyê. İ qesa Heqi zerria paka rındı de darenê we. Bı sebr'a damis danê, genımo de rınd danê.”

“Jüyê kı çıla fitı cı, serê çıla bı qab'a nêmuneno ya ki çıla nêkeno bınê cılı, nêdareno we. Cayê de berci de çıla xo nano ro kı kam kı kuno zerrı, roştia çıla bıvênero. Qe çiyo de wedardayi çino kı meveciyo wertı. Her sırr vecino roşti. Ay ra rınd gos bıderê Qesa Heqi ser. Kami de kı esto, Heq daa zêdı dano. Kami de kı çino, owo kı qa vano dest dero, o ki êno gırotenı.”

Rocê, mua İsay bı bıraê xo amay kı İsay bıvênerê. Uca hente sılxet bi kı nêşkiyay sêrê lê İsay. İsay rê na xeberı ame vatenı: “Mua to bı bıraê to amê, teber de pinê, wazenê kı to bıvênerê.”
İsay vat: “Kamo kı Qesa Heqi eşino pê, inan ano hurindi, ma u bıraê mın iyê.”

Rocê, İsa bı telebanê xo'a pia nist qayığı, inan rê vat: “Ravêrım bover.” İnan qayığı ramıtı, verê golı ra kuti duri. Key kı bı qayığ'a vêrdenê ra bover, İsa hewn ra şi. Xafılde golı de fırtınıo de gırs veciya. Qayığı kı awkı gırotı, i kuti tengiye. Telebê İsay şi İsa vezna ra, inan cı rê vat: “Wayir, Wayir, mao xendeqinım!”
İsa ust ra, vay bı awkı rê hêrs bi, vat: “Fınderê!” Vay bı awk'a fındeti. Her çi bi sêkın.
İsay telebanê xo rê vat: “Kuyo, koti dero itıqatê sıma?”
Telebi tersay, sas bi mandi. İnan mabênê xo de jübini rê nia vat: “No mêrık kamo kı vay bı awk'a bilı qesa iy say kenê.”

İsay bı telebanê xo'a golı ra vêrdi ra, şi Gerasa, nıta boverê Celile de bi. İsa kı qayığı ra ama war, suka Gerasa ra jü mêrık ama lêwı. No mêrık cındıkın bi. Çı waxt bi, rut feteliyenê. Qe kê de nêmandenê, mezelê kı wertê mığaran de bi, uca de mandenê. Se kı iy İsa di, qirra, xo est verê nıngan, vat: “Ya İsa, Heqo kı her çi ra berco, Lacê iy, tı mı ra çık wazenay? Se beno, mı rê thaba mekı!” Mêrıki cı rê hini vat, çıkı İsay cıni rê vati bi: “Wertê mêrıki ra veci.” No mêrık rew rew kutenê tesirê cıni. Mıleti o bı zinciran'a u resenan'a gırê denê. Lê ni mêrıki de her waxt jüyê pitenê, hadarê cı biyenê. Ni mêrıki zincirê xo resenê xo vısnenê. Cıni no mêrık berdenê yaban yaji de fetelnenê.
İsay vat: “Namê to çıko?”
Vat: “Namê mın Elayiyo.” Hente kı zaf cıni kutê wertê ni mêrıki, ay ra namê xo nia vato.
Cınan İsay rê vat: “Se beno, ma merusnı çalanê bınê herdi.”
A sırı, sênê koy de zaf xozi esti bi, i uca de çerdenê. Cınan İsay rê vat: “Se beno, raverdı ma zerrê ni xozan kuyım.” İsay ki verda, i zerrê xozan kuyê. Cıni wertê mêrıki ra veciyay, kuti zerrê xozan. Xozi sênê koy ra vasti cêr, xo esti wertê golı, xendeqiyay.
Şüanê xozan, çiyo kı uca de bi bi, inan kı o di, uca ra remay şi; dewan de, sukan de her kesi rê ni xeberi qeşi kerdi. Mılet kı nay eşiya pê, veciya şi kı owo kı biyo, iy bıvênero. Mılet ama lê İsay, mêrıko kı cındıkan ra xeleşiyo ra, o di. Mêrıki kıncê xo gırotê pıra, aqlê xo amo serı, hini verê nınganê İsay de nisti bi ro. Mıleti kı na diye, tersa. Kami kı İsay no mêrık senên cınan ra xelesnay bi ra di bi, inan ki i binan rê na qeşi kerdı. İyê kı hetê Gerasa de mandenê, i pêro zaf tersay. Ay ra wasti kı İsa uca ra sêro. İsa ki bı qayığ'a peyser şi.
Mêrıko kı İsay cınan ra xelesnay bi ra, iy ki mınetı kerdı kı lê İsay de bımano. Feqet İsay o rusna, cı rê nia vat: “So kê xo. İyê kı Heqi saba to kerdê, inan qeşi bıkı.” Mêrık ki şi, iyê kı İsay saba iy kerdi bi, her cayê sukı de i qeşi kerdi.

İsa kı peyser ama Celile, uca de her kesi o pitenê, sılxetiye vera cı şiye. A sırı ki, jü mêrık ama lê İsay, namê niy Yair bi; no mêrık idarıkarê xavra bi. Ê ni mêrıki teyna jü domanê xo esti bi. Na kênekı des u dı serri biye, waxto kı nêweşiye ra bımıro. Ay ra iy xo est verê nınganê İsay, cı rê vat: “Se beno, bê kê ma.”
Key kı İsa şiyenê kê Yairi, mıleti dormê İsay gıroti bi. Uca de jü cinıkı ki esti biye. Na cinıkı ra des u dı serrio kı goni şiyenê. Nay perê xo pêro day bi doxtoran, ancia ki qe jü doxtori na cinıkı nêkerdi bi wes. Na cinıkı pey ra dest na kınarê kınca İsay ra. A deqa gonia kı cinıkı ra şiyenê fındetı.
İsay vat: “Kami dest na mı ra?”
Qe kesi nêvat: “Mın na kerdı.” Petrusi cı rê vat: “Malım, mıleti dormê to gıroto, qelebiyo to ser.”
İsay vat: “Ez zanan jüyê dest na mı ra, wertê mı ra qewetı anciyê.”
Cinıkı zana kı nêşkina wedaro, ay ra bı lercayış'a xo est verê nınganê İsay. Wertê her kesi de, çay dest nay bi İsay ra, cı rê vat; dest kı na İsay ra, a deqa senên biyê wes, a ki vatı. İsay cinıkı rê vat: “Kêna mın, itıqatê to tı xelesnay ra. Wertê sılametiye de so.”
İsay ki hona qeşi kerdenê, jü mêrık kê idarıkarê xavray ra ama. Cı rê vat: “Kêna to merdı! Malımi meqefelnı.”
İsa kı na xeberı eşiya pê, Yairi rê vat: “Metersı! Tı teyna iman bıkı, kêna to xeleşina ra.”
İsa ama kê Yairi. Teyna Petrus, Yuhanna, Yaqub, jü ki ma u piyê kênekı gıroti zerrı. Teber de, her kesi saba kênekı denê xo ro, berbenê. İsay inan rê vat: “Meberbê. Kênekı nêmerda, kuta ra.”
Mıleto kı uca de zanenê kênekı merda, ay ra pêro bı İsay'a huyay. İsay destê kênekı gıroti pê, vat: “Kêna mın, urcı!” Roê kênekı peyser ama cı, kênekı a deqa vestı ra. İsay inan rê emır kerd tenê thaba cı derê na kênekı kı boro. Ma u piyê kênekı sas bi mandi. İsay i temı kerdi, vat: “Nay kesi rê mevacerê.”

Listen to Luka 8